Дацэнты механіка-матэматычнага факультэта БДУ Віктар Каскевіч і Ігар Варановіч удастоены сертыфіката міжнароднага матэматычнага конкурсу для школьнікаў «Кенгуру». Такім чынам была адзначана іх работа па распрацоўцы і падрыхтоўцы матэматычных задач для гэтых спаборніцтваў. Першае месца дасталася матэматыкам з Германіі, другое — беларусам, а трэцяе — расіянам.
«Кенгуру» — гэта міжнародны матэматычны конкурс-гульня, які праходзіць пад дэвізам «Матэматыка — для ўсіх». Яго ідэя нарадзілася ў 80‑я гады ХХ стагоддзя і належыць аўстралійскаму матэматыку і педагогу Пітэру Халарану. Конкурс праходзіць у адзін тур, без адборачных спаборніцтваў, у адзін і той жа дзень у сакавіку, у адзін і той жа час, і ўяўляе сабой 30 пытанняў, размешчаных па ступені нарастання іх складанасці.
Беларускія школьнікі далучыліся да міжнародных спаборніцтваў у 1994 годзе. Зараз у конкурсе ўдзельнічаюць адначасова ўжо каля 5 мільёнаў школьнікаў з 2‑га па 11‑ы клас па ўсім свеце.
Вучоныя БДУ маюць вялікі вопыт работы па складанні задач для матэматычных алімпіяд рознага ўзроўню. Як правіла, усе гэтыя задачы з «разыначкай», яркай ідэяй і нечаканым вынікам. Пры гэтым заданні беларусаў рэдка з'яўляюцца лёгкімі. Інтэлектуальныя «прыдумкі» для «Кенгуру» высока цэняць аўстралійскія арганізатары. Распрацоўкі беларусаў не выкарыстоўваюць для элементарнага ўзроўню, а толькі для сярэдняга і складанага. І, часцей за ўсё, гэтыя задачы ацэньваюць па максімуме — у 4 і 5 балаў. Яшчэ адной аўтарскай асаблівасцю нашых матэматыкаў з'яўляецца суправаджэнне многіх заданняў малюнкамі і займальнымі ілюстрацыямі.
Задачы конкурсу рыхтуюцца загадзя краінамі-ўдзельніцам і дасылаюцца ў аргкамітэт на французскай і англійскай мовах. Усе дасланыя заданні друкуюцца ў спецыяльных буклетах. Усяго за апошнія шэсць гадоў для конкурсу «Кенгуру» было адабрана 115 беларускіх задач, складзеных матэматыкамі БДУ.
Надзея НІКАЛАЕВА.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».