Яны — лепшыя!

 У Мінску ўручылі спартыўныя «Оскары»

На ўрачыстай цырымоніі падвядзення вынікаў адкрытага публічнага конкурсу «Трыумф. Героям спорту — 2014» у сталічным Палацы спорту былі названы лепшыя спартсмены і спартыўныя моманты мінулага года.

У ходзе конкурсу беларускія аматары спорту і журы вызначалі спартсменаў, якія дабіліся ў 2014 годзе найбольш значных вынікаў на буйных афіцыйных міжнародных спаборніцтвах. Галасаванне заўзятараў доўжылася тры тыдні, у ім прынялі ўдзел каля паўтара мільёна чалавек, у тым ліку і чытачы «Звязды».

Аматары спорту па традыцыі выбіралі сваіх фаварытаў у чатырох намінацыях: «Трэнер года», «Спартсмен года», «Спартсменка года» і «Каманда года». Яшчэ ў чатырох («Самы яркі момант года», «Прарыў года», «Вынік года» і «За волю да перамогі») пераможцаў вызначыла журы конкурсу.

Фіналам праекта стала цырымонія ўрачыстага ўзнагароджання пераможцаў і гала-канцэрт з удзелам артыстаў беларускай эстрады. Убачыць яго маглі ўсе беларусы ў эфіры тэлеканалаў "Беларусь 1»   і "Беларусь 24» .

Галоўным героем урачыстасці стала трохразовая алімпійская чэмпіёнка Дар'я Домрачава, яна выйграла бронзавыя статуэткі адразу ў дзвюх намінацыях: «Спартсменка года» і «Вынік года». Сама Даша не змагла прысутнічаць на цырымоніі — рыхтуецца да чэмпіянату свету, але яна выйшла на сувязь з беларускімі заўзятарамі з Рупольдынга.

[caption id="attachment_73477" align="alignnone" width="600"] На відэасувязі — Дар'я ДОМРАЧАВА.[/caption]

Біятланістка адзначыла, што вельмі рада атрымаць такое прызнанне, падзякавала ўсім, хто галасаваў за яе, і асабліва сваёй сям'і.

— Гэта быў той вынік, да якога я ішла доўгія гады, у які ўклала на той момант усе свае сілы і вопыт; вынік, у які ўклалі сілы ўсе мае трэнеры і ўся мая каманда. Асаблівы дзякуй хацелася б сказаць маёй сям'і. На жаль, таты ўжо няма з намі, але я адчуваю, што ён са мной і мне вельмі дапамагае. Мая матуля для мяне самая лепшая! Дзякуй майму брату, бо менавіта ён прывёў мяне ў секцыю біятлона.

Узнагароду Дар'і атрымлівала яе мама Ларыса Аляксееўна:

— Трэба сябраваць са сваімі дзецьмі, жыць з імі, радавацца кожнай самай маленькай перамозе, бо вялікія перамогі прыходзяць не адразу. Я вельмі рада за дачку. Яна змагла зрабіць амаль немагчымае: тройчы выйграла залатыя медалі на адной Алімпіядзе! Галоўнае, пасля перамогі Дар'і многія дзеці прыйшлі ў спартшколы і пачалі займацца лыжным спортам, біятлонам. Дар'я вельмі захоплена сваёй справай. Хачу ўсім пажадаць так ставіцца да сваёй працы, тады ў нас усё атрымаецца.

У намінацыі «Каманда года» перамагла жаночая нацыянальная каманда па біятлоне. Дзяўчаты занялі 5-е месца ў эстафеце на зімовых Алімпійскіх гульнях у Сочы.

Фрыстайліст Антон Кушнір стаў лепшым у намінацыі «Спартсмен года» — за званне чэмпіёна зімовых Алімпійскіх гульняў-2014 народнае журы аддала пяцьдзясят працэнтаў галасоў.

— Хачу сказаць дзякуй родным, блізкім, сям'і. Дзякуй за падтрымку. Асаблівая падзяка майму першаму трэнеру Галіне Пятроўне Досавай і, вядома ж, Мікалаю Іванавічу Казеку. Я магу сказаць, што вы найлепшы ў свеце трэнер па фрыстайле.

У пацвярджэнне слоў Антона Кушніра ўзнагароду ў намінацыі «Трэнер года» атрымаў «рулявы» нацыянальнай каманды па фрыстайле Мікалай Казека. Канкурэнцыю яму склаў біятлонны гуру — Клаус Зіберт. Намінантаў падзяліў усяго адзін працэнт галасоў.

— Нарэшце дачакаўся гэтай прэстыжнай прэміі. Рэцэпт поспеху просты: люблю сваю працу. Разлічваў атрымаць узнагароду пасля перамогі Аляксея Грышына ў Ванкуверы, але давялося выхаваць яшчэ двух алімпійскіх чэмпіёнаў, каб стаць лаўрэатам.

[caption id="attachment_73478" align="alignnone" width="600"] «Трэнер года» — Мікалай КАЗЕКА (злева). Узнагароду ўручае Юрый ЧЫЖ.[/caption]

Бронзавая статуэтка ў намінацыі «За волю да перамогі» традыцыйна ўручаецца спартсменам-паралімпійцам. Сёлета ёю ўшанавалі Васіля Шаптабоя, ён стаў двухразовым бронзавым прызёрам зімовых Паралімпійскіх гульняў у Сочы па біятлоне сярод інвалідаў па зроку.

«Самым яркім спартыўным момантам года» названа перамога каманды Беларусі ў матчы з Латвіяй на чэмпіянаце свету па хакеі ў Мінску. Менавіта гэтая вікторыя дазволіла падапечным Глена Хэнлана выйсці ў 1/4 фіналу першынства.

У намінацыі «Прарыў года» перамогу атрымала алімпійская чэмпіёнка Ала Цупер. На сцэну па ўзнагароду спартсменка паднялася не адна: хутка другі раз Ала стане мамай.

Наступныя прэміі «Трыумф. Героям спорту» будуць раздадзены толькі праз два гады. Іх трыумфатарамі будуць ужо летнія алімпійцы, якім трэба будзе пазмагацца за ўзнагароды ў Рыа-дэ-Жанейра.

Арганізатарамі маштабнага праекта з'яўляюцца рэспубліканскае дзяржаўна-грамадскае аб'яднанне «Прэзідэнцкі спартыўны клуб», Міністэрства спорту і турызму, Нацыянальны алімпійскі камітэт, Нацыянальная дзяржаўная тэлерадыёкампанія.

Раней герояў спорту беларускія заўзятары выбіралі ў праектах «Навагодні баль — 2007. Героям спорту», «Трыумф. Героям спорту — 2008», «Трыумф. Героям спорту — 2010», «Трыумф. Героям спорту — 2012».

Дар'я Лабажэвіч

Фота Надзеі Бужан