Прыкмета часу: грошы на вецер можа кідаць толькі той, хто грабе іх лапатай. Усе астатнія стараюцца з розумам траціць. Напэўна, таму ў нашай краіне ўжо дзейнічае больш за 10 тысяч інтэрнэт-крам, з якімі супрацоўнічае РУП «Белпошта». А ў выніку... Мая прыяцелька, напрыклад, ужо не першы год на інтэрнэт-сайтах і ў каталогах (у тым ліку айчынных вытворцаў) знаходзіць нешта адметнае для сваёй сям'і, для сяброў, потым, не выходзячы з дому, замаўляе і чакае пасылак.
[caption id="attachment_62798" align="alignnone" width="600"] Прамень сканера беспамылкова знаходзіць штрых-код на бланках паштовых паведамленняў.[/caption]
Калі яны прыходзяць, вядома ж, не церпіцца хутчэй забегчы ў аддзяленне паштовай сувязі, атрымаць, распакаваць, агледзець абноўкі.
Знайсці пакет дапаможа сканер
Зрэшты, многім, скажам так, «дыстанцыйным» пакупнікам, выпрабоўваць сваю цікаўнасць такім чынам ужо не даводзіцца: атрымліваць і адпраўляць пасылкі цяпер можна хутчэй дзякуючы спецыяльным пунктам, якія паступова з'яўляюцца як у нашай сталіцы, так і ў іншых абласных гарадах.
Гэтыя ўстановы выглядаюць як звычайныя аддзяленні паштовай сувязі. Ды, па сутнасці, гэта тая самая пошта ў класічным разуменні.
У прыватнасці, у невялікае памяшканне на сталічнай вуліцы Русіянава, 36, куды завіталі журналісты «Звязды», сцякаюцца пасылкі і карэспандэнцыя для жыхароў усяго мікрараёна Уручча.
[caption id="attachment_62799" align="alignnone" width="600"] Выдачай паштовых адпраўленняў занята аператар Вікторыя Чарнак.[/caption]
Уздоўж сцен — стэлажы, на іх — пакеты розных памераў і колераў. Працуюць тры касы: дзве — для выдачы адпраўленняў і адна — для прыёму. Штохвілінна пікае сканер: рабочыя месцы спецыялістаў абсталяваны самымі сучаснымі тэхнічнымі і праграмнымі сродкамі. А таму абслугоўванне кліентаў ідзе спакойна і вельмі хутка: самая вялікая чарга, якую мы ўбачылі, сабрала шэсць чалавек і знікла на працягу дзесяці хвілін. Гэта, мабыць, самае прыемнае: для таго, каб атрымаць пасылку, цяпер не трэба стаяць у чарзе з ахвотных аплаціць камунальныя паслугі, мабільную сувязь, аўтамабільную страхоўку ці аматараў проста папрасіць у аператара: «Пакажыце ву-у-унь тую паштовачку... І яшчэ тую. І вось гэтую. А што ў вас ёсць яшчэ?..»
Як расказала намеснік генеральнага дырэктара па камерцыйных пытаннях РУП «Белпошта» Таццяна ГВОЗДЗЕВА, у Мінску адкрыты ўжо тры спецыялізаваныя пункты па прыёме і выдачы паштовых адпраўленняў, дзе любую карэспандэнцыю — хуткая пошта EMS, лісты, пасылкі, грашовыя пераводы — можна атрымаць ці адправіць за лічаныя хвіліны. Для зручнасці кліентаў пункты працуюць у будныя дні з 8.00 да 22.00, а ў выхадныя — з 9.00 да 20.00.
Асабліва адчувальная праца такіх вось пунктаў у перыяд аплаты камунальных паслуг, атрымання пенсій ды і проста ў вячэрні час, калі ў большасці працуючых з'яўляецца магчымасць зайсці на пошту.
