У першым чытанні законапраект быў прыняты 19 снежня мінулага года — менш чым праз месяц пасля яго паступлення ў парламент. Аднак праца над карэкціроўкай закона вялася значна даўжэй — па сутнасці адразу пасля яго прыняцця ў 2011 годзе. Пра тое, навошта закон спатрэбілася змяняць і якім ён стане пасля прыняцця паправак, мы распыталі намесніка старшыні Пастаяннай камісіі Палаты прадстаўнікоў Нацыянальнага сходу Рэспублікі Беларусь па правах чалавека, нацыянальных адносінах і сродках масавай інфармацыі Аксану НЯХАЙЧЫК.
10-301
— Законапраект паступіў у Пастаянную камісію па правах чалавека, нацыянальных адносінах і сродках масавай інфармацыі 25 лістапада мінулага года, але першы яго макет быў накіраваны Нацыянальным цэнтрам заканадаўства і прававых даследаванняў яшчэ ў студзені 2014-га. На гэтай стадыі дэпутаты ўнеслі каля 30 заўваг і прапаноў. Прапановы паступалі таксама ад грамадзян, прадстаўнікоў мясцовай выканаўчай улады, міністэрстваў і ведамстваў. У выніку макет законапраекта змяняўся тройчы.
— Чым прадыктавана неабходнасць карэкціроўкі Закона «Аб звароце грамадзян і юрыдычных асоб»?
— Закон 2011 года патрабуе змянення ў сувязі з напрацаваным практычным вопытам па яго рэалізацыі, галоўным чынам — з укараненнем электронных зваротаў. Увесь гэты час паступалі прапановы і заўвагі ў тым ліку і ў нашу камісію. Для маніторынгу работы закона «Аб зваротах грамадзян і юрыдычных асоб» парламенцкая камісія правяла два выязныя пасяджэнні ў Астраўцы і Навагрудку. Такім чынам, тэкст, які паступіў у ніжнюю палату парламента ў лістападзе, стаў вынікам агульнай работы ўсіх зацікаўленых бакоў: і дэпутатаў, і дзяржаўных органаў, і грамадзян.
— Якія прапановы ад дзяржаўных органаў не былі падтрыманы?
— Не была падтрымана прапанова выключыць са сферы дзеяння закона звароты па атрыманне агульнадаступнай інфармацыі і звароты па тлумачэнні заканадаўства. Не падтрымана была прапанова аб выключэнні электронных зваротаў.
— Якія асноўныя новаўвядзенні прайшлі першае чытанне?
— Выключэнне са сферы дзеяння закона зваротаў, якія паступаюць ад членаў прафсаюза і іншых грамадскіх арганізацый. Канкрэтызацыя прычын адмовы службовай асобы ў асабістым прыёме або запісе на такі прыём грамадзяніну. Гэта прапанова паступіла ў парламент ад грамадзян яшчэ на стадыі абмеркавання макету законапраекта.
Прадугледжваецца права арганізацый і індывідуальных прадпрымальнікаў запытваць неабходныя для вырашэння пытанняў, якія выкладзены ў звароце, дакументы або прыцягваць заяўнікаў да разгляду зваротаў з выездам на месца.
На практыцы часта ў арганізацыі паступаюць ідэнтычныя звароты або дадаткі да ўжо накіраванага звароту, і тады ўзнікае пытанне: як у такіх выпадках адказваць — на кожны зварот асобна ці ўсім адразу? Законапраект дазваляе накіроўваць агульны адказ у тэрмін, які адведзены для першага звароту з аналагічных. Такім чынам, тэрміны не будуць зацягнутыя.
Удакладняюцца змест і дэталёвы алгарытм разліку выдаткаў, што могуць быць спагнаныя з заяўніка ў выпадку сістэматычных беспадстаўных зваротаў у адну і тую ж арганізацыю ці да аднаго і таго ж індывідуальнага прадпрымальніка, а таксама ў выпадку звароту, які мае загадзя ілжывыя сведчанні. Такая норма існуе ў дзеючым заканадаўстве, але не было канкрэтызацыі.
