22 чэрвеня 1914 года імператар Мікалай ІІ зацвердзіў каштарыс даходаў і выдаткаў, які пераўтварыў мару аб адкрыцці ў Мінску настаўніцкага інстытута ў рэальнасць. А 21 лістапада — роўна сто гадоў таму — адбылося афіцыйнае ўрачыстае адкрыццё Мінскага настаўніцкага інстытута, на якім прысутнічала ўсё кіраўніцтва Мінскай губерні.
«Дваццатае стагоддзе нярэдка называюць... стагоддзем педагогікі. Сапраўды, ніколі педагагічная думка не працавала так інтэнсіўна, як цяпер, — сказаў падчас урачыстасці дырэктар інстытута Дзмітрый Сцяпура. — Ідзе сур'ёзны перагляд ранейшых сістэм, метадаў і прыёмаў навучання і выхавання, вызначаюцца новыя шляхі і плыні, ствараюцца новыя педагагічныя дысцыпліны».
Напярэдадні 100-гадовага юбілею Беларускага дзяржаўнага педагагічнага ўніверсітэта імя Максіма Танка мы сустрэліся з рэктарам, прафесарам Аляксандрам ЖУКОМ, каб даведацца, наколькі істотна адрозніваюцца задачы, што стаялі перад педагогамі сто гадоў таму, і тымі, якія вырашаюцца сёння, чаму перад настаўнікам больш не знімаюць капялюш і як прыцягнуць на педагагічныя спецыяльнасці лепшых...
IMG_9603
— На сустрэчы з удзельнікамі тэматычнай змены «Ад захаплення да педагагічнай прафесіі» ў «Зубраняці» вы сказалі, што вобраз настаўніка ХХІ стагоддзя амаль спісаны з пераможцы сёлетняга конкурсу «Настаўнік года — 2014». Што вы мелі на ўвазе?
— Віктар Жук трапіў у школу невыпадкова і зрабіў свой выбар свядома, маючы ўжо багаты жыццёвы вопыт: за яго плячыма былі на той момант вучоба ў прафесійным ліцэі, работа на будоўлі і служба ў войску. Дарэчы, педагагічную адукацыю ён атрымліваў у нашым універсітэце завочна. На працягу дзесяці гадоў будучы настаўнік гісторыі ўдзельнічаў у раскопках (разам з вучонымі з Акадэміі навук), у рыцарскіх турнірах, гістарычных рэканструкцыях. У школу прыйшоў пасля заканчэння ўніверсітэта і, як ён сам прызнаўся, увайшоў у клас гісторыкам, а выйшаў — настаўнікам. Ён па-сапраўднаму паглыблены ў сферу, якой займаецца. А тое, што ляжыць за межамі падручніка, як вядома, заўсёды выклікае ў дзяцей інтарэс. Чым вышэйшая эрудыцыя чалавека, тым ён больш цікавы ў зносінах. Раней школа была практычна адзінай крыніцай ведаў, цяпер жа гэта толькі адна са шматлікіх крыніц. Таму калі настаўнік (нават пры ўмове, што свой прадмет ён ведае дасканала) не арыентуецца ў сучасным жыцці, то рызыкуе страціць аўтарытэт у сваіх вучняў.
Сучасныя дзеці з камп'ютарам на «ты». І ў гэтым плане пераможца конкурсу «Настаўнік года» ад іх не адстае. Ён можа пракансультаваць сваіх вучняў у сацыяльных сетках, даць ім заданне...
«Я ведаю адзін помнік, каля якога заўсёды ў Дзень настаўніка ляжыць шыкоўны букет у выглядзе сэрца з чырвоных руж. Гэта помнік на звычайных сельскіх могілках, помнік маёй бабулі. Наш букет у Дзень настаўніка ніколі не бывае першым, хоць мы і прыходзім зранку. Першым сваю настаўніцу віншуе яе вучань Міця, як звала яго бабуля. Яму ўжо за шэсцьдзесят, ён бізнесмен, заўсёды неверагодна сур'ёзны і неверагодна заняты. Але кожны год знаходзіць час, каб вярнуць сваёй першай настаўніцы кавалачак сэрца, што калісьці атрымаў».
(сачыненне вучаніцы 10 класа Мар'інагорскай гімназіі Аліны БАКУНОВІЧ)
— Аляксандр Іванавіч, вы ўзначалілі ўніверсітэт незадоўга да старту ўступных іспытаў, аднак паспелі правесці магутную рэкламную кампанію, у выніку чаго былі запоўнены ўсе бюджэтныя месцы. Прызнайцеся, як вам удалося завабіць да сябе такую вялікую колькасць медалістаў?
