Такое, як на «Лістападзіку», — можна і без бацькоў. Напрыклад, са школьнымі сябрамі. Але лепш усё ж з бацькамі, таму што фільмы хоць і пра дзяцей, але ўсё адно пра іх узаемаадносіны з дарослымі ці пра тое, як свет дарослых уплывае на існаванне дзяцей. Гэта, хутчэй, сямейнае кіно, дзе і бацькі могуць пра сёе-тое задумацца і скарэктаваць у адносінах да сваіх дзяцей. А то сапраўды некаторыя дзеянні дарослых могуць выклікаць такое абурэнне малых… Такое…
[caption id="attachment_60704" align="alignnone" width="600"] Кадр з фільма «З ног на галаву».[/caption]
Як у фільме « З ног на галаву» нямецкага рэжысёра Файта Хельмера. Фактычна гэта паўстанне малых супраць дарослых, якія жывуць у горадзе Балерсвіле. Усё ў іх там прадумана да дробязяў і падпарадкавана галоўнай місіі — тэсціраваць прадукты. Так бы і было, калі б аднойчы малыя не сказалі: «Хопіць». І ўзялі ўладу ў свае рукі, змяніўшы (ці, правільней кажучы, перавярнуўшы з ног на галаву) звыклы ход жыцця. Не хочуць яны падпарадкоўвацца так, каб на іх нешта тэсціравалі. Як жа нейтралізаваць гэтых прагматычных дарослых? Вельмі лёгка!.. Крыху снатворнага — і ўлада ў руках. Малыя ў фільме — сапраўдныя малыя. Рэжысёр зняў шэсць чатырохгадовых дзетак у ролях галоўных герояў, што было даволі смела. Але мела вынік. Нават на «Лістападзіку» — менавіта гэты фільм больш за іншыя з конкурснай праграмы ўпадабала наша глядацкае журы. Дзіцячая аўдыторыя працу малых (і пра ўладу малых) ацаніла высока — у 3,80 бала. За гэта стужка «З ног на галаву» атрымала галоўны прыз «Золата «Лістападзіка». Ну якому малому не хочацца «прымераць» на сабе ролю бацькоў? Але іх улада пры дарослых усё ж канчаецца.
Нават на «Лістападзіку», дзе разам з глядацкім журы ёсць журы прафесійнае. А тут хочаш не хочаш, але прыходзіцца прыслухоўвацца да дарослых, якія вызначаюць лепшыя фільмы. Вось гэтыя дарослыя: эстонскі аніматар Яано Пылдва, малады рэжысёр Яўген Руман, які нарадзіўся ў Мінску, але ў дзіцячым узросце разам з бацькамі пераехаў у Ізраіль, дзе зараз плённа працуе, актрыса Вера Кавалерава, якую выдатна ведаюць наведвальнікі Тэатра юнага гледача і знаёмыя з айчыннымі фільмамі, дзе «зорка» сцэны здымаецца даўно і паспяхова. Гэтыя дарослыя абралі сваіх фаварытаў конкурсу — тыя фільмы, дзе паказаны дзеці ў нейкіх складаных сітуацыях, у тым ліку адносін з бацькамі і іншымі дарослымі, калі трэба нешта зразумець пра жыццё і загартаваць характар.
Прыз за лепшы фільм для дзяцей атрымала іранская карціна «Перліна» рэжысёра Сіруса Хасантура. Іранскае кіно адметнае найперш тым, што імкнецца даследаваць складаныя чалавечыя адносіны, робіць гэта з думкай абудзіць у людзях гуманістычны пачатак. Гісторыя дзяцей якраз тая, калі можна сказаць шмат. Дзеці гэтыя — дванаццацігадовы хлопчык Махер і яго маленькая сястра Махрок, якія з‑за хваробы бацькі сталеюць раней, чым трэба.
Бацька — гэта той чалавек, пра якога ўвесь час разважае дзяўчынка Лілу, якая жыве ў інтэрнаце. Яна галоўная гераіня фільма «Натуральныя навукі». Дзяўчынка не ведае, хто яе бацька, але вельмі хоча гэта высветліць. Гісторыя яе пошукаў прыцягнула ўвагу дарослага журы — карціна атрымала прыз «За лепшы фільм для юнацтва».
Але яшчэ адна стужка адзначана прафесіяналамі, нават двойчы. Дацкі фільм «Місія «Еўрабачанне» прыцягне ўвагу шматлікіх гледачоў сваёй назвай. Але адзначана дыпломам рэжысёрская праца Марціна Міз-Рэнара, таксама прыз «За лепшую дзіцячую ролю» атрымае Маліка Сія Граф. Фільм складаны тым, што разважае пра дзяцей, якія імкнуцца выбудоўваць адносіны адно з адным у мультыкультурным асяродку, дзе жывуць побач прадстаўнікі розных народаў, носьбіты розных рэлігій. Але дзеці ёсць дзеці: ім хочацца сябраваць, знаходзіць агульныя інтарэсы — у рэшце рэшт, пісаць песні для «Еўрабачання». Вядома, у фільмах, якія здымаюцца пра дзяцей, але здаецца, што пры гэтым яны скіраваны да іх бацькоў, дарослыя выконваюць важныя ролі. Таму ёсць яшчэ такі прыз — «За працу дарослага акцёра ў дзіцячым фільме». Яго прысудзілі акцёру Лі Бао Цянь за працу ў фільме «Салоўка».
У конкурсе дзіцячага кіно не было сёлета беларускіх стужак. Але ў рамках спецыяльных паказаў усё ж быў прадстаўлены новы фільм «Цімур і каманда» рэжысёра Наталлі Галузы. Фільм не толькі дзіцячы, ён сямейны. І наш. Хочацца верыць, што не апошні ў гэтай катэгорыі — Беларусь была вядомая цудоўнымі фільмамі для дзяцей, на якія можна было хадзіць з бацькамі. Будзе?
Ларыса ЦІМОШЫК.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.