Больш як 600 студэнтаў з 44-х беларускіх і смаленскіх ВНУ сабраў рэспубліканскі студэнцкі маладзёжны форум «Моладзь — надзея і будучыня Беларусі» ў Горках. Як адзначыў на цырымоніі ўрачыстага адкрыцця міністр адукацыі Міхаіл Жураўкоў, «сёння мы даём афіцыйны старт Году моладзі». Ён пажадаў студэнцкай моладзі правесці яго максімальна насычана і цікава.
— Горкі ўжо назвалі сталіцай моладзі. Форум праводзіцца трэці раз і, спадзяюся, ён стане традыцыйным, — адзначыў міністр.
У рамках форуму прадугледжана работа трох секцый: «Моладзь і сучаснасць: ініцыятыва, адказнасць, партнёрства», «Моладзь у медыяпрасторы: досвед, праблемы, стратэгія і сацыяльная актыўнасць» і «Спорт і здаровы лад жыцця: ад інтарэсу да выніку». Адной з цэнтральных падзей стане сустрэча міністра адукацыі Міхаіла Жураўкова са студэнтамі, якая пройдзе ў фармаце адкрытага дыялогу.
Таксама ў рамках студэнцкага форуму адбудзецца фінал рэспубліканскага конкурсу «Студэнт года — 2014», ідэйным натхняльнікам якога выступае Беларускі рэспубліканскі саюз моладзі.
За ганаровы тытул будуць змагацца восем лепшых студэнтаў, якія перамаглі ў абласных і Мінскім гарадскім турах. Брэсцкі рэгіён на конкурсе прадставіць студэнтка 5-га курса факультэта эканомікі і права Баранавіцкага дзяржаўнага ўніверсітэта Аляксандра Малаканава. Віцебскі рэгіён — студэнтка 3-га курса эканамічнага факультэта Віцебскага дзяржаўнага тэхналагічнага ўніверсітэта Ганна Мядзелец; Гомельшчыну — студэнт 4-га курса лячэбнага факультэта Гомельскага дзяржаўнага медыцынскага ўніверсітэта Андрэй Савасцін; Гродзеншчыну — курсант 3-га курса ваеннага факультэта Гродзенскага дзяржаўнага ўніверсітэта імя Янкі Купалы Аляксей Кутафін; Магілёўшчыну — курсант 4-га курса факультэта міліцыі Магілёўскага інстытута МУС Віктар Кураш.
За сталіцу ў фінале выступаюць студэнтка 3-га курса факультэта радыётэхнікі і радыёэлектронікі БДУІР Наталля Віннікава, курсант 4-га курса ваенна-тэхнічнага факультэта Беларускага нацыянальнага тэхнічнага ўніверсітэта Аляксандр Гайваронскі і курсант 2-га курса інжынернага факультэта Камандна-інжынернага інстытута МНС Дар'я Селязнёва.
Фінальныя мерапрыемствы будуць доўжыцца два дні. Студэнты павінны будуць прэзентаваць свае аўтарскія маладзёжныя праекты. Іх чакаюць конкурс «Візітная картка», конкурс прамоўніцкага майстэрства «Мая спецыяльнасць — мая гарантыя будучыні», творчы конкурс «Маладая Беларусь».
І ўпершыню ў праграму рэспубліканскага праекта ўключаны патрыятычны конкурс «Мой герой Перамогі». Галоўная задача кожнага ўдзельніка фіналу ў любым жанры расказаць пра чалавека, які прайшоў Вялікую Айчынную вайну, чый подзвіг з'яўляецца прыкладам мужнасці і адвагі для маладога пакалення.
Абсалютны пераможца конкурсу «Студэнт года — 2014» будзе вызначаны па суме вынікаў творчых выпрабаванняў у двух этапах конкурснай праграмы.
Дарэчы, у рамках конкурсу прадугледжана яшчэ адна намінацыя «Студэнт года onlіne». Тут пераможцу вызначаць карыстальнікі віртуальнай сеткі, якія змогуць прагаласаваць на сайце brsm.by за найлепшы аўтарскі гумарыстычны відэаролік на тэму «Я — студэнт!».
Цэнтральны камітэт БРСМ збіраецца хадайнічаць перад Саветам спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў аб заахвочванні студэнтаў, якія занялі ў фінале першае, другое і трэцяе месца.
Між іншым, для таго, каб стаць удзельнікам праекта «Студэнт года», недастаткова быць проста паспяховым студэнтам (сярэдні бал канкурсанта не можа быць ніжэйшым за 8,0 бала!). Абавязкова трэба прымаць актыўны ўдзел у грамадскім жыцці, у дзейнасці пярвічнай арганізацыі БРСМ, міжвузаўскіх, раённых, гарадскіх, рэспубліканскіх і міжнародных конкурсах у галіне студэнцкага самакіравання.
Учора ў рамках форуму ўжо прайшоў адкрыты дыялог «Моладзь Беларусі: традыцыі і будучыня» з удзелам намесніка міністра адукацыі Рэспублікі Беларусь Віктара Якжыка і першага сакратара Цэнтральнага камітэта БРСМ Андрэя Белякова.
Надзея НІКАЛАЕВА,
г. Горкі.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».