— Мы не проста запоўнілі бюджэтныя месцы. Калі параўнаць з мінулым годам, то па большасці спецыяльнасцяў прахадныя балы павялічыліся на 25—70 пунктаў. Прыемна, што больш за чвэрць першакурснікаў — гэта выпускнікі ліцэяў і гімназій. Да таго ж да нас паступілі 100 медалістаў і выпускнікоў сярэдніх спецыяльных навучальных устаноў з дыпломам з адзнакай. У пяць разоў больш, чым летась! Па-мойму, гэта найлепшы адказ скептыкам, якія сумняваліся, што дазвол медалістам паступаць без уступных іспытаў спрацуе. Не буду ўтойваць, што 300 медалістаў атрымалі асабістыя запрашэнні ад рэктара падаваць свае дакументы ў Беларускі дзяржаўны педагагічны ўніверсітэт. Мы паслалі ім сігнал: у педуніверсітэце вас будуць рады бачыць. Да таго ж напярэдадні прыёмнай кампаніі нашы студэнты актыўна працавалі ў сацыяльных сетках, кансультавалі патэнцыяльных абітурыентаў...
20-42
— Настаўнікам трэба нарадзіцца або ім можна стаць, атрымаўшы педагагічную спецыяльнасць?
— Педагогіка — прафесія не для кожнага, і я ўпэўнены, што настаўнік «пачынаецца» не з педуніверсітэта — «гадаваць» будучых педагогаў трэба яшчэ ў школе. Трэба шукаць дзяцей з педагагічнымі схільнасцямі, з жаданнем вучыць іншых, з лідарскімі задаткамі, з уменнем камунікаваць і выстройваць зносіны з іншымі. Матывацыя да прафесіі — гэта, напэўна, самае важнае.
Лічу, што ўсім вышэйшым навучальным установам, дзе ёсць педагагічныя спецыяльнасці, трэба спускацца з нябёсаў на зямлю і ісці ў школы. Прычым пачынаць прафарыентацыйную работу неабходна з сярэдніх класаў, бо ў выпускным класе агітаваць за прафесію педагога ўжо позна. Трэба адраджаць педагагічныя класы і ствараць педагагічныя гімназіі — хоць бы па адной у кожнай вобласці. І даваць іх выпускнікам прэферэнцыі пры паступленні на педспецыяльнасці...
Мы распрацавалі цэлы пакет прапаноў для раённых аддзелаў адукацыі, пачынаючы з арганізацыі работы школ юных, школьных навуковых таварыстваў і заканчваючы дапамогай педагогам у падрыхтоўцы да алімпіяд і ЦТ. Аднаму ўніверсітэту без дапамогі школы не адшукаць здольных да педагогікі дзяцей. Менавіта настаўнікі павінны разгледзець у сваім вучні будучага калегу і даць яму блаславенне на вучобу...
«Чаму ж настаўнік — соль зямлі? Напэўна, таму, што здаўна людзі цанілі соль за адменныя якасці доўга захоўваць свежымі прадукты. Так і настаўнікі зберагаюць душы ад духоўнай гнілі. Як ежа без солі прэсная, так і сэрцы людзей застаюцца пустымі без «настаўніцкага» зерня».
(сачыненне вучаніцы 11 класа гімназіі № 1 г. Жлобіна Ірыны КРАЎЧАНКА)
IMG_9587
— А як вы патлумачыце наступны парадокс: усе бацькі хочуць, каб іх дзіця вучыў Педагог з вялікай літары, але не хочуць, каб іх дзеці паступалі на педагагічную спецыяльнасць?
— Спадзяюся, гэта часовая з'ява. Сёлета амаль трэць першакурснікаў БДПУ — выпускнікі ўстаноў адукацыі Мінскай вобласці. А з 240 сталічных школ на дзённую бюджэтную форму навучання паступілі ўсяго 109 чалавек. Давайце паспрабуем паглядзець на гэтую сітуацыю з іншага боку. Калі з кожнай школы (а іх у нашай краіне больш як 3 тысячы) да нас прыйдзе ўсяго па адным таленавітым вучні, то ўвесь прыём будзе якасным. Няпраўда, што моладзь зусім не жадае ісці ў педагогіку. Гэта міф, які мы павінны разбурыць. Трэба толькі ўбачыць гэтых дзяцей і правільна іх скіраваць. А бацькі не павінны перашкаджаць сваім дзецям у ажыццяўленні іх прафесійнага выбару.
