Учора парламенцкая дэлегацыя Рэспублікі Арменія сустрэлася з кіраўніцтвам абедзвюх палат беларускага парламента і ўзяла ўдзел у пасяджэнні Міжпарламенцкай камісіі па супрацоўніцтве. Беларусь і Арменію аб'ядноўвае не толькі савецкае мінулае, агульная Перамога ў Вялікай Айчыннай вайне, але і сумеснае членства ў Садружнасці Незалежных Дзяржаў, АДКБ, удзел у праграме ЕС «Усходняе партнёрства», а з пачатку гэтага года яшчэ і саюзніцкія адносіны ў рамках ЕАЭС. Бадай, апошняе павінна найбольш за ўсё наблізіць нашы краіны ў будучыні, бо мэты інтэграцыйнага аб'яднання, якое нядаўна стартавала, — свабодны рух тавараў, капіталу, паслуг і працоўнай сілы паміж саюзнікамі. Тым не менш, статыстыка няўмольна дэманструе адмоўную дынаміку менавіта ў гандлёва-эканамічных стасунках паміж Арменіяй і Беларуссю ў апошні час. Таваразварот за чатыры месяцы гэтага года скараціўся амаль на 30% у параўнанні з адпаведным перыядам мінулага. Нягледзячы на станоўчае сальда, наш экспарт у гэту краіну здаў па ўсіх пазіцыях і склаў усяго толькі 6 мільёнаў долараў ЗША. — Гандлёвыя адносіны нашых краін апошнім часам не адпавядаюць магчымасцям, — са шкадаваннем канстатаваў Уладзімір Андрэйчанка на сустрэчы з намеснікам старшыні Нацыянальнага сходу Арменіі Эдуардам Шармазанавым. — У нас ёсць шмат магчымасцей для ўзаемадзеяння — у сельскай гаспадарцы, па пастаўках тэхнікі, стварэнні прадпрыемстваў, адносна прамысловай кааперацыі. Мы гатовы пайсці на розныя захады ў плане лізінгавых паставак на тых умовах, якія будуць прымальныя для армянскага боку. На думку беларускага спікера, адным з варыянтаў паспяховага супрацоўніцтва таксама можа стаць праца на ўзроўні рэгіёнаў. Разам з тым палітычныя і гуманітарныя адносіны паміж Беларуссю і Арменіяй знаходзяцца на высокім узроўні. З гэтым пагаджаліся і прадстаўнікі армянскага парламента, і беларускі бок. Старшыня Савета Рэспублікі Міхаіл Мясніковіч адзначыў, што беларуска-армянскія адносіны маюць сістэмны характар. — Мы падтрымліваем адзін аднаго на міжнароднай арэне, — сказаў ён. — Напрыклад, беларускія і армянскія парламентарыі эфектыўна ўзаемадзейнічаюць у МПА СНД. У нас, на шчасце, няма прынцыповага рознагалосся, якое магло б негатыўна ўплываць на міждзяржаўныя адносіны. Стан і перспектывы гандлёва-эканамічнага супрацоўніцтва былі першым і самым доўгім па часе абмеркавання пытаннем дзявятага пасяджэння Міжпарламенцкай камісіі па супрацоўніцтве Нацыянальнага сходу Рэспублікі Беларусь і Нацыянальнага сходу Рэспублікі Арменія. У пасяджэнні ўзялі таксама ўдзел старшыня беларускай часткі Міжурадавай Беларуска-Армянскай камісіі па гандлёва-эканамічным супрацоўніцтве, міністр лясной гаспадаркі Беларусі Міхаіл Амельяновіч і прадстаўнікі міністэрстваў эканомікі і замежных спраў. Акрамя таго, парламентарыі дзвюх краін абмеркавалі міжнародныя стасункі і вынікі сумеснай работы па святкаванні 70-годдзя Перамогі савецкага народа ў Вялікай Айчыннай вайне. — У горадзе Брэсце 1 ліпеня мы, дзве парламенцкія дэлегацыі, ва ўрачыстай абстаноўцы адкрыем памятны знак — Хачкар — воінам-армянам, якія загінулі пры абароне Брэсцкай крэпасці, — паведаміў журналістам Віктар Гумінскі. Па выніках пасяджэння Міжпарламенцкай камісіі было вырашана працягнуць работу па стварэнні ў армянскім горадзе Гюмры прадпрыемства па зборцы беларускай сельгастэхнікі з выхадам на рынак трэціх краін, а таксама стварэнне ў Арменіі сэрвісных цэнтраў па абслугоўванні ўжо купленых беларускіх трактароў. Былі агучаны таксама ідэі па прадстаўленні паслуг па перавозцы грузаў беларускімі кар'ернымі самазваламі на горна-ўзбагачальных камбінатах Арменіі.
Вольга МЯДЗВЕДЗЕВА.
medvedeva@zviazda.by
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
