Старшыні саветаў грамадскіх пунктаў аховы правапарадку Магілёўшчыны абмяняліся вопытам.
Разам з намеснікамі гар- і райвыканкамаў яны прымалі ўдзел у семінары, які праходзіў на базе УУС Магілёўскага аблвыканкама з удзелам намесніка старшыні аблвыканкама Валерыя Малашкі і намесніка пракурора Магілёўскай вобласці Алега Пімашкова. Семінар пачаўся з павучальнага фільма пра тое, як дзяўчына Таццяна збілася з правільнага шляху і пакацілася ўніз па нахіленай. І калі б не своечасова праведзеная з ёй работа супрацоўнікаў міліцыі і грамадскасці, напэўна, справа скончылася б дрэнна…
Але Таццяна вярнулася да нармальнага жыцця і нават стварыла сям'ю. Спадзяецца, што хутка верне і сына, якога забралі з‑за шалапутнага жыцця. Героі гэтага фільма — тыя самыя людзі, з якімі працуюць саветы грамадскіх пунктаў аховы правапарадку (СГПАП). І тое, што існуюць такія вось гісторыі з «хэпі-эндам», дазваляе лічыць гэтую дзейнасць не дарэмнай.
Удзельнікі сустрэчы падзяліліся вопытам працы з «цяжкімі» катэгорыямі насельніцтва, разгледзелі пытанні па ўдасканаленні работы саветаў грамадскіх пунктаў аховы правапарадку, абмяняліся звесткамі аб узаемадзеянні ўчастковых і інспектараў па справах непаўналетніх з органамі мясцовага кіравання і самакіравання. Адзначалася, што такая праца аказвае моцнае ўздзеянне на грамадзян, прымушае іх перагледжваць сваё стаўленне да жыцця.
— На жаль, людзі, якія вядуць асацыяльны лад жыцця, ёсць у кожным населеным пункце, — канстатаваў намеснік начальніка УУС Магілёўскага аблвыканкама, палкоўнік міліцыі Сяргей Іваноў. — І агульная наша з грамадскасцю задача — дапамагчы ім знайсці працу, наладзіць побыт, а калі патрабуецца — аказаць уздзеянне адміністрацыйнага характару.
— Сёння праца саветаў грамадскага пункта аховы правапарадку трымаецца на органах унутраных спраў, — падкрэсліў першы намеснік пракурора Магілёўскай вобласці, старшы саветнік юстыцыі Алег Пімашкоў. — Проста гутарыць з парушальнікамі грамадскага парадку ўжо мала. Упэўнены, што лепшы СГПАП не той, дзе больш грамадзян знаходзіцца «на разглядзе», а той, на тэрыторыі якога менш за ўсё парушаюць закон.
Падчас семінара адбылося ўзнагароджанне старшынь трох лепшых СГПАП вобласці па выніках абласнога конкурсу УУС. Першае месца заняў грамадскі пункт № 11 Кастрычніцкага раёна Магілёва, другое — пункт № 3 Першамайскага раёна Бабруйска і трэцяе — Вяйнянскі СГПАП Магілёўскага раёна.
Дарэчы, на тэрыторыі Магілёўскай вобласці дзейнічаюць 204 саветы грамадскіх пунктаў аховы правапарадку. З пачатку года імі праведзена больш за 2000 пасяджэнняў, на якіх разгледжана каля 3000 спраў нядбайных грамадзян.
Нэлі ЗІГУЛЯ.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».