Падыходзіць да завяршэння конкурс Белаграпрамбанка на лепшую аграэкасядзібу года. І пакуль эксперты будуць лічыць балы і падводзіць вынікі, «Звязда» распавядзе чытачам яшчэ пра дзве сядзібы. Гэтым разам мы выправіліся туды, дзе «вішнёвыя хаты глядзяцца ў шырокі Дняпро».
«Назаві хоць «Шэрай шыйкай»!
Калі б вы, стаміўшыся ад штодзённай гарадской мітусні, пажадалі правесці дзень на прыродзе, седзячы на беразе маляўнічага возера ў крэсле-качалцы з кнігай, кубкам гарбаты ці — чаму б не? — вудай у руках, то сядзіба «Шэрая шыйка», што знаходзіцца каля вёскі Палыкавічы пад Магілёвам, цалкам адпавядала б вашым памкненням.
Вада ў безназоўным возеры чыстая-чыстая, крынічная. Настолькі празрыстая, што можна назіраць за чародамі гарэзлівых рыбак у ёй. З забаў на сядзібе — не толькі рыбалка, але і паляванне. Ды якое! З падсаднымі качкамі, што, нібы мажныя пані, паважна плаваюць у ручаіне побач з возерам.
Як бачым, качкі тут у асаблівай пашане. «Назва сядзібы, якая нагадвае любімы многімі мультфільм, з'явілася абсалютна выпадкова», — расказвае гаспадыня «Шэрай шыйкі» Святлана Маханькова.
— Мы адкрывалі фермерскую гаспадарку, і для рэгістрацыі трэба было прыдумаць 10 назваў. Я запыталася ў мужа, а ён кажа: «Назаві, як хочаш, хоць «Шэрай шыйкай»!» Я запісала гэтую назву адной з апошніх, думала, да яе не дойдзе. Але выбар рабіў камп'ютар, і ён спыніўся менавіта на ёй!
Гаспадары «Шэрай шыйкі» змагаюцца за перамогу ў намінацыі «Лепшы старт» — наведвальнікаў тут прымаюць толькі з красавіка. Аднак пабывалі ў гэтым кутку ўжо госці з Расіі, Узбекістана, Арменіі — больш як паўмільёна чалавек. Заняцца ім тут ёсць чым: катанне на роварах, паходы на Днепр, экскурсіі па Магілёве, да якога адсюль рукой падаць. Сумаваць на сядзібе не давядзецца не толькі ўлетку, але і ўзімку. Напрыклад, калі паверхня возера пакрываецца лёдам, турысты з задавальненнем катаюцца на ім на каньках. Могуць госці і адправіцца ў лыжны паход альбо зладзіць сапраўднае катанне на запрэжаных канём санях з бомамі.
На двары, апроч маляўнічага прычала і альтанкі, стаіць лазня, папарыўшыся ў якой госці любяць сігаць у сцюдзёную азёрную ваду.
У доме надзвычай утульна і па-дамашняму — што не часта сустрэнеш на аграсядзібах. У цэнтры — вялікі камін, які ацяпляе два паверхі дома. Асаблівую атмасферу пакоям надаюць старажытныя бабуліны куфры і адрэстаўраваныя ложкі ў спальнях. У доме адначасова могуць размясціцца да 12 чалавек, а пражыванне без ежы на сядзібе каштуе 200 тысяч на чалавека за суткі.
«Мы нікому не адмаўляем»
А на сядзібу «Хутарок» у Мсціслаўскім раёне турысты прыязджаюць з... палаткамі. Пакуль што ў дыхтоўным драўляным доме з лазняй размясціцца на начлег могуць толькі 3—4 чалавекі, а ахвотных нашмат больш!
— Са Смаленскай вобласці прыязджала група ў 30 чалавек з палаткамі. Сказалі, што паспаць у ложках яны могуць і дома, — тлумачыць гаспадар «Хутарка» Сяргей Кавалёў.
Цяпер у працэсе «мадэрнізацыі» знаходзяцца яшчэ два спальныя пакоі на другім паверсе — іх плануюць адкрыць налета. І хоць справа ідзе не так хутка, як хацелася б, затое гаспадары будуюць усё за свае сродкі без прыцягнення крэдытаў. Але ж уладальнік настроены аптымістычна: хоць сядзіба зарэгістравана тры гады таму, але «па-сапраўднаму працаваць» пачала толькі сёлета, а значыць, лепшае — наперадзе.
Для турыстаў тут ёсць лазня на 8 чалавек, вялікая альтанка на 60 чалавек для правядзення свят. Неўзабаве каля самай сядзібы з'явіцца маляўнічае штучнае возера ў некалькі гектараў.
— Прадастаўляем гасцям човен — побач рака Віхра, дзе можна рыбачыць, — пералічвае гаспадар Сяргей Кавалёў рэчы, якімі можна заняцца на яго сядзібе, — водзім экскурсіі па Мсціславе і Мсціслаўскім раёне — у нас ёсць на што паглядзець!
Уся гэтая прыгажосць на суткі з чалавека каштуе 120 тысяч рублёў без харчавання. А калі госці жадаюць уключыць у свой адпачынак і ежу, то гаспадары прапануюць ім стравы беларускай кухні, прыгатаваныя ў печы. Праўда, кошт Сяргей Кавалёў назваць не бярэцца.
— Тут ужо чыстая імправізацыя: камусьці дастаткова простай ежы, а некаму патрэбны кулінарныя шэдэўры — ад гэтага і лічым.
Гаспадар з любоўю распавядае пра свае дрэвы і расліны, цешыцца нядаўна пасаджаным яблыневым садам.
— Да нас гэты ўчастак належаў селекцыянерам. У старым садзе ёсць яблыня, на якой адразу тры гатункі яблыкаў растуць! А грушы зімнія. Калі іх зняць да маразоў, да лютага захоўвацца будуць...
На пытанне, ці бываюць на сядзібе «праблемныя» турысты, Сяргей адказвае, што некалькі такіх чалавек было.
— Разумееце, мы нікому не адмаўляем, як і большасць гаспадароў сядзіб. Бывала, што і выпівалі звыш меры. Але такога, каб нешта ламалі ці разбівалі, яшчэ не было.
Дзіяна СЕРАДЗЮК.
Фота аўтара.
Магілёўская вобласць.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».