У Беларусі 86 тысяч кіламетраў дарог. Будуюць і абслугоўваюць дарожную сетку краіны каля 30 тысяч чалавек. І кожны з нас так ці іначай мае дачыненне да структуры дарожнага ланцужка — хаця б як карыстальнік аўтамагістраляў. Намеснік міністра транспарту і камунікацый Аляксей АЎРАМЕНКА распавёў, чым жыве дарожная галіна сёння і якім бачыцца яе далейшае развіццё.
25-23
— Аляксей Мікалаевіч, якімі дасягненнямі можа пахваліцца галіна за гэты год?
— Сёлета мы прадоўжылі маштабнае будаўніцтва дарог першай катэгорыі. Пачалі будаваць другую кальцавую дарогу вакол Мінска. Будаўніцтва разбіта на два этапы: першы — ад дарогі М3 Мінск — Віцебск да дарогі М6 Мінск — Гродна; гэты ўчастак будзе ўведзены напрыканцы наступнага года. Другі (ад М6 да дарогі М1 — Е 30 Брэст — Мінск — мяжа Расійскай Федэрацыі) павінен быць уведзены ў эксплуатацыю да 1 студзеня 2017 года. Таксама заканчваем работы на дарозе М5 Мінск — Гомель на ўчастку Жлобін — Гомель. Гэта таксама будзе дарога першай катэгорыі. Яе ўвод запланаваны ў лістападзе. Вядзём будаўніцтва дарогі Р23 Мінск — Мікашэвічы і аўтамабільнай дарогі да АЭС.
— Па тэрмінах паспяваеце?
— Так, мы працуем згодна з запланаванымі графікамі.
— А якія тэмы для галіны самыя балючыя?
— У першую чаргу, эксплуатацыя аўтамабільных дарог — гэта заўважаюць усе карыстальнікі. Бо ніхто не любіць ездзіць па ямах і бачыць перакошаныя знакі. Наша работа пастаянна навідавоку. Многія нас крытыкуюць — недзе справядліва, а недзе надумана. Цяпер фарміруем праграму па ўтрыманні і развіцці аўтамабільных дарог на наступную пяцігодку, дзе прапісваем асноўныя аб'екты будаўніцтва, мяняем падыходы па эксплуатацыі.
З 1 студзеня будзе заключаны дзяржкантракт, мы пераходзім на нарматывы ўтрымання, будзем удасканальваць сістэмы ўпраўлення і фінансавання.
А яшчэ чакаем зіму. Тады, асабліва калі пойдзе снег, клопату дарожнікам прыбавіцца і ўначы, і раніцай.
— Чым больш дарог — тым больш турбот для тых, хто іх абслугоўвае. А ці шмат новых магістраляў яшчэ з'явіцца ў краіне ў бліжэйшай перспектыве?
— У нас дастаткова развітая сетка. Па шчыльнасці дарог мы на першым месцы сярод краін СНД. Апроч другога кальца, плануецца будаўніцтва дарогі ў абход Пінска. Але ў нас шмат дарог, якія неабходна рэканструяваць: М6 Мінск — Гродна, М10 Кобрын — Гомель. Трэба скончыць М5 Мінск — Гомель на ўчастку Бабруйск — Жлобін і іншыя.
— Якія навінкі прымяняеце ў тэхналогіях будаўніцтва?
— Аднаўляем тэхналогію будаўніцтва бетонных дарог. У Беларусі іх будавалі да 1980‑х гадоў. Усяго іх у нас каля 1200 кіламетраў. І сёлета ўжо 3,5 км другой кальцавой пабудавана ў бетонным выкананні.
— Хочацца яшчэ закрануць новаўвядзенні. Больш за год у нас дзейнічае сістэма платных дарог BelToll. Наколькі яна сябе апраўдвае і ці можна ўжо казаць аб прыбытку ад яе?
— Усяго ў нас 1189 кіламетраў платных дарог і больш за 200 тысяч іх карыстальнікаў. Раней у нас была адна платная дарога М1 — Е30 са стацыянарнымі пунктамі аплаты, каля якіх машыны спыняліся і стаялі ў чарзе. Але паўстала пытанне аб укараненні прынцыпова новай сістэмы, якая дазваляла б скараціць час шляху і пазбегнуць затораў. І мы сумесна з аўстрыйскай кампаніяй і за кошт аўстрыйскіх інвестыцый рэалізавалі гэты праект. Таму мяркуецца, што першыя тры гады прыбытку ён прыносіць не будзе, бо мы павінны забяспечыць вяртанне інвестыцый.
