Бывае, вядома, што маладыя людзі ўжо ад самага пачатку вучобы разглядаюць варыянты старту кар'еры і нават сумяшчаюць працу з наведваннем пар у ВНУ. Але больш распаўсюджаным з'яўляецца іншы сюжэт, у якім студэнт узгадвае пра канчатковую мэту сваёй прысутнасці ва ўніверсітэцкіх сценах толькі перад самым выпускам. І тым, і другім дапамагаюць так званыя Дні кар'еры, падчас якіх прадпрыемствы самі шукаюць для сябе маладыя кадры.
— Дзень кар'еры за тры гады існавання стаў для нас знакавым мерапрыемствам, — распавядае начальнік кадравай службы БДУ Наталля НЯПЕЎНАЯ. — Мы праводзім яго двойчы на год: увосень і ўвесну. Восенню студэнты ў першую чаргу шукаюць сабе месцы для праходжання практыкі і стажыроўкі, а вясной — для працаўладкавання. За гэты час у нас ужо з'явіліся пастаянныя партнёры, але штогод з'яўляюцца і навічкі. Сёлета мы паставілі рэкорд па колькасці кампаній, прадстаўленых на Дні кар'еры, — іх 20. Напрамкі самыя розныя: гэта і лагістыка, і банкаўская сфера, і ІT, і вытворчыя прадпрыемствы самых розных адгалінаванняў.
Расказвае спецыяліст упраўлення па рабоце з персаналам кампаніі Brіtіsh Amerіcan Tobacco Кацярына ШУХАВА:
— Сёння мы займаемся прасоўваннем унікальнай для Беларусі праграмы Management Traіnee. Яе сутнасць у тым, што абсалютна любы студэнт без аніякага працоўнага вопыту можа ўладкавацца да нас і на працягу двух гадоў прайсці «баявое хрышчэнне». Напрыклад, калі суіскальнік прыходзіць на спецыяльнасць «Маркетынг», то за гэты час ён паспявае папрацаваць ва ўсіх адгалінаваннях: брэнд-маркетынгу, трэйд-маркетынгу, аддзеле развіцця рынку і гэтак далей. Кажучы прасцей — убачыць механізм кампаніі знутры на свае вочы. Гэта дае яму магчымасць дакладна вызначыцца са сваёй будучыняй і, акрамя таго, зарабіць той неабходны досвед. Але ёсць і патрабаванні з нашага боку, у першую чаргу — веданне англійскай мовы. Мы — міжнародная кампанія, да таго ж сваіх студэнтаў абавязкова адпраўляем стажыравацца за мяжу.
Удзельнічалі ў Дні кар'еры і прадпрыемствы, якія шукалі спецыялістаў практычна любога профілю. Напрыклад, кампанія «Анега», беларускі вытворца снэкаў.
— У наступным годзе мы плануем запусціць новую пляцоўку завода, — кажа менеджар па падборы персаналу кампаніі Кацярына САВІЧ, — а таму актыўна шукаем новых супрацоўнікаў, прычым ва ўсе сферы: лагістыку, эканоміку, бухгалтэрыю, ну і, вядома, на саму вытворчасць. Увогуле, мы вельмі актыўна супрацоўнічаем з БДУ, штогод да нас прыходзяць працаваць выпускнікі ўніверсітэта, у тым ліку і па размеркаванні. Узроўнем спецыялістаў мы задаволены, думаю, гэта ўзаемавыгаднае супрацоўніцтва, бо наша кампанія заўсёды імкнулася рабіць стаўку на маладых і расці разам з імі.
Насамрэч, на мерапрыемстве можна было не толькі паразмаўляць непасрэдна з патэнцыйным працадаўцам, але і навучыцца шукаць сабе працу самастойна. Фарыда Глінская і Вольга Рыбакова прадстаўлялі ўвазе наведвальнікаў
партал Praca.by, пры дапамозе якога студэнты могуць адсочваць вакансіі па сваіх спецыяльнасцях.
Ці стаў Дзень кар'еры карысным для студэнтаў? Мяркуючы па водгуках працадаўцаў і задаволеных тварах суіскальнікаў, так.
— Я прыйшла сюды, каб адшукаць першае месца працы, — распавяла Лізавета ГРАКОВІЧ, студэнтка ІV курса Інстытута бізнесу і менеджменту тэхналогій. — У гэтым навучальным годзе атрымаю адукацыю па спецыяльнасці «Лагістыка», і трэба будзе некуды ўладкоўвацца. Я «платніца», а таму размеркаванне мяне не чакае, вось і шукаю працу самастойна. Дзве прапановы спадабаліся, пакінула свае кантакты. Спадзяюся, усё атрымаецца.
— Мяне таксама зацікавіла прапанова адной з кампаній, — дзеліцца яе аднакурсніца Анастасія ЗВЯРУГА. — Пасля двухмесячнай аплачваемай стажыроўкі ўжо можна працаваць, гэта выдатная магчымасць. Работу шукаю па спецыяльнасці, і добра, што мы можам выбіраць з такой колькасці працадаўцаў.
— Акрамя ведаў, добраму спецыялісту, асабліва майго профілю, патрэбны сувязі, — лічыць студэнтка ІV курса спецыяльнасці «Інфармацыя і камунікацыя» Інстытута журналістыкі БДУ Хрысціна ДАРАПЕЙ. — Менавіта па іх я сюды і прыйшла. Тут шмат цікавых людзей з самых розных кампаній, а спецыялісту па сувязях з грамадскасцю мець такіх знаёмых не будзе лішнім. Ды і ўвогуле, цікава, што думаюць пра сённяшні стан рынку працы дасведчаныя людзі. Дзень кар'еры — выдатнае мерапрыемства для кожнага, хто зацікаўлены ва ўласным развіцці не толькі ва ўніверсітэцкіх аўдыторыях.
Яраслаў ЛЫСКАВЕЦ
lyskavets@zvіazda.by
Фота Марыны Бегунковай
Мерапрыемства праводзіцца на добраахвотнай аснове.
Не выявіць ні секунды абыякавасці.
