У дзяцінстве гераіня гэтага матэрыялу круціла на лёдзе піруэты і марыла стаць фігурысткай. Але лёс распарадзіўся інакш — і канькі ўступілі месца тэніснай ракетцы. Цяпер Вера вельмі рэдка надзявае канькі, і тое толькі ролікі. Затое ў тэнісе шаснаццацігадовая дзяўчына ўжо дабілася пэўных поспехаў. Сёлета, напрыклад, выйшла ў парны фінал юніёрскага US Open. Чаму выпадковы тандэм аказаўся ўдалым, якое месца ў Нью-Ёрку самае прыгожае і як «блаславіць» спартсмена на чэмпіёнства, «Чырвонцы» распавяла адна з лепшых юніёрак краіны, тэнісістка Вера ЛАПКО.
— Акрамя US Open, які старт гэтага года ўспамінаецца часцей за ўсё?
— Камандны чэмпіянат свету, які праходзіў у Мексіцы. На ім мы занялі шостае месца, але, калі б не мае праблемы са здароўем, упэўнена, гэты вынік быў бы вышэйшым. Справа ў тым, што ў Лацінскай Амерыцы вада не лепшай якасці, там прысутнічаюць нейкія бактэрыі, якіх няма ў нас. І ежа ў Мексіцы спецыфічная... Хаця я старалася не піць звычайную ваду і ела толькі знаёмыя стравы, пазбегнуць атручэння не атрымалася. Прапусціла вырашальныя паядынкі, было вельмі крыўдна. Адчувала, што як першы нумар зборнай нічым не дапамагаю дзяўчатам.
— Ты ўпершыню была лідарам зборнай?
— Не зусім. Летась у беларускім рэйтынгу тэнісістак да 18 гадоў я была другой, але на нейкіх спаборніцтвах, дзе ўлічваўся еўрапейскі рэйтынг, выходзіла першым нумарам каманды. Неяк Іра Шымановіч (двухразовы прызёр другіх юнацкіх Алімпійскіх гульняў — Аўт.), калі мы разам выступалі за каманду, дзялілася са мной вопытам. Так што да цяжару лідарства я была падрыхтавана і ведала, як паводзіць сябе ў падобных сітуацыях.
— Дарэчы, тое, што на US Open побач была старэйшая сяброўка, дапамагала табе?
— Безумоўна! Я была вельмі рада, што мы з Ірай абедзве аказаліся ў асноўнай сетцы. Падчас спаборніцтваў жылі ў адным нумары, па вечарах, напярэдадні сваіх матчаў, вельмі шмат размаўлялі. Іра падтрымлівала мяне, бо я, напэўна, ніколі раней не адчувала такога хвалявання. Да таго ж настрой у мяне быў не самы лепшы. На падрыхтоўчых турнірах правалілася — не прайшла ніводнага раўнда. А ў Нью-Ёрку і кваліфікацыю «адзіночкі» пераадолела, і некалькі кругоў прайшла, і ў фінал «пары» трапіла.
— А раскажы, як склаўся ваш тандэм са славачкай Тэрэзай Міхалікавай?
— Дагэтуль разам у пары не выступалі. Але мы знаёмы з трынаццаці гадоў, сябруем. І так атрымалася, што неўзабаве перад US Open, на турніры ў Берліне, спытала ў яе: «Згуляем «пару»?» Тэрэза пагадзілася. На корце мы сапраўды атрымлівалі асалоду, а да вынікаў ставіліся з лёгкай іроніяй. Напэўна, гэтая лёгкасць і дапамагла нам дайсці да фіналу, хаця мы былі далёкія ад статусу фаварытаў. Цяпер вось рыхтуемся згуляць разам і на Australіan Open. Раптам гісторыя паўторыцца?
— Акрамя добрага выступлення на турніры, чым яшчэ запомніўся Нью-Ёрк?
— Вельмі ўразіла плошча «Тайм-сквер». Там неверагодна прыгожа! Пасля парнага фіналу мы адправіліся туды развітацца з горадам. А яшчэ добра памятаю, як хацела хутчэй выйграць апошні кваліфікацыйны матч, каб атрымаць акрэдытацыю, якая дазволіла б знаходзіцца ва ўсіх зонах тэніснага цэнтра. Выйграла — і тут пачалося раздолле! У адно імгненне тэнісныя «зоркі» сталі дасягальнымі. Так дзіўна было ў сталовай стаяць у адной чарзе з Анай Іванавіч ці Каралін Вазняцкі. Ды і проста пабачыць «жывых легенд» — Роджэра Федэрэра, Серэну Уільямс, Новака Джокавіча — дарагога каштуе.
— І з адной такой «зоркай» ты нават сфатаграфавалася, хаця юніёрам гэта забаронена...
