У міжнародным конкурсе піяністаў у Мінску пазмагаюцца прадстаўнікі 11 краін.
Цудоўны момант, каб наталіцца гучаннем фартэпіяна. «Фартэпіяна» — так называўся конкурс напачатку, калі яго першы раз правялі ў 1996 годзе. Гэта гучна: прэстыж правядзення міжнароднага конкурсу ў нашай краіне падмацаваны яшчэ тым, што ён адбываецца раз у некалькі гадоў (далей у 2000, 2005, 2010 гадах), таму аматары музыкі яго сапраўды чакаюць. І гэта ціха: музыка, нават калі з'яўляецца для кагосьці момантам спаборніцтва, утварае інтымна-пачуццёвую прастору ў зале, дзе кожны слухач адчувае, што іграюць менавіта для яго. У прынцыпе, музыканты, нават калі маюць на ўвазе спаборніцтва, найперш выходзяць на сцэну дзеля таго, каб выступіць.
Гэта цудоўны момант, каб паслухаць музыку, калі ёсць на гэта час. Права адкрыць конкурс аддалі членам журы, якія 2 снежня выступілі на філарманічнай сцэне ў асобным канцэрце разам з Дзяржаўным акадэмічным сімфанічным аркестрам Рэспублікі Беларусь. Старшыня міжнароднага журы конкурсу — прафесар Беларускай акадэміі музыкі, народны артыст Беларусі Ігар Алоўнікаў. Але ёсць яшчэ прадстаўнікі беларускай фартэпіяннай школы: мастацкі кіраўнік Белдзяржфілармоніі Юрый Гільдзюк і Уладзімір Дулаў, лаўрэат міжнародных конкурсаў.
Цыкл конкурсных канцэртаў прадоўжыцца да 12 снежня. На ўсе выступленні праслухоўвання першага і другога тураў у залу Белдзяржфілармоніі можна трапіць абсалютна бясплатна. Слухаць ёсць што. У першым туры абавязкова гучаць толькі творы беларускіх кампазітараў: ад класікаў Станіслава Манюшкі, Напалеона Орды, Яна Тарасевіча да выдатных творцаў ХХ стагоддзя (Анатоля Багатырова, Генрыха Вагнера, Яўгена Глебава) і сучаснасці (Сяргея Картэса, Андрэя Мдзівані).
І слухаць ёсць каго: у конкурсе выступяць 50 музыкантаў ва ўзросце да 30 гадоў. Да фіналу, які заяўлены на 12 снежня, павінны дайсці толькі шасцёра.
Асобная падзея — канцэрт лаўрэатаў і закрыццё міжнароднага конкурсу піяністаў, які адбудзецца 13 снежня (вось на яго ўжо можна купляць квіткі). Урачыста, у вялікай зале Белдзяржфілармоніі, абвесцяць уладальнікаў прэмій. Першая падмацоўваецца сумай у 10 тысяч еўра, другая — 8 тысяч, трэцяя — пяць. Яшчэ тры прэміі па 2 тысячы еўра прадугледжаны для дыпламантаў. Пераможца выступіць у гэты вечар разам з аркестрам, уладальнікі другой і трэцяй прэмій сыграюць сола.
Мы маем на ўвазе, што збіраемся сачыць за спаборніцтвамі маладых музыкантаў свету, сярод якіх могуць быць і будучыя яркія «зоркі» ігры на фартэпіяна. Але заўсёды цікава паслухаць тых, хто прадстаўляе айчынную фартэпіянную школу, якая таксама выхоўвае выдатных музыкантаў. Праўда, на міжнародным конкурсе ў Мінску перамогу Беларусі здабыў ў 2000 годзе Аляксандр Музыкантаў. Сёлета нашу краіну прадстаўляюць больш за 20 маладых піяністаў, да якіх цікава прыглядзецца і прыслухацца. Хоць насамрэч для краіны важны сам факт правядзення міжнароднага конкурсу піяністаў, які б збіраў выканаўцаў высокага ўзроўню. Арганізатары, сярод якіх Міністэрства культуры Беларусі і Беларуская дзяржаўная філармонія, маюць на ўвазе адкрыццё новых яркіх імёнаў. З любой краіны. Але сваіх канкурсантаў падтрымаць усё ж варта. Няхай ім і сцены дапамагаюць.
Ларыса ЦІМОШЫК
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».