Уяўленні пра чужыя адносіны часам перашкаджаюць нам будаваць свае ўласныя і атрымліваць задавальненне ад іх. Нездарма многія мужчыны з падазрэннем ставяцца да жаночых «пасядзелак». Не, яны не хвалююцца, што там мы абмяркоўваем іх, сваіх абраннікаў. Яны перажываюць, што мы абмяркоўваем чужых — параўноўваем і зайздросцім! А потым вяртаемся дадому з лёгкай незадаволенасцю, якая пры «ўмелым» жаночым падыходзе можа сапсаваць настрой любому мужчыну. Але ж ці трэба гэта нам?
Вось самыя распаўсюджаныя міфы пра чужыя адносіны.
1. «Яны моцна закаханыя»
Дзе б ні знаходзіліся ваша сяброўка і яе бойфрэнд, яны трымаюцца за рукі, пяшчотна глядзяць у вочы адно аднаму і цалуюцца, не саромеючыся навакольных. А ваш абраннік нават за талію вас абняць на публіцы не хоча. Дакладна, ён ужо вас разлюбіў!
Можа, і так... Але, хутчэй за ўсё, ён проста іншы. Магчыма, яму не хочацца дзяліцца з пабочнымі людзьмі тым, што сапраўды важна для яго. І адкуль вы ведаеце, што прыяцель сяброўкі — не звычайны раўнівец, які «пазначае» тэрыторыю? Або не чалавек з дэманстратыўным тыпам асобы, якому важней паказваць навакольным сваё жыццё, а не пражываць яго?
2. «У іх столькі агульнага!»
Яны абое любяць футбол, аддаюць перавагу аднолькавым жанрам кіно, мараць аб дзецях або ўдзельнічаюць у рыцарскіх турнірах? А вы і ваш каханы — проста «неба і зямля».
Можа, і так... Затое вам вельмі цікава ўдваіх — заўсёды ёсць чым падзяліцца, пра што паспрачацца. Вы вучыцеся адно ў аднаго. Дарэчы, успомніце: калісьці вы спадабаліся адно аднаму — значыць, нешта агульнае ў вас ёсць. Магчыма, гэта «нешта» не ляжыць на паверхні: напрыклад, вы абое амбіцыйныя людзі або тайныя рамантыкі.
3. «Яны зусім не сварацца»
Сяброўка ні разу не скардзілася вам на паводзіны сваёй «паловы»: яны не б'юць талеркі, не грукаюць дзвярамі, не «з'язджаюць да мамы»... А вы з вашым мужам пастаянна штосьці «дзеліце». Напэўна, аднойчы вы пасварыцеся і ўжо не памірыцеся...
Можа, і так... Але, хутчэй за ўсё, сваркі — ваш спосаб «выпусціць пару» і знайсці рашэнне. Псіхолагі даўно высветлілі: «замоўчванне» праблем у адносінах паступова «забівае» гэтыя адносіны. А што датычыцца «ідэальных» стасункаў сяброўкі, то, можа, вам проста варта павучыцца ў яе правільна сварыцца — без бітага посуду і засмучанай мамы?
4. «Ён адгадвае ўсе яе жаданні»
І, вядома, бяжыць выконваць. А вашаму спачатку трэба 5 разоў намякнуць, потым 3 разы гучна сказаць, а потым яшчэ пераконваць, што без гэтых цудоўных зімовых боцікаў вам проста ніяк не абысціся. Значыць, ён вас не разумее...
Можа, і так... Але ж ён не экстрасэнс. Ведаеце, у прыродзе людзі з развітай інтуіцыяй сустракаюцца вельмі рэдка. Да таго ж важна не адгадваць вашы жаданні, а прыслухоўвацца да іх.
5. «Ён яе ўвесь час раўнуе»
Раўнуе — значыць кахае. А ваш абраннік нейкі падазрона спакойны...
Можа, і так... Але, хутчэй за ўсё, раўнуе той, хто няўпэўнены ў сабе. Або не ўпэўнены ў ёй. Або сам не бязгрэшны. Або ў зносінах не ўсё гладка...
Вядома, любой несвабоднай жанчыне прыемна бачыць праяўленне пачуццяў з боку каханага. Але ёсць мужчыны, якія могуць узняцца вышэй за свае слабасці. А гэта зусім не недахоп, праўда?
6. «Яны часта абмяркоўваюць свае адносіны»
А ваш мужчына нават гатовы пачаць шумна мыць посуд або пыласосіць, толькі б пазбегнуць шчырых гутарак. Напэўна, ён баіцца сур'ёзных адносін...
Можа, і так... Але, хутчэй за ўсё, ён — нармальны мужчына, настроены на вырашэнне праблем, а не размовы пра іх. Таму не псуйце настрой ні сабе, ні яму.
7. «Ён зусім не заглядваецца на іншых жанчын»
Ваш жа абавязкова кіне захоплены погляд на чужыя стройныя ногі, нават калі ў вас самой ногі як у супермадэлі. Мабыць, ён лічыць вас недастаткова прывабнай ці наогул — легкадумны...
Можа, і так... Але, хутчэй за ўсё, ён проста горш «маскіруецца», чым прыяцель вашай сяброўкі. Захапляцца (без задніх думак) іншымі жанчынамі для палігамных ад прыроды мужчын гэтак жа ўласціва, як для нас, жанчын, любіць прыгожыя туфлі.
8. «Ён пастаянна дорыць ёй кветкі і падарункі»
Вы ж атрымліваеце букет ружаў на 8 Сакавіка і падарунак на дзень нараджэння. Ён шкадуе на вас грошай, а значыць — разлюбіў...
Можа, і так... А магчыма, ён проста практычны. Як большасць мужчын, дарэчы. Калі ён ужо заваяваў вас, то навошта марнаваць грошы на букеты-цукеркі, калі можна купіць новы прас у ваш агульны дом?
9. «Дзеля яе ён кінуў курыць, пайшоў у спартзалу, стаў вегетарыянцам і да т.п.»
А ваш мужчына зусім не хоча мяняцца дзеля вас! Ні на маленечкую ўступку не ідзе, нават баевікі глядзець працягвае. Дакладна, не вельмі кахае!
Можа, і так... Але ён ужо дарослы чалавек, і мяняцца яму пазнавата. Людзі наогул мяняюцца з цяжкасцю, часцей — да горшага, яшчэ часцей — пад напорам абставін. Успомніце, ён жа спадабаўся вам менавіта такім, з недахопамі. Ды і вы таксама не дасканалая. Дык чаму не прымаць адно аднаго такімі, якія вы ёсць?
Вера ФЕМІНА
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».