Вы тут

У сталіцы прайшоў конкурс юных распрацоўшчыкаў відэагульняў


Беларуская камп'ютарная гульня — даўно не аксюмаран, а звыклая справа. Айчынныя «айцішнікі» даволі паспяхова займаюцца распрацоўкай забаўляльных праграм, а славутая World of Tanks штогод ставіць усё новыя і новыя сусветныя рэкорды па колькасці гульцоў анлайн і іншых паказчыках. Трэба сказаць, што для цяперашніх распрацоўшчыкаў ужо падрастае змена — гэта пацвердзіў конкурс «Патрыёт.by», што прайшоў у Рэспубліканскім цэнтры інавацыйнай і тэхнічнай творчасці (РЦІіТТ).


Ва­ле­рыя Ка­сі­ла прад­стаў­ляе ўва­зе чле­наў жу­ры пра­ект «Бе­ла­рус­кія пры­сма­кі».

На конкурс з'ехаліся хлопцы і дзяўчаты ва ўзросце ад 12 да 21 года з усіх куткоў краіны. Пераможцаў вызначалі ў дзвюх намінацыях. У першай удзельнічалі камп'ютарныя гульні і творчыя праекты, прысвечаныя тэме барацьбы беларусаў падчас Вялікай Айчыннай вайны і подзвігам беларусаў пры вызваленні іншых краін. У другой — гульні і праекты на тэму нашай гісторыка-культурнай спадчыны, традыцый, дасягненняў беларусаў у розных сферах. — Гэта ўжо пяты такі конкурс, — зазначыў на адкрыцці дырэктар РЦІіТТ Сяргей САЧКО. — І прагрэс відавочны: узровень распрацовак павышаецца. Таму плануем, што ўжо ў наступным годзе конкурс стане больш маштабным, з'явяцца новыя намінацыі. Але галоўная тэматыка застанецца нязменнай — патрыятычная.

Менавіта выхаваць у маладога пакалення пачуццё любові да сваёй краіны — наша галоўная задача. Агляд праектаў праходзіў па дзвюх узроставых катэгорыях: 12-15 і 16-21 гады. Мы накіраваліся да самых малодшых удзельнікаў. Пераважная большасць распрацоўшчыкаў спынілася на фармаце камп'ютарнай віктарыны, бо ён не патрабуе прафесійных ведаў і параўнальна просты ў рэалізацыі. Але тэмы закраналіся самыя розныя. Часцей за ўсё яны насілі лакальны характар — гісторыя і культура малой радзімы юных аўтараў. Напрыклад, вучаніца полацкай сярэдняй школы №6 стварыла віктарыну пад назвай «Полацкія лабірынты». Асновай для праекта паслужыла вядомая, пэўна, кожнаму, хто меў справу з камп'ютарам, праграма PowerPoіnt з пакета Mіcrosoft Offіce. Гульня задае рознага кшталту пытанні па гісторыі і сучаснасці Полаччыны, а задача ўдзельнікаў — як мага хутчэй і правільней на іх адказаць. Пасля праграма вылічвае сумарны бал. Марыя Самайловіч з Мінска выбрала больш буйны, рэспубліканскі маштаб і прадставіла гульню «Мая Беларусь». Гэта таксама віктарына, але па фармаце бліжэйшая да добра вядомай «Што? Дзе? Калі?», нават з такімі ж музычнымі паўзамі.

Яшчэ адна перавага — наяўнасць відэапытанняў. Вучань крупскай гімназіі Мікіта Рогаў стварыў гульню-квэст паводле славянскіх легендаў пад назвай «Археолаг». Згодна з аўтарскай задумай, атрад археолагаў даследуе старажытнасць і адначасова даведваецца пра такіх прадстаўнікоў беларускага пантэона, як Пярун, Сварог, Зюзя і іншыя. Ілья Каралёнак з барысаўскай сярэдняй школы №9 вырашыў расказаць гульцам пра малавядомыя турыстычныя аб'екты на тэрыторыі Міншчыны — праект «Незвычайнае ў звычайным». Клікам па розных месцах карты можна знайсці інфармацыю пра такія цікавыя славутасці, як клецкі дуб і цудадзейная крыніца ў вёсцы Покрашава, што на Случчыне... Валерыя Касіла з дзятлаўскай гімназіі №1 стварыла праект «Беларускія прысмакі», прысвечаны традыцыйнай кухні. У некаторых заданнях, напрыклад, трэба было адасобіць першыя стравы ад другіх, дапоўніць няскончаныя прыказкі, суаднесці стравы і святы, на якія яны падаваліся. — На жаль, цяпер не ўсе ведаюць, чым харчаваліся нашы продкі, — дзеліцца меркаваннем аўтарка «Беларускіх прысмакаў». — Мне падалося, што такі праект можа выправіць сітуацыю. Дарэчы, сама я вельмі люблю нашы стравы, асабліва бабуліны дранікі і зацірку.

Яраслаў ЛЫСКАВЕЦ

lyskavets@zvіazda.by

Фота Сяргея НІКАНОВІЧА

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.