У рамках адкрытага дыялогу «Моладзь Беларусі: традыцыі і будучыня», які абвясціла грамадскае аб'яднанне «БРСМ», «Чырвонка» працягвае змяшчаць меркаванні маладых людзей з актыўнай жыццёвай пазіцыяй. Плануецца, што ўсе агучаныя ідэі, канцэпцыі, праграмы, стратэгіі і інавацыі ў сферы маладзёжнай палітыкі будуць акумуляваны для ўнясення прапаноў у рэспубліканскія органы дзяржаўнай улады. Тэмы, пытанні, праблемы і прапановы, узнятыя падчас правядзення адкрытага дыялогу, стануць асновай для вызначэння новага вектара ў рабоце з моладдзю — як з боку грамадскіх фарміраванняў, так і з боку органаў дзяржаўнай улады.
Як утрымаць крэатыўную і перспектыўную моладзь у навуцы?
Аляксей ТРУХАНАЎ, намеснік старшыні Савета маладых навукоўцаў Нацыянальнай акадэміі навук, кандыдат фізіка-матэматычных навук, вядучы навуковы супрацоўнік НПЦ Нацыянальнай акадэміі навук па матэрыялазнаўстве:
— Апошнім часам усё часцей у нашай краіне сталі задумвацца пра ролю моладзі ў навуцы. Гэта не можа застацца незаўважаным маладымі людзьмі, якія хацелі б звязаць сваё жыццё з навукай. У Беларусі рэалізуецца Дзяржаўная праграма інавацыйнага развіцця на 2011-2015 гады, асноўным «рэсурсам» якой з'яўляюцца тыя ж маладыя вучоныя. Мяркую, што нікога не трэба пераконваць у тым, што творчы патэнцыял адукаванай моладзі, якая часта глядзіць на праблему нестандартна, можа адыграць у паспяховай рэалізацыі гэтай праграмы вырашальную ролю.Таму вельмі важна, каб маладыя людзі пасля атрымання вышэйшай адукацыі не проста ішлі ў навуку, але і заставаліся ў ёй.
Аднак сёння ёсць праблемы, якія стрымліваюць павелічэнне колькасці моладзі ў навуцы і зніжаюць працэнт тых, хто ў навуцы «затрымаўся». Можна вылучыць асноўныя пункты, выкананне якіх, на мой погляд, дапамагло б вырашыць гэтыя праблемы. Па-першае, знаёмства з навукай павінна пачынацца яшчэ за школьнай партай — гэта значыць, трэба займацца папулярызацыяй навукі сярод школьнікаў. Трэба наладзіць цесныя сувязі паміж навуковымі цэнтрамі і студэнтамі падчас іх навучання, а таксама актывізаваць гарызантальныя сувязі паміж самімі маладымі навукоўцамі. У моладзі, занятай у акадэмічнай і галіновай навуцы, павінна быць магчымасць бесперапыннага павышэння прафесійнага ўзроўню як у нашай краіне, так і на базе замежных навуковых цэнтраў. Але, самае галоўнае, каб кіраўнікі на месцах заўважалі і падтрымлівалі маладых навукоўцаў, у якіх ёсць моцная ўнутраная матывацыя для таго, каб ісці ў навуку і развівацца.
Для ахвотных развівацца ў навуцы трэба ствараць матэрыяльныя і сацыяльныя выгоды, аднак да выканання апошняга пункта трэба падыходзіць не фармальна, а з розумам. Дзяржаўная падтрымка павінна аказвацца той творчай моладзі, якая або ўжо праявіла сябе, або мае перспектывы і жаданне праявіць сябе на ніве айчыннай навукі і даказвае гэта сваёй штодзённай «ударнай» працай. На жаль, назіраецца трывожная тэндэнцыя, калі маладыя «вучоныя» трапляюць у навуковыя калектывы выпадкова, зусім не ўяўляючы сябе ў навуковай дзейнасці і загадзя ведаючы, што пасля заканчэння двух гадоў вузаўскага размеркавання больш з навукай іх нічога звязваць не будзе. Безумоўна, гэта вельмі «зручна» — атрымаць на размеркаванні «білет у навуку»: тут табе і магчымасць атрымаць працоўнае месца ў сталіцы (паколькі большасць цэнтраў акадэмічнай і ўніверсітэцкай навукі сканцэнтраваны менавіта ў Мінску), і магчымасць бесклапотнага існавання на працягу як мінімум двух гадоў (заканадаўства не дазваляе наймальніку звальняць маладога спецыяліста, які прыйшоў да іх па размеркаванні на працягу двух гадоў без сур'ёзнай прычыны), і абавязковае забеспячэнне жыллём (для іншагародніх выпускнікоў ВНУ наяўнасць якаснага і недарагога жылля ў сталіцы — важкі аргумент) з патэнцыяльнай магчымасцю будаўніцтва свайго ўласнага жылля (напрыклад, у Нацыянальнай акадэміі навук перыядычна будуецца жыллё для навуковых работнікаў). З іншага боку, вельмі шкада, калі таленавіты малады навуковец, які плённа працуе, вымушаны думаць пра вырашэнне жыллёвага пытання замест таго, каб скіраваць сваю энергію на вырашэнне фундаментальных і прыкладных навуковых задач.
