У тыднёвым спартыўным аглядзе «Звязда» распавядае пра страту Шарля Лінгле ў матчы «зуброў» з «Югрой», прэтэст мінскіх «Цмокаў» і поспех жаночай каманды БНТУ-БелАЗ у гандбольным Кубку кубкаў.
1.«Гомель» атрымаў першую перамогу на другім этапе чэмпіянату краіны па футболе, разграміўшы «Нафтан» (3:0). У сваю чаргу, для «Нафтана» гэтае паражэнне стала другім запар. А вось «Дняпро» і «Нёман» згулялі ўнічыю — 1:1. Першым вароты гродзенцаў паразіў Аляксандр Сазанкоў, але ў сярэдзіне другога тайма Павел Савіцкі зраўняў лік.
У другой шасцёрцы «Слуцк» у гасцях перайграў «Дынама-Брэст» — 2:0. Галы на рахунку Мікалая Зянько і японскага легіянера Ёсуке Сайта. З такім жа лікам мог скончыцца матч паміж «Белшынай» і «Мінскам». Але абаронца «гараджан» Раман Бегуноў паразіў уласныя вароты. Тым не менш мінчане, у якіх забівалі Нікола Лукіч і Леанід Ковель, атрымалі выніковую перамогу — 2:1.
2.Хакейнае «Дынама-Мінск» у гасцях разграміла хантымансійскую «Югру» — 6:2. Хет-трыкам адзначыўся Джонатан Чычу. Астатнія шайбы на рахунку Сяргея Дразда, Аляксея Калюжнага і Канстанціна Захарава. Для апошняга гэтая шайба стала першай у сезоне. Але лыжкай дзёгцю ў гэтым матчы стала страта Шарля Лінгле, які не змог вярнуцца на пляцоўку пасля бойкі з хакеістам «Югры» Аляксеем Пепяляевым. Урачы дыягнаставалі ў Лінгле траўму пляча, з‑за якой хакеіст можа прапусціць прыкладна месяц.
3.Баскетбольны клуб «Цмокі-Мінск» афіцыйна апратэставаў арбітраж матча з ВЭФам (70:71). Нараканні беларускага боку выклікала рашэнне не залічваць дакладны трохачковы кідок Бранка Міркавіча на 39‑й хвіліне пры ліку 68:66 на карысць гаспадароў. На думку рэферы, на момант атакі 24 секунды, якія былі адведзены «Цмокам» на валоданне мячом, скончыліся, аб чым сведчыў гукавы сігнал. Сітуацыя ўскладняецца тым, што суддзі не сталі карыстацца сістэмай відэапаўтору, хаця мелі магчымасць. Не паўплываў на вырашэнне спрэчнага моманту і камісар сустрэчы, які мог настаяць, каб суддзі скарысталіся відэапаўторам. Рашэнне па справе мінчан павінна быць прынята на працягу трох сутак. Калі яно не задаволіць кіраўніцтва «Цмокаў», беларусы змогуць апратэставаць яго ў Спартыўным арбітражным судзе. Адзначым, што зараз «Цмокі» займаюць перадапошняе 15‑е месца ў табліцы адзінай Лігі ВТБ.
4.Беларускі гандбольны клуб БНТУ-БелАЗ абыграў каўнаскі «Жальгірыс» у матчы ў адказ кваліфікацыйнага раўнда жаночага Кубка кубкаў — 28:23. У Мінску мацнейшымі былі таксама беларускі (32:20). Такім чынам, БНТУ-БелАЗ прабіўся ў 1/16 фіналу турніру, дзе сустрэнецца з нямецкім «Бломберг-Ліпі».
5.На 81‑м годзе пайшоў з жыцця заслужаны трэнер СССР, Расіі і Беларусі па лёгкай атлетыцы Аляксандр Рудскіх. З 1983 года больш за два дзесяцігоддзі ён узначальваў Беларускую федэрацыю лёгкай атлетыкі, дзесяць гадоў кіраваў нацыянальнай зборнай краіны, на працягу некалькіх гадоў узначальваў экспертны савет Міністэрства спорту і турызму. Пад яго кіраўніцтвам беларуская каманда дасягнула самых значных поспехаў у лёгкай атлетыцы. Так, на чэмпіянатах свету ў 1995 і 2003 гадах беларусы заваявалі па сем узнагарод. Прычым у 1995 г. беларуская зборная ў медальным заліку заняла другое месца ўслед за спартсменамі ЗША… Светлая памяць вялікаму трэнеру!
Дарына ЗАПОЛЬСКАЯ
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».