Сёння прывабнасць нашай прафесіі знізілася ў немалой ступені з-за невысокіх заробкаў. Але ж не ўсё вымяраецца грашыма: добры спецыяліст ведае сабе цану і заўсёды выклікае павагу як у сваіх вучняў, так і ў іх бацькоў. Дарэчы, БДПУ сумесна з Міністэрствам адукацыі працуе над праграмай сацыяльнай падтрымкі настаўнікаў — ільготным крэдытаваннем, зніжкамі на інтэрнэт і мабільную сувязь, на білеты пры наведванні тэатраў і музеяў. Мы зробім усё для таго, каб настаўнік адчуваў сябе ўпэўнена і прафесія педагога зноў стала прэстыжнай.
— Ваша мара — стварэнне ў краіне педагагічных гімназій. Адкрыццё педагагічных класаў у 20-й сталічнай гімназіі — толькі першая ластаўка?
— Вельмі на гэта спадзяёмся. На базе 20-й мінскай гімназіі былі створаны чатыры педагагічныя класы фізіка-матэматычнага і філалагічнага профіляў для 104 вучняў. На працягу двух гадоў побач з настаўнікамі гімназіі заўсёды будуць прысутнічаць і выкладчыкі БДПУ. Яны будуць выкладаць гімназістам асобныя тэмы на паглыбленым узроўні, праводзіць факультатыўныя заняткі, рыхтаваць гімназістаў да ўдзелу ў алімпіядах, турнірах, конкурсах навукова-даследчых работ. Акрамя таго, выкладчыкі ўніверсітэта пазнаёмяць гімназістаў з асновамі педагогікі і псіхалогіі, дапамогуць ім выявіць і развіць іх здольнасці і, бадай што самае галоўнае — абудзіць інтарэс да прафесіі педагога. Важна своечасова зразумець — твая прафесія альбо не твая...
Акрамя таго, у нас ужо прайшла ўстановачная сесія вочна-завочнай педагагічнай гімназіі. Гэта новая структура, створаная на базе БДПУ. Яе работа разлічана на старшакласнікаў, зацікаўленых у атрыманні прафесіі педагога. Вочная форма прадугледжвае лекцыйныя заняткі ва ўніверсітэце, якія праводзяцца ў канікулярны час. Выкладчыкі ўніверсітэта будуць чытаць лекцыі па педагогіцы, псіхалогіі, сацыяльнай рабоце, раскажуць пра прамудрасці і нюансы педагагічнай прафесіі. А завочная (дыстанцыйная форма) навучання азначае самастойную работу з кантролем за поспехамі навучэнцаў з боку выкладчыкаў. А наступны наш крок — адкрыццё педагагічных гімназій у кожным абласным цэнтры.
«Усё ў школе будучыні будзе не так, як сёння. Усё па-іншаму! Я ўяўляю сабе прасторныя светлыя калідоры і класы. Гэта не зусім класы, а віртуальная прастора. Тут я магу аказацца ў любым месцы і ў любым часе, сустрэцца з філосафамі мінулага і паслухаць іх урокі, пагутарыць з Ньютанам ці Пушкіным, пасядзець на канцэрце Моцарта... Тут ёсць спецыяльныя зоны, дзе настаўнік і яго вучні могуць адпачыць на беразе віртуальнай рэчкі, паганяць мяч на зялёным лужку, паглядзець на ландшафты малавывучанай планеты. І побач з сабой я бачу Настаўніка, які ўсё ведае і ўмее, ласкавага і добрага — сапраўднага Настаўніка будучыні».
(сачыненне вучаніцы 10 класа гімназіі №1 г. Жлобіна Уладзіславы АНІСКОВІЧ)
— Сацыялагічныя апытанні, праведзеныя ў Расіі, сведчаць, што толькі 10 працэнтаў выпускнікоў педагагічных ВНУ гатовы працаваць у школе. Нашы суседзі збіраюцца ўвесці так званае партфоліа для маладых настаўнікаў, якое будзе ўключаць знешнюю ацэнку з боку выкладчыкаў навучальных устаноў, дзе студэнт праходзіў практыку. Мяркуецца, што гэтае новаўвядзенне прымусіць студэнтаў больш адказна ставіцца да праходжання педагагічнай практыкі... А як вы ацэньваеце эфектыўнасць практычнага складніка падрыхтоўкі студэнтаў у вашым універсітэце?
— Калі толькі 10% студэнтаў нацэлены на работу ў школе, то ўжо ніякае партфоліа не выратуе. Гэта значыць, што дзяржаўныя сродкі на падрыхтоўку будучых спецыялістаў былі змарнаваны. Упэўнены, што больш якасны адбор павінен быць яшчэ на ўваходзе ў педуніверсітэт. А для гэтага патрабуецца ранняя прафарыентацыя, яшчэ за школьнай партай...
