Якасць дарожнага пакрыцця красамоўна кажа пра тое, наколькі паспяховай з'яўляецца краіна. Дарогі — не толькі прадмет нашага традыцыйнага гонару (што таксама немалаважна), але і, перш за ўсё, — найважнейшы элемент эканамічнай інфраструктуры. Будаўніцтва аўтадарог еўрапейскай якасці з выкарыстаннем інавацыйных тэхналогій — гэта адна з асноўных задач і візітная картка ААТ «Дарожна-будаўнічы трэст №3» г. Магілёва, аднаго з вядучых у краіне прадпрыемстваў дарожнай галіны.
Дарагія сябры!
Намі мадэрнізаваны сотні кіламетраў аўтамабільных дарог, унесены важкі ўклад у развіццё інфраструктуры ў сельскай мясцовасці. А наперадзе — новыя задачы і прафесійныя выклікі. У наша прафесійнае свята зычу ўсім нашым работнікам моцнага здароўя і, вядома ж, дабрабыту. Шчасця вам, дарагія калегі, узаемнай павагі і ўзаемаразумення ў вашых сем'ях, аптымізму — і новых дарог!
Генеральны дырэктар ААТ «Дарожна-будаўнічы трэст №3» г. Магілёва Рыгор Цімафееў
«Амаль усё робім уласнымі сіламі»
— Мы будаўнікі. Наша задача — будаваць, рэканструяваць, рабіць капітальны і бягучы рамонт дарог любой катэгорыі, — кажагенеральны дырэктар трэста Рыгор Цімафееў. — Але на сённяшні дзень наша прадпрыемства з'яўляецца шматфункцыянальным і выконвае поўны комплекс будаўніча-мантажных работ па ўзвядзенні, рамонце і рэканструкцыі не толькі транспартных аб'ектаў, але і розных інжынерных інфраструктур. Мы займаемся будаўніцтвам водаправодаў, каналізацыі ў гарадах нашай вобласці, ліній электраперадач на сваіх аб'ектах, выпускам вырабаў з жалезабетону і бетону, тратуарнай пліткі, бартавога дарожнага і тратуарнага каменю. На дарогах заўсёды ёсць шмат пытанняў па вынасе, пераносе, новым будаўніцтве, і мы амаль усё робім уласнымі сіламі.
Цяпер прадпрыемства гатова будаваць і капітальна рамантаваць за год ад 100 да 150 кіламетраў аўтамабільных дарог І-ІІІ катэгорый. А пачыналася яго гісторыя са стварэння ў Магілёўскай вобласці дзвюх машынна-дарожных станцый. Было гэта ў 1949 годзе. У 1969 годзе на іх базе быў створаны Дарожна-будаўнічы трэст №3, які ў 1996 годзе быў ператвораны ў адкрытае акцыянернае таварыства.
З тых часоў было пабудавана і рэканструявана нямала дарог. Сярод іх толькі за апошнія гады можна назваць такія значныя аб'екты як абход тэрыторыі Нацыянальнага парку «Белавежская пушча» (2011); рамонт аўтадарогі А-141 Бранск — Смаленск да мяжы з Рэспублікай Беларусь, абыход г. Бранск (2011); «рэканструкцыя аўтадарогі М-4 Мінск — Магілёў, км 131,336-140,7, км 140,7-150, км 160,5-167, км 182,0-188,8 (2012—2014); рэканструкцыя ўзлётна-пасадачнай паласы аэрадрома «Магілёў» (2013).
У мінулым 2013 годзе ААТ «Дарожна-будаўнічы трэст №3» г. Магілёва ўдзельнічала ў рэалізацыі буйнога праекта рэспубліканскага значэння па рэканструкцыі аўтамабільнай дарогі М-5 Мінск — Гомель на двух участках для генпадрадчыка Tоdіnі Соstruzіоnі Gеnеrаlі Sра (Італія). Сёлета прадпрыемства ажыццяўляе работы па рэканструкцыі аўтадарогі М-5/Е271 Мінск — Гомель на ўчастку Жлобін — Гомель для генпадрадчыка Сhіnа Rоаd аnd Brіdgе Соrроrаtіоn (Кітай).
***
З кожным годам задачы, якія стаяць перад прадпрыемствам, ускладняюцца. Сучасная Беларусь — вельмі матарызаваная краіна нават па самых высокіх еўрапейскіх мерках. Па 500 машын на тысячу жыхароў у некаторых рэгіёнах — гэта вельмі высокі паказчык. Масавая аўтамабілізацыя прад'яўляе да дарог павышаныя патрабаванні. Высокая якасць працы дарожна-будаўнічага трэста №3 г. Магілёва забяспечана і пацверджана ўкараненнем з 2005 года сістэмы менеджменту якасці (СТБ ІSО 9001-2009), кіравання навакольным асяроддзем (СТБ ІСО 14001-2005) і кіравання аховай працы (СТБ ІСО 18001-2009). А ў 2011 і 2012 гадах ДБТ №3 г. Магілёва быў удастоены дыплома лаўрэата Нацыянальнага конкурсу расійскіх будаўнікоў «Будмайстар» у намінацыі «Лепшая будаўнічая кампанія па якасці прадукцыі» (Расійская Федэрацыя, г. Масква).
Гатовы не толькі будаваць дарогі, але і ўтрымліваць іх
Сёння ААТ «ДБТ №3» г. Магілёва мае сваё прадстаўніцтва ў Маскве. У Расіі, у Арлоўскай вобласці працуе 37-е ўпраўленне прадпрыемства. «Каб быць больш запатрабаванымі, гэтай зімой дадаткова плануем падрыхтаваць спецыялістаў па вынасе газу і пераносу электрыкі да 500 Кв і атрымаць адпаведныя ліцэнзіі», — дзеліцца планамі генеральны дырэктар. Гэтыя меры дазволяць выйграваць тэндары ў краіне-суседцы і, адпаведна, прыносіць прыбытак роднаму прадпрыемству.
