Пераезд Філіпенкі ў Іспанію, новы гулец зборнай Чарнагорыі ў складзе мінскага «Дынама» і малдаўскі віток у кар'еры Уладзіміра Жураўля. Карэспандэнт «Звязды» прааналізаваў актыўнасць айчынных камандаў на трансферным рынку.
БАТЭ згуляе з «Зенітам»
Барысаўскаму БАТЭ належаць пакуль самыя значныя зімовыя футбольныя навіны. Напачатку студзеня стала вядома, што абаронца Ягор Філіпенка на 2,5 года падпісаў кантракт з іспанскай «Малагай». Яшчэ перад новым годам барысаўчане паспелі падпісаць кантракт з былым паўабаронцам салігорскага «Шахцёра» Аляксеем Рыасам, а пасля — з Максімам Жаўнерчыкам, які вярнуўся на радзіму з краснадарскай «Кубані». А зусім нядаўна чэмпіён правярнуў вельмі добрую здзелку. У родную каманду вяртаецца Ігар Стасевіч, лепшы футбаліст мінулага першынства краіны. Многія чакалі, што ён працягне гуляць за мінскае «Дынама», але футбаліст вырашыў іначай. Нехта са сталічных балельшчыкаў нават паспеў пакрыўдзіцца на Стасевіча. Маўляў, прамяняў аднаго флагмана на другога з-за грошай. На гэта Стасевіч адказаў, што фінансы на пераход не паўплывалі, і ў Барысаве ён будзе зарабляць нават менш, чым мог у «Дынама». Усё ж такі трэба разумець: у БАТЭ прайшла самая паспяховая частка кар'еры футбаліста. Разам з барысаўчанамі Ігар 5 разоў заваёўваў «золата» роднага чэмпіянату, пракладваў дарогу ў Лігу чэмпіёнаў і забіваў славутаму італьянскаму «Ювентусу». Мы ўпэўнены, ён яшчэ збіраецца адрадзіць тыя прыемныя імгненні.
Тым часам каманду пакінулі Анры Хагуш, які працягне кар'еру ў тульскім «Арсенале», сербскі абаронца Неманья Тубіч. 30-гадовы балканец яшчэ летам мог апынуцца ў славутым белградскім «Партызане», дзе і пачынаў кар'еру. Але тады так і не дамовіўся з кіраўніцтвам. Аднак цяпер відаць, што яны паразумеліся. Не будзе ў камандзе Аляксандра Ермаковіча і каларытнага татуяванага ўкраінскага форварда Андрэя Якаўлева. Яго новым клубам стаў самарскі «Сокал», а латыш Герман Маліньш не стаў асноўным варатаром «жоўта-блакітных» і вярнуўся ў рыжскі «Сконта».
Сёння каманда знаходзіцца на першым трэніровачным зборы ў турэцкай Антальі. 30 студзеня БАТЭ правядзе спарынг з піцерскім «Зенітам», а 4 лютага — са славенскім «Марыборам». За час збору трэнерскаму штабу паспрабуе спадабацца 24-гадовы цэнтральны латышскі абаронца Каспарс Дубра.
Па збегу абставінаў на свой першы збор барысаўчане ў Турцыю ляцелі ў адным самалёце з мінскім «Дынамаё. Але на гэтым агульныя моманты ў падрыхтоўцы лідараў нашага футбола да новага сезона пакуль вычэрпваюцца. У галоўны клуб сталіцы зноў прыйшлі перамены. Новым галоўным трэнерам стаў чэх Душан Угрын. Дапамагаць яму ў працы з камандай будуць серб Любіша Ранкавіч і румынскі трэнер варатароў Драгаш Піку. Закранулі змены і адміністрацыйны склад клуба. Так, генеральным дырэктарам стаў... Алім Селімаў, славуты барэц, двухразовы чэмпіён свету. Па трансферных навінах мінчане пакуль саступаюць БАТЭ. Зараз можна казаць толькі пра страты і адзін падпісаны кантракт. Дакладна не будзе ў Мінску французскага форварда Франка Джа Джэджэ. Ён ужо падпісаў дагавор з шатландскім «Хіберніянам», паспеў дэбютаваць за новы калектыў і нават атрымаць траўму. Вярнуўся ў Паўднёвую Амерыку ўругваец Эрнан Фігэрэда. Праўда, працягне ён кар'еру не на бацькаўшчыне, а ў калумбійскім клубе «Дэпортэс Таліма». А вось любімы дынамаўскай тарсідай абаронца Слабадан Сімавіч будзе цяпер гуляць за браціслаўскі «Слован». Да пазітыўных навін можна аднесці падпісанне дагавора з нападаючым зборнай Чарнагорыі Фатасам Бечыраем. Апошнім часам ураджэнец Косава, які прыняў чарнагорскае грамадзянства, выступаў за сціплы кітайскі клуб «Чанчунь Ятай», але кажа, што набірае форму і хутка здолее сябе паказаць з лепшага боку. Да патэнцыйных навабранцаў «Дынама» можна аднесці абаронца Максіма Вітуса і нападаючага Дзяніса Лапцева, лепшага бамбардзіра мінулага чэмпіянату першай лігі ў складзе мазырскай «Славіі». Аднак з гэтымі хлопцамі кантракты пакуль не падпісалі. Між іншым, нядоўга без працы сядзеў Уладзімір Журавель, былы галоўны трэнер «Дынама». Ён стаў памочнікам Алега Кубарава ў малдаўскай «Дачыі».