Праект закона прадугледжвае змяніць парадак разгляду электронных зваротаў. Гэта форма сябе апраўдала, яна актыўна выкарыстоўваецца беларусамі, але з ёй узніклі складанасці. Напрыклад, не заўсёды ёсць кантакты заяўніка, звароты могуць згубіцца сярод вялікай колькасці электронных пісьмаў. Таму прапануецца зрабіць абавязковым разгляд звароту, які паступіў праз спецыяльную рубрыку на афіцыйным сайце арганізацыі, а звароты, што прыйшлі па электроннай пошце, кіраўнік можа разглядаць на сваё меркаванне.
Праект канкрэтызуе патрабаванні да электроннага звароту па аналогіі з патрабаваннямі да пісьмовых: ён павінен змяшчаць інфармацыю пра месца жыхарства, прозвішча і імя заяўніка. Калі электронны зварот накіраваны не заяўнікам, а яго прадстаўніком, прапануецца прыкладаць электронныя копіі дакументаў, якія пацвярджаюць паўнамоцтвы апошняга. Для абароны персанальных дадзеных прадугледжана магчымасць прадубліраваць зварот у пісьмовым або вусным выглядзе.
Калі на сайт паступаюць аналагічныя звароты ад розных грамадзян, даецца магчымасць адказваць таксама праз сайт.
— Аднойчы на асабісты прыём да дэпутата парламента, куды быў запрошаны журналіст «Звязды», прыйшла жыхарка аграгарадка ў Мінскім раёне. Яна расказала пра замену даху ў шматкватэрным доме, дзе за дзень да заканчэння работ будаўнікоў перавялі на іншы аб'ект. У тую ноч моцны лівень заліў усе кватэры, сапсаваў сцены, мэблю, электраправодку. Высветлілася, што будаўнікі былі пераведзены на іншы аб'ект пасля «прамой лініі» з высокім абласным начальствам, якое паабяцала некаму з заяўнікаў хутка вырашыць яго праблему. Гэта сітуацыя мяне вельмі ўразіла. Ці не пераўтвараецца работа са зваротамі грамадзян у нашай краіне ў «паказуху» і ці прадугледжвае новы варыянт закона супрацьдзеянне падобнай практыцы?
— Сітуацыі, калі падчас асабістага прыёму грамадзян іх праблемы вырашаюцца за кошт інтарэсаў іншых людзей, дыскрэдытуюць уладу. Распрацоўшчыкі законапраекта, дэпутаты і юрысты пагадзіліся, што наспела неабходнасць правядзення сур'ёзнай вучобы прадстаўнікоў органаў улады, якія працуюць са зваротамі грамадзян. Гэта магло б выпрацаваць адназначны падыход да іх. Заўсёды ёсць суб'ектыўны фактар, і на паперы ўсё не прапішаш. Адзін лічыць, што адказаў па сутнасці, іншы з гэтым не згодны. Мае месца падыход «абы адпісацца», «абы ўкласціся ў тэрмін», а сітуацыя не вырашаецца. І калі заяўнік больш не звяртаецца, пра яе забываюць. На жаль, такое ёсць.
Трэба мяняць псіхалогію прадстаўнікоў дзяржаўных органаў. Не трэба бачыць ва ўсіх, хто звяртаецца, аматараў паскардзіцца. Калі пытанне можна было вырашыць на першасным узроўні, але яно даходзіць да больш высокага, то адбываецца тое, пра што вы расказалі: высокапастаўлены чыноўнік загадвае вырашыць яго без прамаруджвання. Аднак такога б не было, калі б праблема была знятая ў самым пачатку.
Прававая культура беларусаў расце, і прыйшоў час накіраваць работу са зваротамі ў канструктыўную плынь. У большасці выпадкаў людзі не патрабуюць ад уладаў немагчымага. Да таго ж людзі ў нас, у большасці выпадкаў, імкнуцца вырашыць свае праблемы самастойна.
Тым не менш права грамадзян на зварот у дзяржаўныя органы гарантуе артыкул 40 Канстытуцыі Рэспублікі Беларусь. Апроч таго, гэта адна з формаў рэалізацыі беларусамі свайго права на ўдзел у кіраванні справамі дзяржавы, якое замацавана ў артыкуле 37 Канстытуцыі.
Нарэшце, звароты з'яўляюцца важнай крыніцай інфармацыі для рашэння дзяржаўных пытанняў, сведчаць пра грамадскія працэсы і адносіны грамадзян да органаў дзяржаўнай улады.
Вольга МЯДЗВЕДЗЕВА
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.