— А яшчэ нам не дазваляюць праходзіць на трыбуны цэнтральных кортаў, але я ўсё роўна прабіралася паглядзець матчы прафесіяналаў (смяецца). Што тычыцца здымка, то сапраўды ў мяне ёсць фота з трыумфатарам сёлетняга US Open Марынам Чылічам (харвацкі тэнісіст, 9-я ракетка свету. — Аўт.). Назірала за матчам Іры, а на суседнім корце трэніраваўся Чыліч. Пасля трэніроўкі падышла да яго, папрасіла сфатаграфавацца. Пагадзіўся без праблем. Яшчэ і пацікавіўся, адкуль я і якіх поспехаў ужо дабілася «на юніёрах», пажадаў нам з Тэрэзай поспехаў у пары. Гэта, здаецца, было перад яго чвэрцьфінальным матчам. А пасля ён абыграў Федэрэра і ў выніку сенсацыйна выйграў турнір.
— Як так здарылася, што прыходу ў тэніс ты абавязана фігурнаму катанню?
— Ім я пачала займацца ў чатыры гады. Але праз два гады трэнеры сказалі бацькам, што гэты від спорту не для мяне: занадта высокая для «фігуркі». У дзяцінстве я сапраўды вельмі хутка расла, за год магла «дабавіць» 8-10 сантыметраў! Сышла, хаця было крыўдна, бо я лічылася перспектыўнай: вытрымлівала сур'ёзныя нагрузкі, была стараннай, гнуткай... У той час мой старэйшы брат займаўся тэнісам. Каб чымсьці заняць сябе, стала хадзіць да брата на трэніроўкі. А пакуль яго чакала, «набівала» мячыкам па сценцы. Так і пачаўся мой «раман» з тэнісам.
— А ў брата як спартыўная кар'ера склалася?
— Да пэўнага моманту ўсё было нядрэнна, на роўных канкурыраваў з лепшымі спартсменамі свайго ўзросту. А пасля, напэўна, змяніліся прыярытэты. Зараз ён увесь у нейкіх праектах, бізнесе, ракетку даўно не браў у рукі. Але час ад часу жартуе: «Вось пачну трэніравацца, і тады табе не паздаровіцца». А я ўсё чакаю, пакуль ён будзе гатовы мяне паспарынгаваць (смяецца).
— Ты вучышся ў дзясятым класе. Хутка трэба будзе вызначацца з паступленнем. Якія варыянты разглядаеш?
— Калі і далей буду дэманстраваць годныя спартыўныя вынікі, па традыцыі, пайду ў БДУФК. Калі спынюся ў развіцці ці раптам здарыцца нейкая траўма, тады буду думаць. У школе мне падабаюцца многія прадметы — ад літаратуры і гісторыі да матэматыкі і хіміі. Люблю пісаць сачыненні, магу хоць дзесяць варыянтаў за раз «настрачыць»! Адзіная навука, якая мне цяжка даецца, — гэта фізіка. Асабліва тады, калі з-за спаборніцтваў прапускаю якую-небудзь тэму. Пасля наганяю ў такіх пакутах!.. Хаця гэта для мяне нехарактэрна: звычайна ўсё атрымліваецца вельмі лёгка — за што ні вазьмуся. Але заўжды ёсць выключэнні.
— Раскажы пра свой звычайны графік на тыдзень?
— У мяне толькі адзін выхадны — нядзеля. У астатнія дні па тры трэніроўкі — напрыклад, дзве тэнісныя і адна па фітнесе. Некалькі разоў на тыдзень яшчэ крос, басейн ці саўна. Звычайна трэніровачны дзень заканчваецца гадзін у пяць вечара.
— У школе, зразумела, самастойнае навучанне. А на падлеткавыя радасці — сустрэчы з сябрамі, кіно, кнігі — час застаецца?
— Калі заканчваюцца трэніроўкі, магу сустрэцца з сябрамі. Ды і на фільмы-серыялы часу, насамрэч, таксама хапае. Нядаўна, дарэчы, пачала глядзець «Маладзёжку» — расійскі серыял пра хакеістаў. Пакуль падабаецца (усміхаецца). А вось чытаць неяк кінула. Але ўжо сама сабе паабяцала, што вярнуся да кніг. Бо часам бывае: чуеш слова і не разумееш, як яно пішацца. Уласны «слоўнік» трэба папаўняць пастаянна!
— Многія спартсмены карыстаюцца доўгімі пералётамі і чытаюць у дарозе...
— У самалётах я звычайна займаюся іншымі справамі. Часцей за ўсё проста адпачываю ці сплю. Часам праглядаю на тэлефоне старыя фоткі ці манцірую відэаролікі. Амаль што на кожных спаборніцтвах я нешта здымаю, шмат фатаграфую, а пасля раблю невялічкія ролікі. Як кажуць, для сябе, на памяць.
— Дык, можа, варта задумацца пра рэжысёрскую адукацыю?
— Не ўпэўнена, што мне зараз гэта патрэбна. Аднак як варыянт на будучае — магчыма. Прынамсі, гэта вельмі цікавы занятак. Але пакуль усе мае думкі толькі пра тэніс.
Дарына ЗАПОЛЬСКАЯ.
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.