Былы гулец «Пармы» ў Салігорску?
У салігорскім «Шахцёры», бронзавым прызёры леташняга чэмпіянату, узялі курс на амаладжэнне. «Гарнякоў» пакінулі адразу некалькі вопытных футбалістаў. А гэта і Дзмітрый Асіпенка, украінец Ілья Галюза, Мікалай Кашэўскі. Не будзе ў камандзе грузінскага паўабаронцы Аляксандра Гурулі. Прафесійную кар'еру завяршыў Андрэй Лявончык, жывая легенда «жоўта-чорных» (368 матчаў за каманду). Новае месца працы Андрэй доўга не шукаў (калі наогул шукаў) і быў прызначаны намеснікам дырэктара «Шахцёра». Што тычыцца трансфераў, дружыну папоўнілі некалькі кваліфікаваных байцоў. З Гомеля ў Салігорск пераехалі Дзмітрый Камароўскі і Міхаіл Афанасьеў, з Жодзіна — Сяргей Казека. Яшчэ некалькі гульцоў знаходзяцца на праглядзе. Сярод іх сваёй цікавай біяграфіяй вылучаецца сербскі нападаючы Неманья Човіч. У свой час гэты 23-гадовы хлопец знаходзіўся ў сістэме вядомай італьянскай «Пармы», а апошні сезон правёў у складзе казахскага «Спартака».
Нягледзячы на праблемы БелАЗа, пра якія ўжо шмат пісалася, жодзінскі «Тарпеда» здолеў захаваць і галоўнага трэнера Ігара Крывушэнку, і асноўны касцяк футбалістаў, якія змагаліся летась за бронзавыя ўзнагароды. Пры гэтым кантракты ўжо падпісалі з экс-паўабаронцам «Гомеля» Антонам Мацвеенкам і былым хаўбекам «Мінска» Віталём Кібукам. На праглядзе знаходзіцца цэлы шэраг навабранцаў. Паглядзім, хто з іх застанецца.
А вось з «Гомеля», які заняў у мінулым чэмпіянаце 6-ы радок, навін пакуль няшмат. Каманда з адпачынку наогул выйшла толькі 26 студзеня. У планах — праца на спартыўных аб'ектах горада. Гамяльчан чакае таварыскі матч з «Белшынай» 2 лютага. Аб пераходах у іншыя клубы Мацвеенкі і Камароўскага мы ўжо пісалі. Не будзе на берагах Сожа і Аляксандра Бычанка, Віталя Трубілы, армяніна Завена Бадаяна і ўкраінцаў Дзмітрыя Няўмывакі і Вячаслава Сердзюка. Спрабуе свае сілы ў мазырскай «Славіі» галкіпер Мікалай Раманюк. А вось са славутым форвардам-ветэранам Генадзем Блізнюком ужо вырашана працягнуць кантракт яшчэ на год.
Наваполацкі «Нафтан», каманда-адкрыццё мінулага чэмпіянату, таксама пакінула шмат гульцоў. У камандзе больш не будзе расійскіх легіянераў Георгія Буліскерыя і Яўгена Сантрапінскіх, нігерыйца Сімона Агара, які можа апынуцца ў «Віцебску», егіпцяніна Махамеда Рэфаі. Пры гэтым на праглядзе ў клубе знаходзіцца шэраг патэнцыйных легіянераў.
Слуцк застаўся без японца
Даволі шмат футбалістаў пакінулі «Слуцк», які летась дэбютаваў у вышэйшай лізе. Сярод іх — японец Ёсуке Сайта, які так спадабаўся слуцкім гледачам. Навічкі таксама ўжо з'явіліся ў камандзе Юрыя Крата. Афіцыйна навабранцамі клуба сталі экс-гулец БАТЭ Сяргей Глябко і былыя футбалісты брэсцкага «Дынама»: галкіпер Канстанцін Рудзянок і паўабаронца Аляксандр Перапечка.
