Апынуцца на «лаве падсудных» змогуць прагульшчыкі ў «МІТСО»

Днямі найстарэйшая прафсаюзная ВНУ краіны атрымала новы вучэбны корпус. На яго ўрачыстым адкрыцці пабывалі карэспандэнты «Звязды».

— Адкрыццё новага корпуса ўстановы і арганізацыя Рэспубліканскага вучэбна-метадычнага цэнтра прафсаюзаў сімвалізуюць сабой новы крок у развіцці прафсаюзнага руху ў краіне, — лічыць рэктар «МІТСО» Станіслаў КНЯЗЕЎ. — Наша галоўная задача цяпер — выйсці на пазіцыі smart-універсітэта, дзе будуць выкарыстоўвацца ўсе самыя сучасныя інфармацыйныя тэхналогіі. Новы корпус, здадзены ў эксплуатацыю, — гэта адзін з крокаў рэалізацыі такой задумы. У ім могуць навучацца да 500 студэнтаў адначасова. Будынак насычаны самым розным электронным і мультымедыйным абсталяваннем. Знаходзячыся ў аўдыторыі, кожны студэнт праз унутраную сетку можа атрымліваць усе неабходныя матэрыялы. Існуе магчымасць правядзення дыстанцыйных лекцый для нашых студэнтаў, што навучаюцца ў віцебскім і гомельскім філіялах, і шмат іншых.

19-41

Па словах рэктара «МІТСО», стварэнне раённых і гарадскіх аддзяленняў прафесійных саюзаў, што адбываецца зараз, вымагае ад сістэмы прафсаюзнай адукацыі адпаведных падыходаў. Цяпер такіх аддзяленняў ужо 150, і кожнаму з іх неабходны спецыялісты высокага ўзроўню. Займацца іх падрыхтоўкай будзе Рэспубліканскі вучэбна-метадычны цэнтр прафсаюзаў, які стаў адной са структурных адзінак «МІТСО», а таксама яго аддзелы ў кожнай з абласцей. Ужо з 1 красавіка на базе гэтых пляцовак пачнецца актыўны працэс па падрыхтоўцы і павышэнні кваліфікацыі прафсаюзных кадраў, актыву і іншых бакоў сацыяльнага партнёрства.

Падчас невялікай экскурсіі для журналістаў па новым корпусе былі прадэманстраваны яго перавагі. Напэўна, галоўная асаблівасць будынка — яго эрганамічнасць. Якасныя і ўстойлівыя да зносу матэрыялы, мінімалістычны і ў той жа час зусім не «сумны» дызайн, арганізацыя аўдыторый і іх электроннае начынне — першае, што кідаецца ў вочы. Усе дэталі новага корпуса пералічыць немагчыма, але некаторыя асаблівасці згадаць варта. Адно з найцікавейшых канструктарскіх рашэнняў датычыць «аўдыторый-трансформераў». Тры, здавалася б, асобныя пакоі могуць лёгка ператварацца ў два або адзін вялікі шляхам дэмантажу перагародак паміж імі. Такі крок дазволіць найбольш рацыянальна выкарыстоўваць прастору корпуса. Ёсць тут і іншыя цікавыя кабінеты, напрыклад зала судовых пасяджэнняў, якая дакладна паўтарае свае аналагі ў сапраўдных судах. Тут будуць практыкавацца студэнты юрыдычных спецыяльнасцяў «МІТСО», а кожны прагульшчык зможа апынуцца на лаве абвінавачанага. На першым паверсе замест звыклага стэнда — зона з дысплеямі, на якіх будуць адлюстроўвацца студэнцкія праекты, расклад заняткаў, змены ў ім і многае іншае.

Кульмінацыяй мерапрыемства стала цырымонія афіцыйнага адкрыцця вучэбнага корпуса і Рэспубліканскага вучэбна-метадычнага цэнтра прафсаюзаў, удзел у якой узялі студэнты, адміністрацыя Міжнароднага ўніверсітэта «МІТСО» і старшыня Федэрацыі прафсаюзаў Беларусі Міхаіл ОРДА. Удзельнікі павіншавалі ўніверсітэт з атрыманнем новай адукацыйнай пляцоўкі і заклалі капсулу з пасланнем пакаленню студэнтаў 2030 года, што ўскрыюць падчас святкавання 100-гадовага юбілею «МІТСО».

19-40

Дарэчы, удасканаленне матэрыяльна-тэхнічнай базы прафсаюзнай ВНУ не спыняецца. У стадыі праектавання знаходзяцца новы студэнцкі інтэрнат і спартыўны комплекс непадалёк ад галоўнага корпуса. У Ждановічах вядзецца будаўніцтва спартыўна-аздараўленчага комплексу. Арыенціровачны тэрмін здачы новых аб'ектаў — 2018 год.

Яраслаў ЛЫСКАВЕЦ

Гісторыя прафсаюзнай адукацыі ў Беларусі налічвае ўжо 85 гадоў. У сакавіку 1930 года ў сталіцы пачала працаваць Вышэйшая школа прафруху. Пасля атрымання краінай незалежнасці і ўтварэння Федэрацыі прафсаюзаў Беларусі ўзнікла патрэба ў адпаведнай адукацыйнай установе, якой стаў створаны ў 1992 годзе на базе згаданай школы Міжнародны інстытут працоўных і сацыяльных адносін. У чэрвені 2011 года ВНУ перайменавана ў Міжнародны ўніверсітэт «МІТСО».