Сучаснае жыццё дыктуе жорсткія ўмовы. Для таго, каб эфектыўна выкарыстоўваць фінансавыя сродкі, неабходна па мінімуме прыцягваць на аб'екты субпадрадчыкаў. Таму на прадпрыемстве і навучыліся якасна выконваць не зусім уласцівыя для дарожнікаў работы. «Няма патрэбы аддаваць іх іншым арганізацыям, калі можна зрабіць самім», — лічыць Рыгор Цімафееў.
Дарэчы, дарожна-будаўнічы трэст №3, па словах Рыгора Цімафеева, гатовы не толькі будаваць і рэканструяваць дарогі на роднай Магілёўшчыне, але і ўтрымліваць іх. «Калісьці наш трэст утрымліваў 800 км рэспубліканскіх дарог, — кажа гендырэктар. — Для гэтага дастаткова стварыць эксплуатацыйныя ўчасткі ў філіялах таварыства».
Узяліся — выконваем!
Дарэчы, у Магілёўскай вобласці першымі прыступілі да будаўніцтва цэментнабетонных дарог. Гэта робіцца ў мэтах выканання даручэнняў Саўміна Беларусі па пераходзе на будаўніцтва дарог, тратуараў, аўтастаянак і іншых аналагічных аб'ектаў з цэментнабетонным пакрыццём.
Нельга адназначна сказаць, што гэта эксперыментальная праца. У Беларусі яшчэ ў 70-80 гады было пабудавана некалькі тысяч кіламетраў бетонных дарог. Так што практыка не новая для дарожнікаў, але цяпер будаўніцтва вядзецца з прымяненнем найноўшых тэхналогій, якія дарожна-будаўнічай галіне прыйдзецца асвойваць у тэрміновым парадку. Спатрэбіцца і падрыхтоўка спецыялістаў для будаўніцтва бетонных дарог. Але не ў правілах Рыгора Цімафеева здавацца. Рыгор Сямёнавіч кіруе ААТ «Дарожна-будаўнічы трэст №3» г. Магілёва з самага яго стварэння — ужо 18 гадоў! І ўсе гады яго карпатлівай і ўпартай працы былі накіраваны на дасягненне выніку, стварэнне канкурэнтных пераваг роднага прадпрыемства.
Будзе праца — будзе і зарплата, а значыць, усё добра будзе і ў сям'і
А самая галоўная канкурэнтная перавага і асноўнае багацце ААТ — людзі. «У нас добры кадравы склад, — не хаваючы гонару, кажа дырэктар. — Праедзьце па Магілёве, па нашай Першамайскай, паглядзіце, якую прыгажуню-вуліцу мы зрабілі! А для гэтага патрэбны спецыялісты. Мы беражліва ставімся да людзей, таму ў нас амаль няма цякучасці кадраў».
Тут не забываюць пра ўмовы побыту і адпачынку сваіх работнікаў. Капітальна адрамантаваны раздзявальні, душавыя, лазні, створаны камфортныя ўмовы для працы ў рамонтных майстэрнях, па-сучаснаму аформлены і аснашчаны офісы. На прадпрыемстве даўно зразумелі, што здаровы чалавек працуе лепш і з найменшымі парушэннямі тэхнікі бяспекі. Таму ААТ «Дарожна-будаўнічы трэст №3» мае дагавор з паліклінікай аб арганізацыі экспрэс-кантролю стану здароўя сваіх работнікаў.
На першым паверсе адміністрацыйнага будынка дзейнічае спартыўны комплекс з саўнай і басейнам, сучаснай трэнажорнай залай, абсталяваным памяшканнем для гульні ў більярд, настольны тэніс і інш. Праводзіцца зімовая спартакіяда, у якой бяруць удзел і кіраўнікі калектыву трэста і ўпраўленняў. Штогод спартсмены-аматары трэста паказваюць высокія вынікі і ўваходзяць у зборную работнікаў транспарту і дарожнай гаспадаркі краіны.
А што тычыцца працы... «Праца ў нас ёсць, і ў далейшым таксама будзе: мы выйшлі на будаўніцтва другой Мінскай кальцавой дарогі ў раёне Заслаўя — там ужо працуюць нашы хлопцы, — кажа генеральны дырэктар прадпрыемства Рыгор Цімафееў. — А будзе праца — будзе і зарплата, а значыць, усё добра будзе і ў сям'і».
Матэрыял падрыхтавалі Святлана БУСЬКО, Алена ДАЎЖАНОК. Фота Любові БЯЛЯЕВАЙ.
УНП 700049607
ГЭТА ЦІКАВА
Кіламетр беларускай дарогі каштуе каля 3 млн долараў.
Менавіта столькі каштуе кіламетр рэканструкцыі трасы Мінск — Магілёў. Але ў параўнанні з цэнамі на будаўніцтва дарог у Еўропе гэтая лічба не выглядае такой ужо велізарнай. Будаўніцтва дарог і падтрыманне іх у нармальным стане — ва ўсім свеце дарагое задавальненне. Так, будаўніцтва 1 кіламетра аўтабана ў Германіі ў сярэднім каштуе 10 мільёнаў долараў, а ў суседняй Польшчы — 7 мільёнаў. Бягучы рамонт дарог абыходзіцца ў 350-400 мільёнаў рублёў за кіламетр, а капітальны — да 1 мільярда рублёў.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».