Кожны з нас хаця б раз у жыцці перажываў галавакружэнне. Аднак пад гэтым словам многія разумеюць абсалютна розныя адчуванні: ад таго стану, які мае быць перад стратай прытомнасці, да ўражання кружэння ўласнага цела або навакольных прадметаў. Вядома звыш 70-ці прычын, якія выклікаюць галавакружэнне. Высветліць сапраўдную прычыну гэтага стану вельмі няпроста.
— Вылучаюць галавакружэнні, звязаныя з парушэннем работы і захворваннямі галаўнога мозга (траўма, кровазліццё, пухліна) і тыя, што ўзнікаюць у выніку пашкоджання вестыбулярнага нерва або ўнутранага вуха, — кажа ўрач-неўролаг 11-й гарадской паліклінікі г. Мінска Юлія ВАРАНЬКО. — Як правіла, прычыны такога стану бяскрыўдныя — стомленасць, голад, загойдванне. Аднак у некаторых выпадках размова можа ісці пра сур'ёзнае захворванне. Напрыклад, пра інсульт, пры якім сімптомы ўзнікаюць востра, разам з падваеннем у вачах, парушэннем маўлення і каардынацыі. Пры пухлінах галаўнога мозга прыступы нарастаюць паступова, узмацняюцца пры пэўным становішчы галавы і суправаджаюцца галаўным болем. Галавакружэнне можа быць і сімптомам шыйнага астэахандрозу. Боль у шыі, руках можа ўзмацняцца пры рэзкіх паваротах галавы. Перацісканне пры гэтым артэрый, што знаходзяцца на шыі, выклікаюць галавакружэнне і шум у галаве.
Размова можа ісці і пра запаленні ўнутранага вуха, вялікую колькасць серы ў вонкавым слыхавым праходзе, хваробу Меньера (ацёк лабірынта, які суправаджаецца шумам у вушах, зніжэннем слыху, млосцю, ванітамі), вестыбулярны неўрыт (запаленне нерва), дабраякаснае пазіцыйнае галавакружэнне, якое ўзнікае пры змяненні становішча цела. Справа можа быць і ў анеміі (паніжаным гемаглабіне крыві), арытміі (хваробе сэрца), рэзкім падзенні або пад'ёме артэрыяльнага ціску, клімаксе, менструацыі, цяжарнасці. Як пабочны эфект галавакружэнні могуць з'яўляцца на фоне прыёму розных лекаў — антыбіётыкаў, супрацьсутаргавых, сардэчных.
Для абследавання
Для ўдакладнення дыягназу могуць прызначыць ультрагукавое даследаванне брахіяцэфальных сасудаў, рэнтгенаграфію шыйнага аддзела пазваночніка, аналізы крыві, а пры падазрэнні на пашкоджанне галаўнога мозга — камп'ютарную або магнітна-рэзанансную тамаграфію і энцэфалаграфію.
Першая дапамога
Пры моцным галавакружэнні неабходна забяспечыць сабе прыток свежага паветра, легчы ў ложак і, па магчымасці, памераць артэрыяльны ціск.
Для лячэння
Лячэнне ўключае ў сябе прэпараты седатыўныя, антыгістамінныя (дымедрол, піпальфен), супрацьванітныя, дыўрэтыкі, бэтагістын.
Урач прапануе асвоіць вестыбулярную трэніроўку — практыкаванні, якія дапамагаюць развіць здольнасці па кантролі галавакружэння.
Пры чэрапна-мазгавых траўмах паказана хірургічнае лячэнне, калі ўсё пералічанае вышэй не дае выніку.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
«Мы зацікаўлены, каб да нас прыязджалі».