«Трэба ўмець прымаць рашэнні, бо яны — самае галоўнае ў працы. Трэніруйцеся рабіць гэта», — такую параду даў студэнтам і маладым спецыялістам Аляксандр Радзькоў, першы намеснік кіраўніка Адміністрацыі Прэзідэнта, падчас выступлення на абласным адукацыйным форуме «Брэстчына, накіраваная ў будучыню» для асоб, уключаных у перспектыўны кадравы рэзерв.
29-50
— Ужо дваццаць гадоў ідзе працэс усведамлення грамадствам незалежнасці нашай дзяржавы, — заўважыў Аляксандр Радзькоў. — Мы гэта яшчэ не да канца ўсвядомілі, бо наша пакаленне нарадзілася і вырасла ў Савецкім Саюзе. Вам жа гэта лягчэй, таму што многія з вас нарадзіліся ўжо ў незалежнай краіне. У гэтай сувязі нам трэба разумець, як вы будзеце фарміраваць палітыку краіны, ідэалогію.
Першы намеснік кіраўніка Адміністрацыі Прэзідэнта падчас свайго выступлення падкрэсліў, што на любым працоўным месцы пасля заканчэння навучальнай установы можна самарэалізавацца.
— Вы заўсёды маеце выбар: можна стаць класным прафесіяналам, а можна развіць арганізатарскія навыкі і стаць добрым кіраўніком, — заявіў Аляксандр Радзькоў, звяртаючыся да моладзі.
Першы намеснік кіраўніка Адміністрацыі Прэзідэнта прызнаўся, што яму было цікава браць удзел у форуме.
— Такія сустрэчы павінны быць, — лічыць ён. — Я адчуваю каласальную цікавасць да выступленняў, да рэакцыі ўдзельнікаў форуму, да іх пытанняў і каментарыяў. Дам вам параду: калі спадабалася чыя-небудзь думка, выказванне, прыклад — занатуйце. Гэта спатрэбіцца. Тут не тэарэтычная лекцыя. Тут — жыццё: прысутнічаюць прадстаўнікі розных сфер жыцця дзяржавы...
Канстанцін Сумар, старшыня Брэсцкага абласнога выканаўчага камітэта, паведаміў, што такія сустрэчы са студэнтамі і маладымі спецыялістамі праводзяцца рэгулярна і праходзяць на базе ўніверсітэтаў Брэсцкай вобласці.
— Перад пачаткам пленарнага пасяджэння мы пагутарылі з будучымі педагогамі, — расказаў кіраўнік Брэсцкай вобласці. — Хачу сказаць, што ў гэтай моладзі ёсць самае галоўнае — зацікаўленасць у атрыманні ведаў і імкненне рэалізаваць сябе ў будучай прафесіі. А гэта і ёсць асноўныя складнікі для таго, каб дабіцца добрых вынікаў у той справе, якую ты выбраў.
Паводле слоў Канстанціна Сумара, знайсці чалавека на кіруючую пасаду не так проста. Гэта не проста людзі, што вучыліся на «выдатна» ва ўніверсітэце. Вельмі важна, каб яны паказалі сябе добрымі, ініцыятыўнымі спецыялістамі падчас працы.
Удзельнік форуму 28-гадовы Яўген Быкоўчанка, намеснік старшыні па вытворчасці СПК «Крошын» Баранавіцкага раёна, лічыць, што падобныя мерапрыемствы даюць магчымасць маладым кіраўнікам і тым, хто можа ў перспектыве заняць кіруючую пасаду, атрымаць неабходны вопыт.
— Амаль усе мае калегі нашмат старэйшыя за мяне, у іх больш вопыту. Кожны дзень я чаму-небудзь вучуся ў іх, — расказаў Яўген. — На маю думку, сучасны кіраўнік павінен умець слухаць людзей і разумець іх. Да кожнага чалавека трэба ўмець знайсці падыход. Такія адукацыйныя форумы вучаць гэтаму нас, маладых кіраўнікоў.
Надзея ЮШКЕВІЧ
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».