Паколькі я з'яўляюся намеснікам старшыні Савета маладых навукоўцаў Нацыянальнай акадэміі навук, магу абапірацца на канкрэтныя факты. Летась мы правялі ананімнае анкетаванне сярод навуковай моладзі Акадэміі і высветлілі, што ёсць шэраг фактараў, якія стрымліваюць яе прыток у навуку. Але абсалютная большасць адзначыла, што перашкодай з'яўляецца не столькі памер заработнай платы (ад сябе хачу заўважыць, што многія маладыя вучоныя, якія вядуць актыўную навуковую работу, прымаюць удзел ці нават кіруюць выкананнем праектаў і прамых дагаворных работ, маюць зусім нядрэнную заработную плату), колькі вырашэнне жыллёвага пытання. Усё ж такі пражыванне ў інтэрнатах, нават камфортных, нельга параўнаць з пражываннем у асобнай кватэры — няхай і не ўласнай, а службовай.
Зараз у краіне рэалізуецца праграма па будаўніцтве арэнднага жылля. Добры прыклад сацыяльнай падтрымкі маладых навукоўцаў — узвядзенне жылога комплексу «Магістр» для адоранай і таленавітай моладзі ў сталіцы. Савет маладых навукоўцаў выйшаў з прапановай да Прэзідыума Нацыянальнай акадэміі навук, каб частку аплаты за арэнднае жылле браў на сябе працадаўца (акадэмічны інстытут). Паколькі менавіта кадры вырашаюць усё, пры размеркаванні кватэр павінен улічвацца «каэфіцыент карыснасці» маладога навукоўца для арганізацыі. Перспектыўных, працалюбівых і крэатыўных маладых супрацоўнікаў, якія сваімі ідэямі і энергіяй будуць прасоўваць айчынную навуку наперад, трэба абавязкова падтрымліваць і стымуляваць. Такім чынам адначасова будуць стварацца і «сігнальныя маякі», на якія змогуць раўняцца іх калегі...
Таленавіты? Маеш права на бонусы
Вольга Міцкевіч, першы сакратар Вілейскага раённага камітэта БРСМ:
— Мы просім разгледзець магчымасць укаранення ў краіне youth-card для адоранай і таленавітай моладзі, якая за дасягненні і высокія паказчыкі ў навуцы, культуры, спорце, грамадскім жыцці мела б магчымасць дзякуючы гэтым спецыяльным карткам атрымліваць зніжкі на білеты на розныя віды транспарту, арэнду аўтамабіляў, веласіпедаў, наведванне тэатраў, цырка, кінатэатраў і г.д. Гэта маглі б быць пераможцы і прызёры рэспубліканскіх конкурсаў, чые праекты працуюць, выдатнікі вучобы — за значныя дасягненні ў ёй. Кожны каледж, інстытут, універсітэт маглі б вылучаць такія кандыдатуры, калі маладыя людзі зрабілі нешта значнае для сваёй навучальнай установы: праславілі яе навуковай працай, публікацыяй. Чым будзе большы памер, тым лепш. З іншага боку, калі дасягненне юнака ці дзяўчыны прызналі на высокім узроўні, дастаткова было б і 5-працэнтнай зніжкі. У Еўропе, дарэчы, для студэнтаў існуюць спецыяльныя студэнцкія карткі, на якіх у іх трымальнікаў назапашваюцца бонусы за асабістыя заслугі. Гэтак жа можна было б зрабіць і ў нас. Укараняць такую сістэму заахвочвання трэба на дзяржаўным узроўні. Суб'ектам гаспадарання, якія будуць удзельнічаць у гэтай праграме і прадастаўляць таленавітай моладзі зніжкі, фінансавыя выдаткі на іх пагашала б дзяржава. У рэшце рэшт, праекты таленавітай моладзі працуюць на карысць краіны. У нас жа працуе сістэма грантаў!
