Мастацтва як крок да праўды пра сябе
Сусвет плыве. Выгінаюцца лініі. Сціраецца мяжа адценняў і колераў. Яны прарываюцца ў свядомасць чалавека, імкнучыся рассунуць межы. Як мінімум — межы ўяўленняў пра мастацтва. Пра гармонію. Пра сэнс творчасці. У гэта ўключаецца, нібыта ўплывае, чалавек. Герой. Глядач. Аўтар.
Беларускі мастак Кірыл Хлопаў стварыў «Карціны свету, які плыве». І выставу так назваў, якая праходзіць у сталічнай галерэі «ЛаСандр-арт». Нібыта запрасіў у плаванне кожнага, хто гатовы да таго, каб рассунуць межы. Каб зразумець, што Сусвет — не нешта такое, што недзе, неяк і без нас. Каб стала зразумела: ён у кожным. Не, кожны чалавек — фактычна і ёсць злепак, мадэль Сусвету. Ці яго праява. Сусвет да канца і цалкам не пазнаны, так і чалавек да канца не можа ведаць сябе, тое, якія вобразы, формы і колеры затаіліся ў самых далёкіх і недасяжных куточках яго свядомасці і цялеснай сутнасці.
Аўтар у такое далёкае (можа быць, нават на ўсё жыццё) і рызыкоўнае (ніхто не ведае дакладна, што носіць у сабе і як яно можа праявіцца) плаванне запрашае з разуменнем справы. Кірыл Хлопаў, напрыклад, вось так разважае пра гэта: «Кожнаму чалавеку даецца талент і здольнасці як інструмент для самаўдасканалення і пазнання Ісціны. Жывапіс — мой інструмент і дапамога даведацца праўду пра сябе. Кожная карціна — гэта асабістая гісторыя вызвалення. Вызвалення ад ілюзій». Важна зрабіць крок насустрач невыноснай праўдзе пра сябе самога.
Калі ласка... Арт-псіхатэрапія ад Хлопава. Найпершы сродак у ёй — колер. Формы рэальнасці нібыта раствараюцца ў колерах. Колер можа быць сродкам вымярэння. Вы можаце спачатку задацца пытаннем: што гэта? Няўжо ў свядомасці такія размытыя формы? Няўжо ў ёй жывуць нейкія дзіўныя, часам вар'яцкія вобразы, проста сядзяць недзе там ціхенька да пары? Няўжо ад іх можна пазбавіцца і пераплыць у іншае вымярэнне? У Вялікае Зялёнае, як першапачатковую ваду для ўсяго... Час — з'ява адносная, а мастацтва гэта можа вельмі яскрава перадаць — праз абстрактныя работы.
Адметная рыса гэтага кірунку — яно ўмее рассоўваць межы. Яно ўмее рассоўваць межы ўяўлення пра мастацтва. І робіць магчымасці творчасці неабмежаванымі. Вось і мінчанін Кірыл Хлопаў, які пачынаў спасцігаць мастацтва паводле айчыннай школы ў вучэльні імя Глебава, гэта, відаць, уразумеў. Прынамсі, рассунуў межы для сябе як для творцы: ён удзельнічаў у міжнародных выставах, яго творы знаходзяцца ў прыватных калекцыях у розных краінах свету.
Ларыса ЦІМОШЫК
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.