У Мінску адбылася трэцяя рэспубліканская канферэнцыя «Павестка-2015» унікальнага праекта «Разумныя сеткі»
Аб ім, напэўна, чуў кожны малады вучоны ці студэнт-старшакурснік: праграма па пошуку, падрыхтоўцы аналітыкаў для органаў дзяржкіравання была запушчана два гады таму і аб'ядноўвае ўжо каля 170 інтэлектуалаў ва ўзросце да 35 гадоў. Гэтым разам у Інстытуце журналістыкі Беларускага дзяржаўнага ўніверсітэта сабралася больш за 50 аналітыкаў, якія актыўна абмяркоўвалі дарагія крэдыты і рост сукупнага ўнутранага прадукту, мадэрнізацыю сістэмы адукацыі і палітыку інфарматызацыі. У прыватнасці, адзін з выступоўцаў наогул прапанаваў у будучыні... перанесці сталіцу нашай краіны ў іншае месца. А каб размова прайшла ў форме дыялогу, на канферэнцыю былі запрошаны таксама эксперты з дзяржаўных устаноў.
23-11
— Міністэрства эканомікі звярнулася ў Адміністрацыю Прэзідэнта з ініцыятывай стаць нашым сузаснавальнікам, — паведаміў удзельнікам намеснік дырэктара Інфармацыйна-аналітычнага цэнтра Адміністрацыі Прэзідэнта Рэспублікі Беларусь, каардынатар праекта «Разумныя сеткі» Аляксей МАЦАВІЛА. — Гэта ведамства ўжо даўно падтрымлівае наш праект, і некаторыя з яго ўдзельнікаў плённа працуюць у міністэрстве. Таму ініцыятыва знайшла падтрымку.
У сваю чаргу, Аляксей Дзербін, дырэктар Інфармацыйна-аналітычнага цэнтра пры Адміністрацыі Прэзідэнта Рэспублікі Беларусь, адзначыў, што аналітыка сёння запатрабавана на дзяржаўным узроўні і ад яе чакаюць нестандартных рашэнняў, якія садзейнічалі б развіццю краіны.
Аб чым разважалі?
Сяргей ГРУНТОВІЧ, студэнт Беларускага дзяржаўнага ўніверсітэта інфарматыкі і радыёэлектронікі:
— Я даследаваў магчымасць выкарыстання сацыяльных сетак для кантактавання дзяржарганізацый з насельніцтвам і прыйшоў да высновы, што гэта эфектыўны інструмент узаемасувязі і наладжвання дыялогу. Дарэчы, сваю супольнасць «УКантакце» мае, напрыклад, Міністэрства абароны.
Яўген НОСАЎ, магістрант Акадэміі кіравання пры Прэзідэнце Рэспублікі Беларусь:
— Мая тэма прысвечана аўтаматызаванай сістэме маніторынгу інфармацыйнай прасторы. Актуальнасць гэтай ідэі ў тым, што вялікая частка людзей атрымлівае інфармацыю толькі праз інтэрнэт. І нам, безумоўна, трэба ведаць настроі інтэрнэт-карыстальнікаў, якія можна вывучаць па іх каментарыях. У адрозненне ад сацыяльных апытанняў, мы можам аператыўна атрымаць інфармацыю ў рэжыме рэальнага часу. На якім партале сядзяць самыя злыя каментатары? Яны паўсюль. І адной з функцыянальных магчымасцяў гэтай сістэмы з'яўляецца выяўленне груп уплыву, якія накручваюць «лайкі» і масава каментуюць навіны ў пэўнай танальнасці. Усё намі робіцца таксама і дзеля таго, каб ведаць, хто спрабуе праз каментарыі ўплываць на нашу грамадскую думку.
Яўген БАГАШОЎ, малодшы навуковы супрацоўнік Аб'яднанага інстытута энергетычных і ядзерных даследаванняў:
— Я неяк задумаўся: а якая ў нас можа быць нацыянальная ідэя? І ў мяне ўзнікла ідэя аб пабудове новага горада. Наш народ не вельмі сацыяльна актыўны. І будаўніцтва новага горада паспрыяла б агульнаму з'яднанню, як гэта было ў пасляваенныя гады, калі аднаўлялі разбураны Мінск. Што тычыцца пераносу сталіцы ў іншае месца, гэта даволі радыкальны, нават фантастычны крок. Ведаю, што многія былі б незадаволеныя гэтым. Аднак чаму б і не?
Якаў ЖУРБІН.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.