[caption id="attachment_62801" align="alignnone" width="600"] Аператару Але Юртаевай на пошук пасылкі патрэбна адна хвіліна.[/caption]
— У тых аддзяленнях сувязі, адкуль мы, так бы мовіць, забралі адну з паслуг (па прыёме і выдачы паштовых адпраўленняў) зніжаецца нагрузка на аператараў, абслугоўванне кліентаў па іншых аперацыях ідзе хутчэй... У той жа час і тут ніякіх чэргаў няма, — распавядае намеснік начальніка вытворчасці «Мінская пошта» па эксплуатацыі Алена ПРАКАПЕНЯ.
Як атрымаць сваю пасылку ў спецыяльна вылучаным пункце? Гэтаксама, як і на звычайнай пошце. Спачатку, дачакаўшыся паведамлення аб тым, што пасылка ці бандэроль прыйшла, трэба звярнуць увагу на адрас пункта, дзе можна іх атрымаць. Потым, звярнуўшыся па сваё адпраўленне, перадаць аператару запоўнены квіток і ўласны пашпарт. Пры дапамозе спецыяльнага сканера аператар вызначае, на якім стэлажы і ў якім месцы ляжыць патрэбнае, забірае яго, пры неабходнасці прымае аплату за пакет і выдае кліенту.
— Пакуль што ў Мінску пункты па прыёме і выдачы паштовых адпраўленняў працуюць на вуліцах Адзінцова, Куйбышава і Русіянава. Але мы разлічваем адкрыць іх у кожным адміністрацыйным раёне, — дзеліцца планамі Алена Пракапеня. — А ўжо канкрэтная колькасць іх будзе залежаць ад аб'ёмаў. Калі, напрыклад, у Цэнтральным раёне дастаткова аднаго такога пункта, то ў Фрунзенскім, які актыўна разрастаецца, іх трэба адкрываць некалькі.
Якасць застаецца
У вышэйзгаданым пункце па вуліцы Русіянава людзей, якія хацелі б атрымаць ці адправіць карэспандэнцыю, мы заспелі няшмат. Магчыма, таму, што яны заходзілі і амаль адразу ж сыходзілі, трацячы на атрыманне паслугі адну-дзве хвіліны — не больш. У прыватнасці, у мужчыны сярэдніх гадоў мы пацікавіліся, ці даспадобы яму змены ў абслугоўванні.
— Мне трэба было адправіць некалькі лістоў. Я зрабіў гэта вельмі хутка, без ніякай чаргі, — прызнаўся ён.
Па пасылку завітала ў пункт і Наталля — маладая матуля з сынам.
— Я прыходжу сюды ўжо трэці раз. Атрымліваю, у асноўным, цацкі, нейкія рэчы для дзіцяці, ну і для сябе што-небудзь... Рада, што гэты пункт адкрыўся, бо абслугоўваюць вельмі ветліва, хутка...
Кажуць, у вячэрні час, калі наплыў кліентаў узрастае, сітуацыя крыху мяняецца. Але ж, па словах Алены Пракапені, ніякіх вялікіх чэргаў не ўзнікае і тады: аператары без цяжкасцяў выконваюць сваю працу.
Як прызнаюцца спецыялісты, павышэнне якасці абслугоўвання кліентаў, стварэнне камфортных умоў пры атрыманні паштовых адпраўленняў стала мэтай адкрыцця падобных пунктаў. Тут, на вуліцы Русіянава, штодзённа выдаюць па некалькі соцень пакетаў. Аб'ём зыходнай карэспандэнцыі пакуль што намнога меншы, аднак колькасць аперацый — як па выдачы, так і па адпраўцы — расце літаральна не па днях...
Падобныя ўстановы працуюць не толькі ў нас, але і ў іншых краінах. Разам з тым, на нашых пунктах пасылкі і любую іншую карэспандэнцыю можна не толькі атрымаць, але і адправіць. Што, пагадзіцеся, асабліва актуальна цяпер, напярэдадні калядных і навагодніх свят.
Дзіяна СЕРАДЗЮК
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.