Вельмі вялікая колькасць мікраскапічных грыбоў можа паразітаваць у арганізме чалавека і жывёл. Грыбы могуць пашкоджваць скуру, валасы, пазногці, слізістыя абалонкі, розныя ўнутраныя органы. Як вынік — непрыемныя захворванні. Падрабязней пра тых, што пашкоджваюць скуру і яе прыдаткі — валасы з пазногцямі — расказвае загадчык амбулаторна-дэрматалагічнага аддзялення Мінскага гарадскога скурна-венералагічнага дыспансера Леанід КАСПЯРОВІЧ.
СКУРА. Заразіцца грыбамі можна пры цесным кантакце з хворым чалавекам або сабакам, катом, а можна і праз тыя прадметы і рэчы (ручнік, бялізну, мачалку і г. д.), якімі карыстаўся хворы, а таксама праз прадметы догляду жывёл. Нярэдка грыбамі заражаюцца дзеці ад тых жа бадзяжных катоў і сабак. Пачырваненні са смыленнем і лушчэннем могуць з'явіцца як на целе, так і на валасістай частцы галавы. Праз нейкі час могуць пацярпець і валасы — прычым волас можа пакутаваць як звонку, так і знутры.
Адным з шырока вядомых скурных пашкоджанняў з'яўляецца рознакаляровы лішай, пры якім пакутуе самы павярхоўны слой скуры. Ачажкі маюць круглую форму рознага памеру з колерам ад жоўтага да светла-карычневага. Пры патлівасці ачагі могуць злівацца ў вялікія плямы. Ультрафіялетавыя прамяні часткова вылечваюць ад гэтага захворвання, аднак, як правіла, не абысціся без мазяў і раствораў з супрацьгрыбковымі антыбіётыкамі.
Мікраспарыя, трыхафіція — гэта таксама плямы правільнай формы, чырвонага колеру, з лушчэннем. У гэтай лусцы знаходзіцца вялікая колькасць грыбоў, якая падчас купання можа разносіцца на іншыя ўчасткі скуры. Пры наяўнасці ачагоў на валасістай частцы скуры галавы, бровах валасы пачынаюць ламацца на вышыні 0,5–1 см (гэта ўжо стрыгучы лішай). Пакутуюць у асноўным дзеці, якія заражаюцца ад кацянят, шчанят, марскіх свінак і хамячкоў.
Лячэнне заключаецца ў працяглым мясцовым ужыванні супрацьгрыбковых прэпаратаў, якія прыгнятаюць размнажэнне грыбоў, прыёме супрацьгрыбковых антыбіётыкаў унутр.
ПАЗНОГЦІ. Часцей пашкоджваюцца ў людзей пажылых. У здаровыя пазногці грыбы не маюць шанцаў трапіць, бо ім патрэбны пэўныя ўмовы — каб пазногці былі рыхлымі, слаіліся. І такія ўмовы чалавек стварае з узростам, калі ў яго з'яўляецца атэрасклероз сасудаў. Пашкоджанне сасудаў пагаршае сілкаванне тканак, пазногці пачынаюць пакутаваць і становяцца лёгкай здабычай для патагеннага грыбка. А можа быць і так: некалі чалавек моцна траўмаваў пальцы нагі, пазногці. Праз нейкі час усё нібыта загаілася, аднак цыркуляцыя крыві ў пашкоджаным месцы ўжо не будзе ранейшай, што стане ў больш сталым узросце падставай для грыбковага пашкоджання.
Больш за тое, пасля 40–50 гадоў пад пагрозай такога заражэння будуць вялікі палец і мезенец у тых мужчын і жанчын, якія па маладосці насілі надта цесны абутак. Гэта звычайна прыводзіць да адмірання вельмі дробных сасудаў.
А як толькі пачынаюць пакутаваць дробныя сасуды рук і ног, то пазногці патаўшчаюцца, слаяцца, што і аблягчае пранікненне грыбоў. Спачатку пашкоджанне таксама можа ахапіць толькі скуру ступні, а пасля распаўсюдзіцца на пазногці нагі.
ВАЛАСЫ. Лушчэнне скуры на галаве (тое, што мы называем перхаццю) — гэта не абавязкова патагенны грыбок, які справакуе захворванне. Калі з'явілася перхаці звыш таго, што бывае звычайна, можна перыядычна (пару разоў на тыдні) карыстацца шампунем з дзёгцем або «Нізаралам» (ці іншым — з супрацьгрыбковымі рэчывамі). Гэта дапаможа палепшыць мікрафлору скуры, выдаліць не толькі грыбы, але і мікробы.
Як абараніцца?
1. Неабходна рэгулярна мыцца з мылам, карыстацца асобнымі ручнікамі для цела, ног і г. д.
2. Калі ногі моцна пацеюць, гэта павышае рызыку інфіцыравання, а таму варта 2–3 разы на тыдні праціраць пасля душу падэшвы воцатам.
3. Не насіць вузкі абутак і красоўкі з дрэннай вентыляцыяй, у якіх пастаянна пацеюць ногі.
4. Не насіць чужыя тапачкі.
5. Шкарпэткі мяняць штодня. Не надзяваць чужых шкарпэтак.
6. У лазні, басейне карыстацца сланцамі.
7. Асаблівыя меры засцярогі павінны вытрымліваць людзі з цукровым дыябетам, паколькі яны вельмі ўразлівыя для грыбковых пашкоджанняў.
8. Звярніце ўвагу на захворванні страўнікава-кішачнага тракту. Бывае, дастаткова пралячыць гастрыт, як і стан скуры галавы таксама паляпшаецца.
9. Звярніце ўвагу на харчаванне. Калі істотна абмежаваць тлустую ежу, гэта можа выклікаць дэфіцыт вітаміну А, адсюль будуць і крохкія пазногці. Для прыгожых валасоў, пазногцяў, скуры спатрэбяцца таксама вітамін Е, С, вітаміны групы В. Плюс мікраэлемент цынк.
Як вылечыць?
} Пры пашкоджанні толькі скуры патрэбны дэзынфікуючыя растворы, якія прыгнятаюць рост грыбоў.
} У ідэале неабходна пазбавіцца таго адзення, якім карысталіся падчас лячэння.
} Абутак пажадана апрацаваць унутры растворам воцату, фармаліну, пакінуць на нейкі час для поўнага выветрывання.
} Прымаць антыгрыбковыя антыбіётыкі ў таблетках у разліку на кілаграм вагі.
} Для вонкавай апрацоўкі пашкоджаных участкаў (з заходам на здаровую скуру) прымяняецца раствор і крэм экзадэрылу. Гэта не так агрэсіўна, як можа быць з апрацоўкай ёдам.
} Пажылым трэба мець на ўвазе, што працэс лячэння будзе марудным.
Святлана БАРЫСЕНКА.
Мерапрыемства праводзіцца на добраахвотнай аснове.
Не выявіць ні секунды абыякавасці.