Вось ужо некалькі гадоў запар ён ладзіцца з удзелам флагмана айчыннага музычнага мастацтва — Нацыянальнага акадэмічнага народнага аркестра Беларусі імя Жыновіча пад кіраўніцтвам народнага артыста Беларусі, прафесара Міхаіла Казінца.
Сёлета падарункам на дзень нараджэння Уладзіміру Мулявіну стаў сольны канцэрт Пятра Ялфімава, які спяваў у суправаджэнні аркестра Жыновіча. Імёны вялікага песняра Уладзіміра Мулявіна і харызматычнага маладога спевака Пятра Ялфімава ў той вечар скрыжаваліся цалкам невыпадкова. Бо сёння няма, бадай, найлепшага выканаўцы песняроўскіх хітоў. Складаныя, адмысловыя, ювелірна адточаныя майстэрскай рукой Уладзіміра Мулявіна, найлепшыя песні «Песняроў», як паказвае час, паддаюцца толькі сапраўдным майстрам эстраднага вакалу. Ялфімаў, без перабольшання, — першы сярод іх. Яго імя, як і ні з чым не параўнальны голас, выклікаюць вялізную цікавасць шматлікіх слухачоў далёка за межамі Беларусі. Аншлаг у канцэртнай зале філармоніі — чарговае пацвярджэнне каласальнай папулярнасці Ялфімава, які не падмануў чаканні сваіх паклоннікаў і сумленна адпрацаваў вялікі сольны канцэрт у 2 аддзяленнях, «ужывую» выканаўшы каля 20 песняроўскіх шлягераў. У іх ліку — «Александрына», «Мой родны кут», «Вераніка», «Зачарованая», «Жураўлі на Палессе ляцяць», «Будачнік», «Завушніцы», «Алеся», «Чырвоная ружа» і шмат іншых «залатых хітоў» Уладзіміра Мулявіна, Ігара Лучанка і іншых кампазітараў, да творчасці якіх у свой час далучаліся «Песняры». Некаторыя з гэтых твораў Пётр Ялфімаў развучыў спецыяльна да свайго сольнага канцэрта і выканаў упершыню. Сенсацыяй вечара было выкананне кампазіцыі Уладзіміра Мулявіна «Я не паэта» на верш Янкі Купалы, якую артыст праспяваў упершыню пасля таго, як яна была створана і выканана Уладзімірам Мулявіным у праграме 1982 года «Я нясу вам дар» паводле паэзіі Янкі Купалы. Найскладанейшая і найпрыгажэйшая, гэта песня была адкрыта наноў. Яе віртуознае, сапраўды магутнае выкананне ў самым пачатку стала эпіграфам да канцэрта і адначасова — музычным падарункам Уладзіміру Мулявіну і ўсёй яго творчай спадчыне.
Дзве з паловай гадзіны Пётр Ялфімаў трымаў публіку ў палоне свайго незвычайнага вакалу, што ўзмацнялі бліскучыя аркестравыя аранжыроўкі заслужанага артыста Беларусі Аляксандра Крамко (у той вечар ён іграў на сола-гітары), а таксама спевы бэк-вакалістаў Аляксандра Ляпунова, Уладзіслава Даніловіча і Паўла Бяркова, якіх спявак запрасіў да ўдзелу ў сваім сольным канцэрце. Многіх здзівіла, захапіла і парадавала тое, што Пётр Ялфімаў нечакана сам стаў на бэк-вакал, калі песню «Калядачкі» заспяваў малады саліст аркестра імя Жыновіча Андрэй Коласаў. Падобны ўчынак, калі майстар рангу Ялфімава становіцца «на падпеўкі» да артыста-пачаткоўца, не толькі адпаведным чынам характарызуе яго, але зноў-такі выклікае пэўныя алюзіі з самім Уладзімірам Мулявіным, які таксама не цураўся спяваць у хоры падчас саліравання Барткевіча, Кашапарава, Дайнекі ці Пені. Гэта, калі хочаце, прыкмета творчай і чалавечай мудрасці, разумення таго, што ў творчасці няма другарадных дэталяў, але важна ўсё, пры гэтым галоўнае — мастацкі вынік, перад якім роўныя і «салдаты», і «генералы».
Супрацоўніцтва Пятра Ялфімава і Нацыянальнага акадэмічнага народнага аркестра Беларусі пад кіраўніцтвам Міхаіла Казінца доўжыцца ўжо восьмы сезон. І кожны іх сумесны праект робіцца вялікай падзеяй. Так было і на гэты раз. Не будзе перабольшаннем сцвярджэнне, што сёння Ялфімаў і аркестр імя Жыновіча дасягнулі самых значных вынікаў ва ўвасабленні і аднаўленні творчай спадчыны «Песняроў». У сезонах 2011-2012 гадоў аркестр імя Жыновіча пры ўдзеле Пятра Ялфімава аднавіў рок-паэму «Гусляр» і рок-оперу «Песня пра долю» — дзве самыя яркія і адметныя праграмы ансамбля, якія лічацца вяршыняй творчасці «Песняроў» і Уладзіміра Мулявіна. І вось узята новая творчая вяршыня, што чарговы раз пацвердзіла ўнікальнасць Пятра Ялфімава як спевака і ўніверсальнасць аркестра імя Жыновіча як калектыву, якому падуладна незвычайнае спалучэнне стыхіі року і фальклору — такі кірунак, якога трымаўся ў сваёй дзейнасці Уладзімір Мулявін. Напэўна, выдатны музыкант быў бы задаволены тым, як беражліва і надзейна ўтрымліваецца сёння тое найлепшае, што ён рупліва назапасіў амаль за 40 гадоў творчай дзейнасці, і з радасцю прыняў бы шчыры падарунак, які падрыхтавалі яму на дзень нараджэння яго таленавітыя калегі.
Вольга Брылон
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.