Галоўны вынік за 2014 год у тым, што ў конкурсе кароткага апавядання стала больш удзельнікаў з кола тых, хто працуе на літаратурнай глебе. Але і нашы звяздоўскія аўтары працягваюць пісаць і час ад часу радуюць новымі добрымі творамі. І бываюць адкрыцці, калі цікавае апавяданне дасылаюць менавіта чытачы нашай газеты, якім захацелася выказацца пра тое, што хвалюе, і атрымалася гэта зрабіць так, што нават журы адзначыла твор.
Дзякуй усім нашым сталым аўтарам, якія не першы год дасылаюць свае апавяданні на конкурс. Дзякуй і ўсім тым, хто пісаў таму, што захацелася выказацца (сапраўды, беларуская мова адкрывае прастору для творчасці). Тым, хто дасылаў свае творы на конкурс, але апавяданні не ўбачылі свет, тлумачым: не ўсё, што мае сюжэт і напісана па-беларуску можа быць надрукавана на старонках газеты. Хочацца, каб твор нёс думку і быў напісаны па-майстэрску, адлюстроўваў праз вобразы сучасную беларускую рэчаіснасць. А тут ёсць над чым працаваць нашым аўтарам, сярод якіх ёсць прафесійныя літаратары і тыя, хто пачаў пісаць на беларускай мове пад уплывам чытання газеты. Вызначальная ўсё ж якасць і адметнасць самога твора. Вядучы конкурсу 2014 года Алесь Бадак імкнуўся выбіраць для друку менавіта такія апавяданні.
Прыемна, што сярод нашых пераможцаў ёсць і новыя імёны, і імёны тых, хто з намі даўно. Прыцягнулі ўвагу творы сур'ёзныя, з нечаканым сюжэтам, філасофскім поглядам, з імкненнем звярнуцца да айчыннай гісторыі, і апавяданні, якія больш «чытацкія», прадстаўляюць гісторыі з жыцця (што ў кантэксце газеты ўспрымаецца натуральна). Такім чынам, віншуем:
1-я прэмія — Святлана Магілеўчык, апавяданне «Віражы лёсу» (6 сакавіка 2014 года).
2-я прэмія — Аляксандр Брыт, апавяданне «Транзітны эпізод» (19 ліпеня 2014 года).
3-я прэмія — Мікола Чарняўскі, апавяданне «Вяселле ў Налібоках» (29 мая 2014 года).
Дыпломамі адзначаныя Юры Станкевіч за апавяданне «Морлакі» (21 жніўня 2014 года) і Віктар Варанец «Апошняе паляванне Стэфана Баторыя» (31 ліпеня).
Неўзабаве ў сценах рэдакцыі адбудзецца ўзнагароджанне, куды запрашаем усіх лаўрэатаў і дыпламантаў. Удакладніць інфармацыю можна па кантактных тэлефонах у Мінску: 287 18 69 альбо +375 29 6910249 (Vеlсоm).
Да ўвагі ўдзельнікаў конкурсу апавяданняў «Звязды» ў 2015 годзе!
Конкурс працягваецца і адкрыты для ўсіх — як для прафесійных літаратараў, так і для тых, хто вырашыў толькі паспрабаваць свае сілы, выказаць свае набалелыя думкі ці парадаваць чытачоў поглядамі на нейкія падзеі ці з'явы.
Умовы: разглядаецца толькі адно апавяданне ад аднаго аўтара (!) памерам да 5 машынапісных старонак (ці да 10-12 тысяч знакаў). Гэта павінна быць апавяданне на беларускай мове, якое нідзе дагэтуль не друкавалася. Рэдакцыя пакідае за сабой права не рэцэнзаваць і не вяртаць творы.
Апавяданні накіроўвайце на адрас: 220013, г. Мінск, вул. Б. Хмяльніцкага, 10а, газета «Звязда», з пазнакай «На літаратурны конкурс». Можна дасылаць апавяданні на электронны адрас: іnfо@zvуаzdа.mіnsk.bу таксама з пазнакай «Літаратурны конкурс».
Шаноўныя аўтары! Абавязкова паведамляйце сваё прозвішча і імя (сапраўднае), імя па бацьку, дакладны паштовы адрас і поўныя пашпартныя звесткі (нумар, кім і калі выдадзены, асабісты нумар), а таксама кантактны тэлефон. Калі ласка, напішыце колькі слоў пра сябе: чым займаецеся, калі і пад уплывам чаго пачалі пісаць.
Вядучым конкурсу ў 2015 годзе застаецца пісьменнік Алесь Бадак, рэдактар літаратурнага часопіса «Полымя». Найлепшыя апавяданні, пададзеныя на конкурс, будуць надрукаваны на старонках газеты з выплатай ганарару. Грашовыя прэміі атрымліваюць пераможцы пры падвядзенні вынікаў.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».