У рамках адкрытага дыялогу "Моладзь Беларусі: традыцыі і будучыня", які абвясціла грамадскае абъяднанне "БРСМ", "Чырвонка" працягвае змяшчаць меркаванні маладых людзей з актыўнай жыццёвай пазіцыяй. Плануецца, што ўсе агучаныя ідэі, канцэпцыі, праграмы, стратэгіі і інавацыі ў сферы маладзёжнай палітыкі будуць акумуляваны для ўнясення прапаноў у рэспубліканскія органы дзяржаўнай улады. Тэмы, пытанні, праблемы і прапановы, узнятыя падчас правядзення адкрытага дыялогу, стануць асновай для вызначэння новага вектара ў рабоце з моладдзю - як з боку грамадскіх фарміраванняў, так і з боку органаў дзяржаўнай улады.
Вадзім ГРАЧОЎ, старшыня прафкама студэнтаў Беларускага дзяржаўнага педагагічнага ўніверсітэта імя Максіма Танка:
— Разглядаючы такое важнае пытанне, мы павінны ясна ўсведамляць, якая яна — сённяшняя моладзь. У параўнанні з папярэднікамі моладзь — іншая: не горшая ці лепшая, а зусім іншая. Сучасныя маладыя людзі больш дынамічныя, маюць больш канкрэтныя жыццёвыя мэты, таму і імкнуцца атрымаць усё і адразу. У эпоху імклівага развіцця інфармацыйнага грамадства, пастаяннага павелічэння аб'ёму самай рознай інфармацыі важна вельмі аператыўна і правільна рэагаваць на выклікі сучаснага свету. На мой погляд, сёння няма патрэбы ў стварэнні дадатковых дзяржаўных інстытутаў, якія б каардынавалі маладзёжную палітыку; магчыма, неабходна надаць адпаведны статус ці пашырыць паўнамоцтвы існуючых дзяржаўных інстытутаў, адказных за дзяржаўную маладзёжную палітыку. Нават само словазлучэнне «маладзёжная палітыка» падказвае, што гэта не толькі палітыка для моладзі, але і палітыка, якую менавіта моладзь павінна фарміраваць. А для гэтага нашы маладыя людзі павінны валодаць неабходнымі кампетэнцыямі. Асновай для эфектыўнай рэалізацыі маладзёжнай палітыкі павінна стаць, канешне, якасная адукацыя. І пачынаць трэба, безумоўна, з сістэмы сярэдняй адукацыі.
Апошнім часам у краіне шмат увагі надаецца школе. І пазітыўныя змены ўжо відавочныя. Напрыклад, вяртаецца профільнае навучанне на ІІІ ступені сярэдняй адукацыі. Гэта дазволіць юнакам і дзяўчатам яшчэ да заканчэння школы вызначыцца, што ім больш блізкае і цікавае, што спатрэбіцца ў будучыні. І не трэба гэтага баяцца, таму што за спробамі «ўпіхнуць» у школьніка ў рамках школьнай праграмы ўсё, што можна, мы ў выніку не дасягаем мэты. Неабходна ўжо ў дашкольным і падлеткавым узросце «пасеяць» у дзецях любоў да роднай мовы, гісторыі і культуры. А для гэтага неабходна стварыць беларускамоўнае асяроддзе для беларускай дзятвы, і ў першую чаргу вярнуць родную мову на тэлебачанне. Трэба зноў уключыць у школьную праграму прадмет «Айчынная і сусветная мастацкая культура», арганізоўваць бясплатныя наведванні вучнямі тэатраў і музеяў.
Патрабуюць перагляду адукацыйныя праграмы і на далейшых узроўнях адукацыі. Неабходна, каб яны адпавядалі патрабаванням інфармацыйнага грамадства, трэба прывіваць моладзі імкненне да асабістага ўстойлівага развіцця. Не трэба палохацца сярэдне- і доўгатэрміновых адукацыйных інвестыцый у моладзь. Трэба больш давяраць ёй і дазваляць самастойна вызначаць кірункі свайго развіцця. На жаль, досыць часта за шматлікімі яркімі забаўляльнымі акцыямі ці праектамі не прасочваецца, калі жадаеце, інтэлектуальная і сацыяльная глыбіня, якая павінна прысутнічаць з улікам патрабаванняў часу. У першую чаргу неабходна стварыць умовы, а таксама распрацаваць матывацыйныя меры для таго, каб маладыя людзі імкнуліся пастаянна павышаць свой прафесійны ўзровень. Нягледзячы на імклівае развіццё віртуальнай прасторы, дыстанцыйных метадаў навучання, неабходна зрабіць упор на трэнінгавую форму навучання, на практыкаарыентаванасць, у рэшце рэшт, на СЛОВА, таму што ўменне правільна будаваць узаемаадносіны паміж людзьмі базіруецца на ўменні валодаць словам.
Паспяховы малады чалавек, які мае якасную адукацыю і свядомую грамадзянскую пазіцыю, абавязкова створыць здаровую сям'ю, забяспечыць сабе годны заробак і адпаведныя сацыяльна-бытавыя ўмовы. Лічу, што галоўная задача прафсаюзаў у галіне маладзёжнай палітыкі — прывіць моладзі яснае ўсведамленне таго, што паспяховым нельга проста быць. Ім можна толькі стаць дзякуючы ўласнай упартасці і настойлівасці, эрудыцыі і працавітасці, камунікабельнасці і крэатыўнасці. Пераканаўся, што маладым людзям, якія не проста «былі» ў прафсаюзе, а сталі яго актыўнай часткай, прымалі самы непасрэдны ўдзел у рэалізацыі прафсаюзных ініцыятыў і праектаў, удаецца многае і ва ўласнай кар'еры.
Падрыхтавалі Надзея НІКАЛАЕВА і Тарас ШЧЫРЫ.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».