Які дэпазіт лепш выбраць? Колькі працэнтаў па крэдыце трэба заплаціць? Як дасягнуць прыбытковасці? Адказы на гэтыя і іншыя пытанні шукалі не сямейныя дарослыя людзі, а звычайныя старшакласнікі. З усёй краіны іх сабралі разам у Нацыянальным банку, каб праверыць веды аб грошах.
Нядаўна Нацбанк і Міністэрства адукацыі зацвердзілі план мерапрыемстваў па супрацоўніцтве ў павышэнні фінансавай адукаванасці навучэнцаў. Прадугледжана, у прыватнасці, правядзенне штогадовых алімпіяд па фінансавай адукаванасці ва ўстановах агульнай сярэдняй адукацыі. Сёлета пераможцы раённых і абласных конкурсаў — больш за 20 юнакоў і дзяўчат — сталі ўдзельнікамі першай рэспубліканскай алімпіяды. Плануецца, што яна стане штогадовай. Пытанні будуць дапрацоўвацца з улікам сітуацыі ў фінансавай сферы.
Перад пачаткам спаборніцтваў старшыня праўлення Нацыянальнага банка Надзея Ермакова звярнулася да маладых людзей і сказала, што кваліфікаваныя эканамісты вельмі патрэбны як у банкаўскай сферы, так і на прадпрыемствах. А першы намеснік міністра адукацыі Вадзім Богуш адзначыў, што веды ў фінансавай сферы, як і знаёмства адно з адным, у любым выпадку спатрэбяцца ўдзельнікам праекта ў будучыні.
Прыемнай навіной для школьнікаў стала заява Надзеі Ермаковай аб тым, што пераможцы рэспубліканскіх алімпіяд па фінансавай адукаванасці могуць атрымаць прэферэнцыі пры паступленні на эканамічныя спецыяльнасці ў ВНУ. Пакуль гэта толькі планы, але арганізатары ўпэўнены ў верагоднасці прыняцця такога рашэння. Будучыя студэнты пасля такіх слоў значна ажывіліся і з энтузіязмам пачалі рашаць задачы алімпіяды. Як пасля высветлілася, удзельнікі ў цэлым добра выканалі заданні. Але былі і праблематычныя моманты. Напрыклад, усе ведалі, што пры куплі нечага ў інтэрнэце нельга ўводзіць ПІН-код карткі, а вось з тэрмінам «франшыза» ці «лізінг», відавочна, ім яшчэ не даводзілася сутыкацца. Некаторыя не ведалі, што тугрык з'яўляецца нацыянальнай валютай Манголіі.
У выніку пераможцам алімпіяды стаў брастаўчанін Дзмітрый Уснарскі. На другім месцы з маленькім адрывам ад пераможцы ішоў Глеб Несцяронак з Наваполацка. Трэцяе месца заняла Марыя Вольская з Брэста.
***
Зацверджаны Нацбанкам і Мінадукацыі план разлічаны на бліжэйшыя чатыры гады і закліканы ўкараніць элементы фінансавай адукаванасці ў вучэбную праграму. Сярод асноўных пунктаў — распрацоўка і рэалізацыя інавацыйнага праекта, накіраванага на фарміраванне фінансавай адукаванасці як адной з кампетэнцый вучняў устаноў агульнай сярэдняй адукацыі, правядзенне маніторынгу ўзроўню фінансавай граматнасці навучэнцаў. Плануюцца распрацоўка і выпуск вучэбна-метадычных дапаможнікаў па фінансавай адукаванасці, удзел у распрацоўцы настольных фінансава-эканамічных гульняў, стварэнне электроннай энцыклапедыі для навучэнцаў на Адзіным інтэрнэт-партале фінансавай адукаванасці насельніцтва http://www.fіngramota.by.
Уладзіслаў КУЛЕЦКІ.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.