Спаборніцтвы Еўрапейскага юнацкага алімпійскага фестывалю 2019 года ў Мінску ўпершыню пройдуць на арэнах топ-узроўню. На 43-й Генасамблеі ЕАК, якая адбылася днямі ў Баку, усе дэлегаты гэтага форуму аднадушна аддалі свае галасы нашай сталіцы. Такім чынам, летні ЕЮАФ-2019 (папярэдне мяркуецца, што ён пройдзе з 21 па 27 ліпеня) можа стаць не толькі іміджавым праектам для самога Мінска, але і для ўсёй краіны.
Як было агучана, большасць спаборніцтваў ЕЮАФ-2019 пройдзе на базе «Мінск-Арэна». У прыватнасці, тут сустрэнуцца баскетбалісты, дзюдаісты. Спаборніцтвы ў дзвюх дысцыплінах веласпорту (гонка на час і групавая гонка па шашы) таксама стартуюць у раёне «Мінск-Арэны». Групавую гонку плануецца правесці на шашы Мінск — Заслаўе з прыдатным для гэтага рэльефам і магчымасцю забяспечыць бяспеку.
Спаборніцтвы па спартыўнай гімнастыцы плануецца праводзіць у мінскім Палацы спорту, прычым у якасці разміначнай пляцоўкі можа быць выкарыстана малая арэна палаца. Гандбольны турнір прыме Футбольны манеж. Спаборніцтвы па плаванні гатовы прыняць два басейны алімпійскага ўзроўню — Палац воднага спорту і басейн Беларускага дзяржаўнага ўніверсітэта фізічнай культуры. Тэнісісты сустрэнуцца ў гарадскім цэнтры тэніса на вуліцы Жудро, валейбалісты — на «Чыжоўка-Арэне». Немалаважна, што спартсмены будуць пражываць непадалёку ад месцаў правядзення спаборніцтваў — у студэнцкай вёсцы на праспекце Дзяржынскага, якая ўжо была задзейнічана як фан-вёска падчас чэмпіянату свету па хакеі сёлета і якой засталіся задаволеныя ўсе ўдзельнікі спартыўнага свята.
Падрыхтоўка і правядзенне спаборніцтваў такога ўзроўню, безумоўна, павінна станоўчым чынам паўплываць на імідж не толькі Мінска, але і ўсёй Беларусі. Як і падчас правядзення нядаўняга чэмпіянату свету па хакеі, да нас прыедуць шмат спартсменаў, балельшчыкаў, якія найлепшым чынам змогуць перадаць інфармацыю пра знаходжанне ў нас, пра нашы гасціннасць і славутасці сваім сябрам, родным — з першых вуснаў. Апроч такіх доўгатэрміновых «капіталаўкладанняў», горад чакаюць і канкрэтныя фінансавыя папаўненні падчас правядзення спаборніцтваў — праз аплату паслуг гасцініц, грамадскага харчавання і г.д.
Сяргей СТАРЫНАЎ.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.