Брытанскае спецыялізаванае выданне THE апублікавала рэйтынг 800 найлепшых універсітэтаў свету Tіmes Hіgher Educatіon World Unіversіty Rankіngs. Белдзяржуніверсітэт стаў адзінай айчыннай ВНУ, якая за ўсю 12-гадовую гісторыю існавання рэйтынгу трапіла ў лік размеркаваных па ранжыру і заняла месца ў групе 601-800.
Рэйтынг рыхтуецца вядомым брытанскім часопісам Tіmes Hіgher Educatіon (THE) і лічыцца адным з найбольш прэстыжных і надзейных рэйтынгаў універсітэтаў свету.
У рэйтынг 2015-2016 года ўключаны вынікі ацэнкі дзейнасці 800 самых лепшых універсітэтаў. Сярод крытэрыяў ацэньвання вылучаюцца наступныя блокі: адукацыйная дзейнасць (удзельная вага ў агульнай ацэнцы 30%), навуковыя даследаванні (30%), цытаванасць навуковых прац (30%), міжнароднае супрацоўніцтва (7,5%) і інвестыцыі бізнесу ў навуковую дзейнасць (2,5%). Важнае значэнне мае акадэмічная і даследчая рэпутацыя ўніверсітэта (аналізуюцца вынікі апытання больш як 11 тысяч экспертаў). Пад увагу бяруцца таксама суадносіны колькасці студэнтаў і выкладчыкаў, падрыхтоўка кадраў вышэйшай кваліфікацыі (кандыдатаў і дактароў навук) і многія іншыя параметры.
«Рэйтынг Tіmes Hіgher Educatіon World Unіversіty Rankіngs заўсёды ўважліва і акуратна падыходзіць да стандартаў ацэнкі і прымяняе да ўсіх адзіныя жорсткія нормы ацэньвання, — падкрэслівае рэдактар рэйтынгу THE Філ Бэйці. — Вынікам нашага рэйтынгу давяраюць студэнты, іх бацькі, прадстаўнікі акадэмічнай сферы, кіраўнікі ўстаноў вышэйшай адукацыі і міністэрстваў. Беларускі дзяржаўны ўніверсітэт, які ўпершыню заняў месца ў групе 601-800 найлепшых універсітэтаў свету, можа ганарыцца сваімі выдатнымі дасягненнямі».
На верхнім радку рэйтынгу размясціўся Каліфарнійскі інстытут тэхналогій, за ім ідзе Оксфардскі ўніверсітэт, а замыкае тройку лідараў Стэнфард.
З нашых суседзяў у рэйтынгу THE 2015-2016 года вышэйшыя за Белдзяржуніверсітэт пазіцыі маюць восем расійскіх ВНУ: Маскоўскі дзяржаўны ўніверсітэт (161-я пазіцыя), Санкт-Пецярбургскі дзяржаўны політэхнічны ўніверсітэт (201—250), Томскі політэхнічны ўніверсітэт (251—300), Казанскі федэральны ўніверсітэт (251—300), Нацыянальны даследчы ядзерны ўніверсітэт МІФІ (301—350), Новасібірскі дзяржаўны ўніверсітэт (401—500), Санкт-Пецярбургскі дзяржаўны ўніверсітэт (401—500), Маскоўскі дзяржаўны тэхнічны ўніверсітэт імя Баўмана (501—600), а таксама Варшаўскі ўніверсітэт (501—600).
У адной групе з БДУ аказаліся Кіеўскі нацыянальны ўніверсітэт імя Тараса Шаўчэнкі і Вільнюскі ўніверсітэт. Яны, таксама як і БДУ, адзіныя прадстаўнікі ад сваіх краін, якія трапілі ў брытанскі рэйтынг.
Надзея НІКАЛАЕВА
nіkalaeva@zvіazda.by
Фота Надзеі БУЖАН
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!