Па выніках уступнай кампаніі кіраўніцтва Белдзяржуніверсітэта абяцае прадаставіць месца ў інтэрнаце ўсім іншагароднім абітурыентам, якія зробяць свой выбар на карысць прыродазнаўча-навуковых спецыяльнасцяў. Аб гэтым на сустрэчы з журналістамі паведаміў рэктар БДУ Сяргей АБЛАМЕЙКА.
28-38
Для абітурыентаў-немінчан, якія яшчэ вагаюцца з выбарам ВНУ, гэта моцны аргумент, паколькі ўсе ведаюць, што здымаць жыллё ў сталіцы вельмі дорага. Дахам над галавой плануюць забяспечыць таксама і 80% іншагародніх першакурснікаў, якія паступяць на гуманітарныя спецыяльнасці.
— У Студэнцкай вёсцы ў нас з'явіліся два новыя інтэрнаты, і ў Шчомысліцах у снежні адкрыўся пасля рамонту інтэрнат. А паколькі колькасць студэнтаў змяншаецца, то і забяспечанасць інтэрнатамі расце, — канстатаваў Сяргей Абламейка. — Цяпер месцам у інтэрнаце забяспечаны ўжо 70% ад усіх, хто мае патрэбу.
Рэдкі год абыходзіцца без адкрыцця ў вядучай ВНУ краіны новых спецыяльнасцяў ці напрамкаў. Сёлета на геаграфічным факультэце БДУ ўпершыню будзе ажыццёўлены набор на спецыяльнасць «геаінфармацыйныя сістэмы» з двума напрамкамі: «геаінфармацыйныя сістэмы (зямельна-кадастравыя)» і «геаінфармацыйныя сістэмы (спецыяльныя)». Тэрмін навучання на ўсіх новых напрамках складае чатыры гады.
Новая спецыяльнасць дазволіць падрыхтаваць спецыялістаў для сучасных галін дзейнасці, звязаных з дыстанцыйным зандзіраваннем зямлі, авіяцыйным і касмічным экалагічным маніторынгам; гідраметэаралагічнымі назіраннямі, маніторынгам дзяржаўных картаў і планаў населеных пунктаў; ацэнкай стану сельскагаспадарчых плошчаў і лясоў з ужываннем касмічнай інфармацыі і г.д. Мяркуецца, што студэнты, якія навучаюцца па напрамку «геаінфармацыйныя сістэмы (зямельна-кадастравыя)», будуць запатрабаваныя, у першую чаргу, у Дзяржаўным камітэце па маёмасці Беларусі. Выпускнікам будзе прысвоена кваліфікацыя «спецыяліст па кадастры і геаінфармацыйных сістэмах».
Заказчыкам другога напрамку («геаінфармацыйныя сістэмы (спецыяльныя)») з'яўляецца Міністэрства абароны Беларусі. Гэтаму ведамству патрабуюцца спецыялісты па стварэнні, актуалізацыі і эксплуатацыі геаінфармацыйных сістэм спецыяльнага прызначэння. У рамках гэтага напрамку вялікая ўвага будзе нададзена дысцыплінам ваеннага прызначэння і дысцыплінам, звязаным з найноўшымі камп'ютарнымі геаінфармацыйнымі тэхналогіямі, эксплуатацыяй аўтаматызаваных інфармацыйных сістэм. Выпускнікам жа прысвойваецца кваліфікацыя «спецыяліст па геаінфармацыйных сістэмах».
Яшчэ адзін новы напрамак — «геадэмаграфія» на спецыяльнасці «геаграфія». Яго адкрыццё выклікана неабходнасцю эфектыўнага забеспячэння ўстойлівага сацыяльна-эканамічнага развіцця дзяржавы ў ХХІ стагоддзі і вырашэння праблем дэмаграфічнай бяспекі. Выпускнікі атрымаюць магчымасць працаўладкавання ў Нацыянальны статыстычны камітэт, Міністэрства эканомікі, Міністэрства працы і сацыяльнай абароны.
Таксама ў 2015 годзе ў Дзяржаўным інстытуце кіравання і сацыяльных тэхналогій БДУ адкрываецца новы напрамак «дызайн касцюма і тканін». Рыхтаваць будучых дызайнераў плануецца ў супрацоўніцтве з Нацыянальнай школай прыгажосці, Беларускім цэнтрам моды, Саюзам дызайнераў і студыяй моды Івана Айплатава. Мяркуецца, што маладыя дызайнеры будуць займацца праектаваннем новых матэрыялаў і вырабаў для лёгкай прамысловасці, змогуць выступаць у якасці экспертаў у ацэнцы касцюмаў і тканін і кіраваць дзейнасцю дызайнерскіх груп і падраздзяленняў. Спецыялісты будуць запатрабаваны ў дызайнерскіх майстэрнях адзення, на прадпрыемствах, арганізацыях і ва ўстановах сферы тэкстыльнай і лёгкай прамысловасці.
Адказваючы на пытанні журналістаў, Сяргей Абламейка паведаміў, што ў сувязі са складанай эканамічнай сітуацыяй колькасць заявак ад працадаўцаў можа сёлета аказацца меншай за колькасць выпускнікоў. Таму, магчыма, не ўсе «бюджэтнікі» змогуць атрымаць ад дзяржавы першае працоўнае месца.
— Звычайна кампаніі высылаюць нам свае заяўкі, а мы ўжо зводзім працадаўцаў з іх патэнцыяльнымі работнікамі, каб і наймальнікі, і студэнты былі задаволеныя. Але сёлета арганізацыі адклікаюць вельмі шмат сваіх заявак. Пагалоўна пішуць нам: адклікаем заяўку, адклікаем заяўку, адклікаем заяўку... Самі разумееце: няпоўны працоўны тыдзень, скарачэнне вакансій. Гэта рэальнасць. Таму неў-забаве выпускнікі будуць чакаць размеркавання з радасцю, а не з бояззю, — канстатаваў Сяргей Абламейка. — А студэнты-«платнікі» прасілі нас аб прадастаўленні першага працоўнага месца і ў папярэднія гады. Не так проста скончыць ВНУ і з 1 жніўня пайсці на працу. Хто цябе чакае? Але крытыкаў у сістэмы размеркавання заўсёды хапае. Хтосьці не хоча ехаць у раён, але ж усе ведалі, калі паступалі на «бюджэт», што наперадзе іх чакае размеркаванне. Правілы гульні былі вызначаны першапачаткова...
Надзея НІКАЛАЕВА.
Беларусь — адзін з сусветных лідараў у галіне здабычы і глыбокай перапрацоўкі торфу.
Прафесійна, аператыўна, па-добраму.