Канешне, напачатку былі складанасці з уводам гэтай сістэмы, бо не ўсе разумелі, што гэта такое і як працуе. Але пакрысе кіроўцы прывыклі да яе і стараюцца не парушаць парадак аплаты, бо падмануць сістэму складана, ды і плата за парушэнне ў павялічаным памеры даволі сур'ёзная.
— Ці з'явяцца ў Беларусі новыя платныя дарогі?
— Па меры рэканструкцыі, як толькі набудуць адпаведную якасць, магістральныя дарогі будуць пераходзіць у склад платных. У бліжэйшы час гэта будзе дарога М5 Мінск — Гомель на ўчастку Жлобін — Гомель, пасля Бабруйск — Жлобін.
— Некаторыя кіроўцы, каб пазбегнуць платы, ездзяць аб'язнымі маршрутамі, гравійкамі, разбіваючы іх ушчэнт. Гэтае пытанне як-небудзь вырашаецца?
— Калі ёсць альтэрнатыўны маршрут, кіроўцы могуць ехаць па ім — гэта іх права. Толькі яны не павінны парушаць іншых правілаў дарожнага руху.
— Калі працягваць грашовую тэму, як фінансуецца дарожная сфера?
— Да 2008 года фінансаванне ажыццяўлялася за кошт дарожных фондаў. Цяпер іх няма, і дарожная гаспадарка жыве ў асноўным за бюджэтныя сродкі, якія ідуць на эксплуатацыю, бягучы і капітальны рамонт. На будаўніцтва і рэканструкцыю аўтамабільных дарог мы прыцягваем крэдытныя рэсурсы. Задзейнічаем крэдыты Банка развіцця, Сусветнага банка і крэдыты Эксімбанка Кітая. На наступны год запланаваная агульная лічба фінансавання дарожнай сферы складае 11,2 трлн рублёў, з іх 5,8 трлн — сродкі рэспубліканскага і мясцовага бюджэтаў, 5,4 трлн — крэдыты. На асобныя артыкулы плануем залічваць дзяржпошліну, плату за аўтамабільныя дарогі, збор з замежнікаў, плату за цяжкавагавыя і буйнагабарытныя транспартныя сродкі. Пасля гэтыя грошы (каля 2 трлн рублёў) будуць вяртацца на рамонт і ўтрыманне дарог.
— На што накіруеце сілы ў бліжэйшы час?
— Будзем рэканструяваць дарогі з абарончымі сеткамі пад новае абмежаванне хуткасці на некаторых участках у 120 км/г. Больш глабальнага будаўніцтва, апроч таго, што ідзе цяпер, не плануецца, таму будзем пераходзіць да абслугоўвання дарог і падтрымання іх у належным стане. Думаю, гэта асноўнае, чаго карыстальнікі чакаюць ад дарожнікаў. І, канешне, будзем працаваць над бяспекай дарожнага руху.
— А як будзе развівацца прыдарожны сэрвіс?
— У нас ёсць генеральная схема развіцця прыдарожнага сэрвісу. У гэты працэс задзейнічана шмат ведамстваў: запраўкі, гандаль, прыватныя кампаніі. Мы акрэслілі перспектыўныя ўчасткі, прадастаўляем пляцоўкі для будаўніцтва. Увогуле па асноўных дарогах аб'ектаў прыдарожнага сэрвісу ў нас дастаткова. Іх колькасць адпавядае еўрапейскім нарматывам, паводле якіх, напрыклад, заправачныя станцыі павінны стаяць праз кожныя 30 кіламетраў, пункты харчавання — праз 50. Так што неабходнасці ў павелічэнні колькасці няма. Бо што такое сёння праехаць 30 кіламетраў па добрай дарозе? Літаральна 25 хвілін язды. Таму трэба арыентаваць уладальнікаў аб'ектаў на тое, каб павышаць якасць і пашырацца, ствараць комплекс паслуг, каб у адным месцы канцэнтраваліся і заправачная станцыя, і гасцініца, і пункт грамадскага харчавання, і гэтак далей. Тым больш што ў нас па ўсіх дарогах размешчаны населеныя пункты, паблізу якіх можна развіваць такія аб'екты.
— Аляксей Мікалаевіч, завяршаючы гутарку, што б вы хацелі пажадаць калегам і ўсім карыстальнікам дарог Беларусі напярэдадні свята?
— Карыстальнікам, у першую чаргу, хочацца пажадаць бяспечных дарог. Я штораніцы чытаю зводкі ДТЗ і бачу, што кожны дзень гінуць людзі. І часцей за ўсё прычына гэтага — не стан дарог, а бесклапотнасць саміх людзей. А работнікам дарожнай галіны жадаю будаўніцтва і рэканструкцыі новых дарог, поспеху і дабрабыту.
— Дзякуй, з надыходзячым вас святам!
— Дзякуй вам!
Дзіяна СЕРАДЗЮК.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.