Бабруйская «Белшына» пакуль таксама толькі губляе футбалістаў. За невялікім выключэннем. Паўнавартасным гульцом некалі гранда беларускага чэмпіянату стаў украінскі нападаючы Іван Сомаў з «Мікалаева» (Украіна).
Яшчэ год таму гродзенскі «Нёман» лічылі «чорным конікам» вышэйшай лігі, але клуб захрас у фінансавых праблемах і пазыках. А таму не дзіўна, што яго пакінулі шмат футбалістаў. Адразу два гульцы (беларус Павел Савіцкі і латыш Ігар Тарасаўс) папоўнілі склад польскай «Ягелоніі» з Беластока. Арцём Салавей перайшоў у «Віцебск», а варатар Марус Рапаліс падпісаў кантракт з літоўскім «Тракаем». Пры гэтым «Нёман» праводзіць актыўны прагляд футбалістаў. З камандай, напрыклад, трэніруецца 28-гадовы камерунец Бебей Кінг. Апошнія два гады ён хоць і правёў у Таджыкістане, але ў 2008 годзе ўдзельнічаў у Алімпіядзе ў Пекіне. Карацей, ёсць чым ганарыцца. Між іншым, новым старшынёй клуба стаў 29-гадовы Іван Варсовіч. Раней ён займаў пасаду намесніка начальніка аддзела адукацыі, спорту і турызму гарвыканкама. «Надзейны, правераны і ўмее працаваць», — так новага кіраўніка футбольнага клуба ахарактарызаваў Мечыслаў Гой, старшыня Гродзенскага гарвыканкама.
А вось футбольны клуб «Мінск» здолеў захаваць шэраг футбалістаў і перападпісаў кантракты з Сяргеем Амельянчуком, Аляксандрам Сачыўкам. Планавалі, што ў камандзе застануцца абаронца Іван Маеўскі, які падпісаў кантракт з польскім клубам «Завіша» (Быдгашч), і варатар Уладзімір Бушма. Магчыма, гэты сезон Уладзімір правядзе ў малдаўскай «Дачыі», якую ўзначальвае добра вядомы яму беларускі трэнер Алег Кубараў. А вось 17-гадовы нападаючы Арцём Васільеў, хутчэй за ўсё, падпіша кантракт са славутым бельгійскім «Бруге».
Наогул, за апошнія месяцы беларускія клубы пакінулі больш за 40 легіянераў. Сярод іх балгарын Любен Нікалаў, экс-абаронца брэсцкага «Дынама». Ён, дарэчы, выбраў самы экзатычны шлях для працягнення кар'еры і адправіўся гуляць туды, дзе звычайна прынята адпачываць, — у Тайланд. Дарэчы, у складзе «Дынама» спрабуе замацавацца вядомы нападаючы Уладзімір Юрчанка. У пэўны момант кар'ера гэтага таленавітага футбаліста, якім цікавіліся ў свой час нават італьянскія каманды, пайшла пад адхон, а ён трапіў за краты. Але цяпер Уладзімір вырашыў усё памяняць. Імкнецца адрадзіць сябе ў футболе і вярнуць пачуццё гола.
Мазырская «Славія» пад кіраўніцтвам Юрыя Пунтуса вярнулася ў вышэйшую лігу. Каманда ўжо адправілася на першы збор у Тамашоўку, што на Брэстчыне, і актыўна праглядае футбалістаў. Сярод іх ёсць як беларусы, так і гульцы з блізкага замежжа.
«Віцебск» таксама паступова пачынае падбіраць новых выканаўцаў, перазаключаць кантракты з тымі, хто заваёўваў пуцёўку ў эліту айчыннага футбола. Гульцамі каманды з культурнай сталіцы краіны могуць стаць Дзмітрый Хлебасолаў, Кірыл Вяргейчык, а таксама Дзмітрый Коўб, які ў мінулым першынстве Літвы стаў лепшым бамбардзірам «Тракая». Дакладна вядома, гэты сезон у «Віцебску» правядзе варатар Дзмітрый Гушчанка. Апошнім месцам працы галкіпера была «Белшына».
Прыходзяць навіны і з мікашэвіцкага «Граніта». Вядома, што клуб перазаключыў працоўныя дагаворы з 10 футбалістамі. Сярод навабранцаў — былы абаронца «Белшыны» і брэсцкага «Дынама» Валерый Каршакевіч, форвад «Бярозы» Цярэнцій Луцэвіч, паўабаронца «Нёмана» Ігар Ясінскі.
Падрыхтаваў Тарас ШЧЫРЫ
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
Ідэнтычнасць праз спадчыну.