Міністрам адукацыі Сяргеем Маскевічам зацверджаны пералік дакументаў для асобных катэгорый педагагічных работнікаў устаноў агульнай сярэдняй адукацыі. Як падкрэсліваецца ў лісце, накіраваным ва ўпраўленні адукацыі аблвыканкамаў і Камітэт па адукацыі Мінгарвыканкама, гэты дакумент зацвярджаўся з мэтай скарачэння дакументаабароту ва ўстановах агульнай сярэдняй адукацыі і канкрэтызацыі пераліку дакументаў, якія ўтвараюцца ў дзейнасці асобных катэгорый педагагічных работнікаў у рамках выканання іх службовых абавязкаў.
У прыватнасці, для настаўнікаў абавязковымі дакументамі для запаўнення з'яўляюцца класны журнал, каляндарна-тэматычнае планаванне, паўрочнае планаванне і дзённікі навучэнцаў.
Для выхавальнікаў — журнал групы падоўжанага дня ўстаноў агульнай сярэдняй адукацыі, каляндарна-тэматычнае планаванне на чвэрць, штодзённае планаванне, рэжым работы групы падоўжанага дня, зацверджаны кіраўніком установы агульнай сярэдняй адукацыі.
Для настаўніка, які выконвае функцыі класнага кіраўніка, — класны журнал, план ідэалагічнай і выхаваўчай работы класнага кіраўніка на чвэрць (паўгоддзе), сацыяльна-педагагічная характарыстыка класа (яна павінна падтрымлівацца ў актуальным стане на працягу года), дзённікі навучэнцаў і асабістая картка навучэнца.
Для педагога-арганізатара — план работы на чвэрць (паўгоддзе).
Для кіраўнікоў фізічнага выхавання ў гэты пералік увайшлі план фізкультурна-аздараўленчых і спартыўна-масавых мерапрыемстваў і палажэнне аб унутрышкольных спартыўных мерапрыемствах. Для педагогаў дадатковай адукацыі — журнал планавання і ўліку работы аб'яднання па інтарэсах і праграма аб'яднання па інтарэсах.
Самы аб'ёмны пералік абавязковай дакументацыі — у педагогаў-псіхолагаў, сацыяльных педагогаў і настаўнікаў-дэфектолагаў.
Нагадаем, што на пасяджэнні рабочай групы па комплексным аналізе сістэмы адукацыі Рэспублікі Беларусь кіраўнік рабочай групы, віцэ-прэм'ер беларускага ўрада Анатоль Тозік асобна спыніўся на праблеме вялікай колькасці папер, якія даводзіцца запаўняць педагогам. «Лічу, што мы маглі б неадкладна дэбюракратызаваць школу і забараніць умешвацца ў вучэбны працэс. Мы можам заканадаўча ўстанавіць мінімум дакументаў, якія павінен весці настаўнік, класны кіраўнік і адміністрацыя школы», — падкрэсліў Анатоль Тозік.
Надзея НІКАЛАЕВА
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».