Што тычыцца праходжання практыкі, то ў адукацыйных стандартах апошняга пакалення доля практыкі павялічылася з 10 да 15%. А з наступнага года мы распачынаем эксперымент на трох факультэтах (фізічным, матэматычным і прыродазнаўчым): практыка ў студэнтаў будзе распачынацца не з трэцяга курса, як цяпер, а з другога. Вучэбны план будзе складзены так, што адзін дзень на тыдзень будзе вольны ад заняткаў ва ўніверсітэце, і студэнты будуць праводзіць яго ў школе: наведваць урокі вопытных настаўнікаў, дапамагаць ім у праверцы хатніх заданняў, у падрыхтоўцы сродкаў навучання, удзельнічаць у пазакласнай рабоце, у тым ліку і ў шосты школьны дзень. Адным словам, паглыбяцца ў штодзённую школьную рэчаіснасць. Нават думаем ствараць міні-групы з навучэнцаў па тры-пяць чалавек, якія будуць рэалізоўваць падчас практыкі вучэбна-даследчыцкія праекты. Іх вынікам павінны стаць канкрэтныя практычныя распрацоўкі, якія могуць укараняцца ў вучэбны працэс ці ў выхаваўчую работу. Затым праекты могуць легчы ў аснову курсавых ці дыпломных работ і нават магістарскай дысертацыі. Галоўнае, што яны не будуць пыліцца на паліцах.
Марым таксама, каб нам аддалі дзіцячы садок, які адкрыўся нядаўна ў Студэнцкай вёсцы, дзе выхавальнікамі і псіхолагамі змаглі бы працаваць студэнты нашага ўніверсітэта.
— Напярэдадні юбілею ва ўніверсітэце было праведзена шмат цікавых мерапрыемстваў, напрыклад, конкурсы эсэ і відэаролікаў пра настаўнікаў. Ці парадавалі вас вынікі?
— На мой погляд, школьнікі зрабілі для папулярызацыі прафесіі педагога нашмат больш, чым беларускія кінарэжысёры, сцэнарысты і журналісты. Не магу прыгадаць нашумелага кінафільма, буйной мастацкай выставы, серыі артыкулаў у цэнтральнай прэсе або шырока разрэкламаванага ток-шоу, дзе б галоўным героем стаў менавіта настаўнік. Напярэдадні юбілею мы выпусцілі зборнік іх лепшых сачыненняў і зборнік відэаролікаў. Спадзяёмся запусціць «нарэзку» з лепшых ролікаў на адным з беларускіх тэлеканалаў... А скульптурная кампазіцыя «Настаўніца першая мая», устаноўленая на ўваходзе ва ўніверсітэт напярэдадні Дня настаўніка, не проста сустракае штодня нашых выкладчыкаў і студэнтаў, яна стала яшчэ і турыстычным аб'ектам. На галоўнай плошчы краіны пастаянна праходзяць экскурсіі, і сфатаграфавацца з настаўніцай стала ў турыстаў ужо добрай традыцыяй.
— А якім вы бачыце ўніверсітэт, скажам, гадоў праз 50? Ці зменяцца задачы, якія будуць стаяць перад педагогам?
— Сёння мы замахнуліся на новы віток у развіцці ўніверсітэта, прычым я маю на ўвазе не толькі стварэнне сучаснага адукацыйнага асяроддзя, перааснашчэнне матэрыяльна-тэхнічнай і вучэбна-лабараторнай базы, выкарыстанне інфармацыйных тэхналогій. Нам бы хацелася, каб тут нарадзіўся і новы дух, каб нашы выпускнікі былі запраграмаваны на поспех. Мы хочам фарміраваць сучаснага настаўніка, з захаваннем лепшых традыцый педагагічнай адукацыі і адначасова самадастатковага, упэўненага ў сабе прафесіянала. Каб ён разумеў сучасных дзяцей, а яны разумелі яго і бачылі, што ён «у тэме».
Місія педагога не змяняецца. Навучыцца абуджаць цікавасць да свайго прадмета і да навучання ўвогуле — адна з галоўных яго задач. Безумоўна, веды сучаснага настаўніка не павінны саступаць ведам яго папярэднікаў. Але на першае месца выходзіць яго ўменне наладжваць зносіны з вучнямі, а гэта значыць, камунікатыўныя здольнасці, уменне пастаянна вучыцца і вучыць гэтаму сваіх вучняў. Настаўнік перастае быць настаўнікам, калі перастае быць вучнем.
Гутарку вяла Надзея НІКАЛАЕВА
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.