Анджэй Дуда выйграў прэзідэнцкія выбары ў Польшчы

Другі тур выбараў прэзідэнта прайшоў у Польшчы ў нядзелю, 24 мая. Паводле апошніх звестак экзіт-пола, падрыхтаванага даследчым цэнтрам Ipsos, за Дуду прагаласавалі 52% выбаршчыкаў. Дзеючага лідара Браніслава Камароўскага падтрымалі 48% палякаў. Яўка ў другім туры выбараў, па папярэдніх дадзеных, склала 56,1%. У першым туры галасавання, які адбыўся 10 мая, актыўнасць выбаршчыкаў была менш - 48,96%.

Прэм'ер-міністр Польшчы Ева Копач паабяцала плённа супрацоўнічаць з новым прэзідэнтам рэспублікі. "Як кіраўнік урада я магу гарантаваць, што супрацоўніцтва паміж кабінетам міністраў і новым прэзідэнтам, калі пацвердзяцца вынікі апытанняў, будзе выдатным", - сказала яна, выказаўшы надзею, што апошнія месяцы дзеючага склікання ўрада будуць добрымі.