аб сучасным стане рэстаўрацыі
Дэпутаты наведалі Нацыянальны мастацкі музей і ацанілі, у якіх умовах працуецца беларускім рэстаўратарам. Візіт адбыўся ў межах выязнога пасяджэння Пастаяннай камісіі Палаты прадстаўнікоў Нацыянальнага сходу па адукацыі, культуры і навуцы.
«У красавіку ў парламент павінен паступіць праект Кодэкса аб культуры. Над ім мы працуем ужо на працягу года: знаёмімся з практыкай прымянення заканадаўства ў сферы культуры», — паведаміў старшыня камісіі Аляксандр Сягоднік. Парламентарый адзначыў, што будаўніцтва новых памяшканняў Нацыянальнага мастацкага музея прыцягвае ўвагу грамадзян. «Безумоўна, калі гэта цікавіць людзей, тады і дэпутатаў — у першую чаргу», — дадаў ён.
Дэпутат падкрэсліў, што Кодэкс аб культуры прадугледжвае ўсе напрамкі культурніцкай дзейнасці. Таму камісія працавала ў тым ліку і над зменамі і дапаўненнямі ў закон аб народнай творчасці, промыслах і рамёствах, бібліятэчнай справе, творчых саюзах. Дэпутат падкрэсліў, што пытанні аб зменах абмяркоўваліся з практыкамі, якія маюць непасрэднае дачыненне да гэтых сфер.
Асобная тэма пасяджэння — аднаўленне ўжо існуючых твораў. «Для нас вельмі балючае пытанне — гэта праблема рэстаўрацыі, захавання ўнікальных твораў мастацтва», — падзяліўся Уладзімір Пракапцоў, генеральны дырэктар Нацыянальнага мастацкага музея Рэспублікі Беларусь. Ён растлумачыў, што сёння ў нашай краіне ідзе падрыхтоўка рэстаўратараў у двух ВНУ — Беларускім дзяржаўным універсітэце культуры і мастацтваў і Беларускай дзяржаўнай акадэміі мастацтваў.
Але ў арганізацыі гэтай сферы не хапае сістэмнасці. Таму, напрыклад, не існуе перападрыхтоўкі па гэтай спецыяльнасці. Часта рэстаўрацыю праводзіць мастак, які не спецыялізуецца ў ёй. «Уявіце, што стаматолаг робіць працу хірурга», — метафарычна тлумачыць небяспеку такой сітуацыі дырэктар музея. І прапануе адно з канкрэтных выйсцяў — стварыць адпаведны цэнтр на базе музея, які будзе аказваць кваліфікаваныя паслугі па рэстаўрацыі.
Дэпутаты нездарма звяртаюць асаблівую ўвагу не толькі на пытанні рэстаўрацыі, але і культуры ўвогуле. «І інтэрнэт, і камп'ютарныя гульні забіраюць наш вольны час. А ёсць тое каштоўнае, што павінна быць у сэрцы кожнага. Куды мы павінны павярнуць сябе, сваіх родных, каб запанавала сапраўдная духоўнасць», — тлумачыць матывацыю паляпшаць стан культуры намеснік старшыні камісіі Наталля Кучынская.
Вераніка ПУСТАВІТ.
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.