Першыя энергаэфектыўныя крокі зроблены ўжо ў трох раёнах
У «чыталку» бібліятэкі Мар'інагорскага дома культуры цяпер можна смела вадзіць экскурсіі: на даху ва ўсю працуюць тры сонечныя панэлі агульнай магутнасцю ў 750 Вт, ад якіх сілкуюцца энергіяй камп'ютары. А яшчэ тут з'явіліся тры нэттопы — поўнафункцыянальныя «скрыні», якія замянілі старыя грувасткія сістэмныя блокі. Яны спажываюць энергіі ледзь не ў 10 разоў менш за звычайныя «сістэмнікі». Тры такія прылады атрымала і Мар'інагорская гімназія. Цяпер жыхары Пухавіцкага раёна змогуць на свае вочы ўпэўніцца, як працуюць новыя тэхналогіі.
Такім паказальным чынам у Мар'інай Горцы супрацоўнікі Цэнтра экалагічных рашэнняў падвялі вынікі праекта «Прасоўванне энергазберагальных тэхналогій і аднаўляльных крыніц энергіі на мясцовым узроўні», праца над якім вялася з 2012 года. Ён выконваўся пры падтрымцы міжнароднай сеткі ўстойлівай энергетыкі «ІNFORSE-Europe», Энергетычнага агенцтва рэгіёна Сконэ пры фінансавай падтрымцы Еўрасаюза і Шведскага агенцтва міжнароднага супрацоўніцтва ў галіне развіцця SІDA.
— Мы прапанавалі мясцовым адміністрацыям і зацікаўленай грамадскасці падумаць пра энергаэфектыўнасць на 10 гадоў наперад, — патлумачыў ідэю праекта супрацоўнік ЦЭР, каардынатар энергетычнай кампаніі Дзмітрый БУРОНКІН.
Так, паводле еўрапейскай стратэгіі «20-20-20», да 2020 года агульныя энергазатраты ў краінах ЕС павінны скараціцца на 20%, доля энергіі ад аднаўляльных крыніц мусіць вырасці да 20%, а ўзровень выкідаў вуглякіслага газу ў атмасферу таксама павінен скараціцца на 20%. Аднак, каб дасягнуць пастаўленых лічбаў, дзейнічаць трэба ўжо сёння.
Нагадаем, праект ажыццяўляўся ў трох эксперыментальных рэгіёнах Беларусі, выбраных на конкурснай аснове — Браслаўскім, Шчучынскім і Пухавіцкім. Спецыялісты Цэнтра экалагічных рашэнняў сумесна з інжынерамі кампаніі «ЭНЭКА» прааналізавалі ўзровень спажывання энергіі, адзначылі існуючыя праблемы і знайшлі патэнцыялы для развіцця акрэсленых тэрыторый. У выніку для іх былі распрацаваны доўгатэрміновыя планы энергаэфектыўных мерапрыемстваў, разлічаныя да 2020 года. Таксама была праведзена вялікая інфармацыйная праца з насельніцтвам.
Мерапрыемствы, закладзеныя ў планах, самі адміністрацыі лічаць перспектыўнымі — каму, як не ім, ведаць аб праблемах сваіх рэгіёнаў. Напрыклад, у пухавіцкай стратэгіі закладзена будаўніцтва біягазавага комплексу на ачышчальных збудаваннях, устаноўка водных геліянагравальнікаў для фельчарскіх пунктаў. Нэттопы для гімназіі і бібліятэкі і сонечныя панэлі — гэта толькі першыя крокі. Яны мусяць паказаць, што эканоміць энергію сапраўды можна не толькі на словах. А людзі пераканаюцца, што новыя тэхналогіі працуюць.
Цікавыя і дзейсныя мерапрыемствы праведзены і ў іншых рэгіёнах. На галоўнай вуліцы Шчучына заменена вулічнае асвятленне: тут з'явілася дзесяць ліхтароў са светадыёднымі лямпачкамі (дарэчы, беларускай вытворчасці), агульным коштам каля 50 мільёнаў рублёў. У Браславе на будынку Дзіцячай спартыўнай школы ўстанавілі сонечны калектар: у рэгіёне вялікая праблема з гарачым водазабеспячэннем. Ваду тут прывыклі награваць электрычнасцю.
— Мы імкнёмся не толькі забяспечыць энергаэфектыўнасць, а даць людзям камфорт, не наносячы шкоды наваколлю, — адзначыў Дзмітрый Буронкін.
Праект скончыўся, але на руках у адміністрацый трох рэгіёнаў засталіся распрацаваныя бізнес-планы. Цяпер мясцовыя ўлады зоймуцца пошукам інвестыцый для ажыццяўлення іншых энергаэфектыўных мерапрыемстваў.
У сваю чаргу, ЦЭР будзе дапамагаць рэгіёнам у кансультаванні і інфармаванні, працягне працу над стварэннем «зялёнага іміджу» іншых куткоў Беларусі.
— Мы бачым зацікаўленасць з боку мясцовай улады і насельніцтва, таму нам цікава працягваць супрацоўніцтва з рэгіёнамі, — падсумаваў спецыяліст. — Будзем старацца шукаць інвестараў для рэалізацыі іншых мерапрыемстваў.
Кацярына РАДЗЮК
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».