Першую прэмію на Міжнародным конкурсе піяністаў у Мінску здабыў Андрэй Іваноў
Малады піяніст прыехаў па перамогу з Расіі — ён вучыцца ў Маскоўскай кансерваторыі (клас прафесара Наталлі Труль). Але прыехаў усё ж дадому: любоў да музыкі і штуршок да ўдасканалення свайго майстэрства ён атрымаў у Беларусі. Займацца на фартэпіяна пачынаў у музычнай школе Віцебска, потым вучыўся ў Рэспубліканскай гімназіі-каледжы пры Беларускай акадэміі музыкі. Вучыўся ў добрых педагогаў — яго выкладчыцай па фартэпіяна была Зоя Качарская. І першыя крокі Андрэя Іванова ў выканальніцкай кар'еры былі зроблены тут. Маладога музыканта адзначыў стыпендыяй Спецыяльны фонд Прэзідэнта Беларусі па падтрымцы таленавітай моладзі. Потым быў Рэспубліканскі адкрыты конкурс выканаўцаў фартэпіяннай музыкі «Мінск‑2010» і першая прэмія, далей поспех на VІ адкрытых маладзёжных Дэльфійскіх гульнях дзяржаў — удзельнікаў СНД у Ерэване. Усё гэта — сведчанне не толькі таленту самога музыканта, але і айчыннай фартэпіяннай школы, якую ён прадстаўляў. Але няма межаў для ўдасканалення — з думкамі пра гэта Андрэй Іваноў паехаў вучыцца ў Маскву. Ужо сёлета ён стаў лаўрэатам конкурсу ў італьянскім мястэчку Сачыле (адзначаны ІІІ прэміяй). Напрыканцы года 24‑гадовы музыкант з Беларусі нагадаў пра сябе на радзіме. І яна яго адзначыла не толькі званнем лаўрэата, але і грашовай прэміяй у памеры 10000 еўра. У фінале міжнароднага конкурсу піяністаў «Мінск‑2014» Андрэй Іваноў выступіў з канцэртам № 1 для фартэпіяна з аркестрам Чайкоўскага. Але ў першым туры (згодна з умовамі конкурсу) іграў беларускі твор — выбраў «Самбу» Яўгена Глебава ў транскрыпцыі прафесара, народнага артыста Беларусі Ігара Алоўнікава.
Сярод 50 музыкантаў, якія выступілі ў конкурсе ў Мінску, быў адзначаны яшчэ адзін выхаванец беларускай школы — Аляксандр Данілаў. Студэнт 2 курса Беларускай акадэміі музыкі (клас прафесара Юрыя Гільдзюка) стаў лаўрэатам ІІ прэміі. Праўда, на такую ж пазіцыю журы на чале з Ігарам Алоўнікавым паставіла і расіяніна Рамана Касякова. Лаўрэатам ІІІ прэміі стала Ганна Грот (Расія). Яшчэ адзін расіянін, Віталь Старыкаў, і прадстаўнік Украіны Анатоль Касцючэнка атрымалі заахвочвальныя прэміі і званні дыпламантаў. Лепшыя музыканты конкурсу мелі магчымасць сыграць у асобным канцэрце на вялікай сцэне Белдзяржфілармоніі.
Ларыса ЦІМОШЫК
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.