Праект Беларускага рэспубліканскага саюза моладзі «100 ідэй для Беларусі» стаў для ўдзельнікаў унікальнай магчымасцю спраўдзіць свае мары і зрабіць Беларусь такой, якой яны яе бачаць. Учора ўпершыню ў публічным фармаце адбылася абарона праектаў, прадстаўленых да ўвагі журы,
а таксама выстава-прэзентацыя 100 лепшых распрацовак у рамках конкурсу.
[caption id="attachment_73149" align="alignnone" width="600"] Вучні сталічнай гімназіі №19 Іван Прышчэпа і Дар'я Давідоўская прадстаўляюць
экалагічны часопіс «EcoGymn». Цікава, што часопіс ствараецца навучэнцамі для равеснікаў.[/caption]
Зала Нацыянальнага выставачнага цэнтра «БелЭкспа» яшчэ з раніцы запоўнілася стэндамі з апісаннем праектаў, а часам, і гатовымі прататыпамі распрацаваных прылад. Уся экспазіцыя была раздзелена на некалькі пляцовак, прысвечаных у тым ліку прамысловым тэхналогіям і вытворчасці; медыцыне, ахове здароўя і біятэхналогіям; ІT-праектам; робататэхніцы. Тут можна было паназіраць за камп'ютарнымі мадэлямі вайсковай тэхнікі часоў Вялікай Айчыннай вайны, убачыць, як прусакі перапрацоўваюць смецце, робаты гуляюць у хакей і шмат іншага. Зацікаўленыя наведвальнікі і журналісты распытвалі аўтараў аб тым, што натхняла моладзь на стварэнне праектаў і з якімі цяжкасцямі яна сутыкнулася.
— Трэба зазначыць, што конкурс набывае ўсё большую папулярнасць не толькі ў маладзёжным асяродку, але і ў цэлым — у дзяржаве, — сказаў падчас урачыстага адкрыцця выставы-прэзентацыі старшыня Савета Рэспублікі Нацыянальнага сходу Рэспублікі Беларусь Міхаіл МЯСНІКОВІЧ. — Гэта сведчыць пра тое, што патэнцыял нашай моладзі сапраўды запатрабаваны. Вельмі важна адчуць, што ты патрэбны, здольны генерыраваць цікавыя ідэі і дабівацца таго, каб яны былі рэалізаваныя. Сёння тут будуць выбіраць дзесяць найлепшых праектаў, але мне ўяўляецца, што ўсе ўдзельнікі выставы — ужо пераможцы.
Дарэчы, ад канкурсантаў Міхаіл Мясніковіч атрымаў незвычайны падарунак — яблык, надрукаваны на 3D-прынтары.
— Я магу меркаваць пра гэты конкурс яшчэ і як арганізатар, — падзяліўся намеснік кіраўніка Адміністрацыі Прэзідэнта Рэспублікі Беларусь Ігар БУЗОЎСКІ. — Першыя крокі па рэалізацыі праекта «100 ідэй для Беларусі» мы рабілі з асцярожнасцю, бо не ведалі, наколькі цікавы ён будзе моладзі і структурам, закліканым займацца навукай і адукацыяй. Але ўрэшце ўпэўніліся, што знайшлі сваю нішу: кожны год конкурс расце, павялічваецца колькасць ідэй. Часам ад удзельнікаў мы атрымліваем не зусім тое, чаго чакалі спачатку, але не менш важнае — скіраванасць на самаўдасканаленне і развіццё.
Цікавых праектаў на выставе было шмат. Напрыклад, хлопцы з Гродзенскага дзяржаўнага ўніверсітэта імя Янкі Купалы прапанавалі публіцы сваю распрацоўку пад назвай «Віртуальная Беларусь», пры дапамозе якой яны хочуць прыцягнуць увагу да гісторыка-культурнай спадчыны нашай краіны.
— У рамках рэалізацыі праекта мы ўжо стварылі першую 3D-галерэю «Віртуальную Каложу», — распавёў адзін з аўтараў «Віртуальнай Беларусі», магістрант інжынерна-будаўнічага факультэта Валерый МАСКЕВІЧ. — Яна ўяўляе з сябе аб'ёмныя здымкі славутай Барысаглебскай царквы ў Гродне, яе ўнутранага ўбранства і знешняга выгляду. Акрамя гэтага, была створана графічная рэканструкцыя страчанага касцёла Найсвяцейшай Панны Марыі, больш вядомага як Фара Вітаўта. У найбліжэйшых планах — стварэнне аб'ёмных галерэй іншых помнікаў у Гродне: Старога і Новага замкаў, Кафедральнага касцёла Святога Францыска Ксаверыя, лялечнага тэатра і іншых.
Падчас урачыстага адкрыцця першы сакратар Цэнтральнага камітэта БРСМ Андрэй БЕЛЯКОЎ зазначыў, што праект «100 ідэй для Беларусі» застаецца адкрытым і працягвае працаваць, а таму ў Год моладзі арганізатары будуць чакаць новыя цікавыя праекты і задумы.
Яраслаў ЛЫСКАВЕЦ
Фота Надзеі Бужан
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.