Малады спецыяліст заслугоўвае большага
Ірына Дамаронак, першы сакратар Крупскага раённага камітэта БРСМ:
— Моладзь раёна выказалася за тое, каб на кіруючыя пасады вылучалася як мага больш маладых людзей. Прапануем заканадаўча замацаваць за прадпрыемствамі, заснавальнікамі якіх з'яўляюцца маладыя людзі да 31 года, права на льготнае крэдытаванне ці хаця б частковае вызваленне ад выплаты падаткаў тэрмінам, напрыклад, да аднаго года. І тут агучваліся розныя прапановы. Калі гаворка ідзе, скажам, пра прыватнае ўнітарнае прадпрыемства, значыць, даваць такую льготу на падаткі самому прыватніку. Калі пра маладзёжны калектыў — тады яго спецыялістам. У іх, як вядома, шмат розных праблем. Нехта хоча аўтамабіль, хтосьці — СВЧ або набор мэблі. Тых «пад'ёмных», якія выплачваюць маладым спецыялістам, не заўсёды дастаткова. Так, адзін з банкаў прапануе выгадны крэдыт, але толькі той моладзі, якая прыехала па размеркаванні ў іншы раён. А тым, хто вярнуўся ў свой, умоўна кажучы, да бацькоў, яго не атрымаць.
Мы абмяркоўвалі пытанне, каб членства ў БРСМ прыносіла маладым людзям большыя дывідэнды, чым цяпер. Пяціпрацэнтная зніжка на наведванне басейна ці «трэнажоркі» — гэта, безумоўна, здорава, але хацелася б больш рэальнай дапамогі. Зразумела, што на атрыманне дывідэндаў усе разлічваць не могуць. Проста быць членам БРСМ для гэтага недастаткова. Напрыклад, мы былі ў Растове-на-Доне, знаёміліся з досведам расіян. У іх, калі ты з'яўляешся членам Расійскага саюза моладзі і добра сябе зарэкамендаваў, існуе асобная чарга для маладых сем'яў па паляпшэнні жыллёвых умоў.
Падарыць сем'ям радасць бацькоўства
Ксенія Харашылава, першы сакратар Нясвіжскага раённага камітэта БРСМ:
— У Расійскай Федэрацыі прынята дзяржпраграма, згодна з якой бяздзетным сямейным парам, якія доўгі час стаяць на адпаведным уліку, робяць бясплатнае штучнае апладненне. У нашай краіне адчуваецца дэмаграфічны крызіс. На жаль, у апошні час колькасць бясплодных пар павялічваецца. Атрымаць лячэнне і зрабіць штучнае апладненне ў нас можна толькі на платнай аснове, і каштуе гэта немалых грошай — 20-30 мільёнаў рублёў. Канешне, пад гэтыя мэты нядаўна ўвялі крэдыт. Аднак трэба ўлічваць, што даход маладой сям'і, як правіла, не вельмі вялікі, ды і абжыцца, як кажуць, ёй трэба. Чаму б тады не пераняць практыку суседняй краіны?
Яшчэ адно пытанне ў гэтым жа кантэксце — узрост. Зараз усё большую папулярнасць набываць познія шлюбы. У яго можна ўступіць, напрыклад, у 30 гадоў. І пакуль выявіцца праблема з бясплоддзем, можа прайсці некалькі гадоў. За гэты час сям'я згубіць статус маладой, хаця фактычна — па колькасці праведзеных сужэнцамі разам гадоў — будзе заставацца менавіта такой. Таму нам падаецца, што трэба ўвесці пэўны прамежак часу (з улікам даты ўступлення ў шлюб, напрыклад, пяць гадоў), калі б людзі, сутыкнуўшыся з праблемай адсутнасці дзяцей, маглі скарыстацца бясплатным штучным апладненнем, ужо фактычна не будучы ў статусе маладой сям'і.
Падрыхтавалі Надзея НІКАЛАЕВА і Сяргей РАСОЛЬКА.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!