Усебеларуская акцыя БРСМ "Мы - грамадзяне Беларусі!" стартуе 11 сакавіка ў Мінску

Усебеларуская акцыя БРСМ "Мы - грамадзяне Беларусі!" стартуе 11 сакавіка ў Мінску, паведаміў карэспандэнту БЕЛТА першы сакратар ЦК ГА "БРСМ" Андрэй Белякоў.

"Акцыя павінна акцэнтаваць увагу на такой значнай падзеі ў жыцці 14-гадовага падлетка, як атрыманне пашпарта. Важна стварыць умовы для надання належнага статусу і ўрачыстасці гэтай падзеі, усведамлення падлеткамі сэнсу і значнасці сваёй дзейнасці як грамадзяніна", - сказаў Андрэй Белякоў. Ён таксама дадаў, што пашпарт з'яўляецца асноўным і самым галоўным у жыцці грамадзяніна дакументам, які засведчвае асобу. Атрымаўшы пуцёўку ў дарослае жыццё - пашпарт грамадзяніна Беларусі - малады чалавек нясе адказнасць не толькі за ўласны лёс, але і за будучае краіны.

У дзень старту акцыі ў Савеце Рэспублікі Нацыянальнага сходу пройдзе ўрачыстая цырымонія ўручэння нацыянальных пашпартоў. Галоўнымі героямі стануць 14-гадовыя беларусы - выдатнікі вучобы, удзельнікі навукова-практычных канферэнцый, пераможцы і прызёры рэспубліканскіх спаборніцтваў, фестываляў, конкурсаў, прадметных алімпіяд. У падарунак юнакі атрымаюць маляўнічае выданне "Я - грамадзянін Рэспублікі Беларусь", дзе даступна выкладзены асноўныя артыкулы Канстытуцыі, сабрана інфармацыя аб асноўных заканадаўчых актах, а таксама іншыя пазнавальныя матэрыялы. Прыемным сюрпрызам для юных беларусаў стане і незвычайная вокладка для пашпарта, стылізаваная сімволікай маладзёжнага руху, з надпісам "Усебеларуская акцыя "Мы - грамадзяне Беларусі!" і тэкстам гімна рэспублікі, якая была спецыяльна распрацавана і выраблена арганізатарамі акцыі.

Таксама цэнтральныя мерапрыемствы патрыятычнай акцыі пройдуць у дзень старту ў Камітэце дзяржаўнага кантролю, дзе пашпарты грамадзян Беларусі лепшым 14-гадовым падлеткам горада Мінска і сталічнага рэгіёну ўручыць старшыня Камітэта дзяржаўнага кантролю Леанід Анфімаў. 12 сакавіка акцыя будзе прадоўжана ў Канстытуцыйным судзе з удзелам яго старшыні Пятра Міклашэвіча.

У рэгіёнах у гэтыя дні пройдуць сустрэчы юных грамадзян з прадстаўнікамі заканадаўчай і выканаўчай улады, радыёпраекты, круглыя сталы, семінары, ток-шоу, гутаркі з удзелам людзей, адзначаных дзяржаўнымі ўзнагародамі, а таксама класныя гадзіны, пазакласныя мерапрыемствы, інфармацыйныя выстаўкі, дэманстрацыі кінафільмаў і тэатральных пастановак грамадзянска-патрыятычнага зместу для дзяцей і моладзі.

Усебеларуская патрыятычная акцыя БРСМ, прысвечаная Дню Канстытуцыі Беларусі, прадаўжае адкрыты дыялог "Моладзь Беларусі: традыцыі і будучыня". Мерапрыемствы акцыі пройдуць з 11 па 15 сакавіка.