Мінск — разумны горад

Замежныя спецыялісты ацанілі праекты брэнда сталіцы

У межах міжнароднага фестывалю тэрытарыяльнага маркетынгу і брэндынгу ОРЕN, што прайшоў у Мінску 20 і 21 чэрвеня, адбылося пасяджэнне "круглага стала" на тэму "Ад брэнда Мінска да брэнда Беларусі". Удзельнікі абмеркавалі існуючыя праекты сталічнай сімволікі і атрымалі парады ад замежных экспертаў.

На мерапрыемстве, што адбылося ў будынку Нацыянальнага гістарычнага музея, сабраліся вядучыя спецыялісты па меркетынгу з самых розных краін: Беларусі, Вялікабрытаніі, Расіі, ЗША, Іспаніі, Партугаліі, Нідэрландаў і многіх іншых. Спачатку свой праект брэнда Мінска

прэзентавала брытанская кампанія ІNSTІD, якая летась у ліпені выйграла тэндар і займаецца распрацоўкай сталічнага брэнда. Менавіта па выніках яе працы і будзе створаны канчатковы варыянт стылістычнага афармлення Мінска.

Брытанскі праект заснаваны на прынцыпе "разумнага горада". Менавіта такой яны прапануюць пазіцыяніраваць беларускую сталіцу. "Мы задаліся пытаннем: які ж сённяшні Мінск? Чым ён адрозніваецца ад іншых? — патлумачыла дырэктар кампаніі ІNSTІD па даследаваннях Наталля Гранд. — І прыйшлі да высновы, што Мінск — гэта горад розуму і інтэлекту. Гэта горад, які адрозніваецца ад іншых сваёй цягай да развіцця".

Вынікам працы кампаніі стане брэндбук — поўнае апісанне брэнда і яго прымянення на самых розных носьбітах. Першыя яго прыклады з'явіліся ў сеціве ўжо даволі даўно. Галоўныя колеры, якія ўжываюцца ў візуальным афармленні аб'ектаў, — белы і блакітны. Яны спалучаюцца і ў распрацаваным кампаніяй ІNSTІD мінскім арнаменце. Усе візуальныя элементы могуць выкарыстоўвацца пры афармленні афіш, грамадскага транспарту, візітовак, дакументаў, пісьмовых прылад, кубкаў і многіх іншых прадметаў. Акрамя выключна візуальнага афармлення, брытанская кампанія займаецца праектам па стварэнні фірменных страў, мелодый і нават... паху Мінска. Гатовы брэндбук будзе прадстаўлены сталічнай аўдыторыі ў ліпені.

Пасля ІNSTІD слова ўзяла грамадская ініцыятыва "Зборная Мінска па брэндзінгу", якая паралельна з брытанцамі распрацавала свае, альтэрнатыўныя праекты брэнда сталіцы. Стварэннем альтэрнатыўных варыянтаў займалася некалькі груп, многія ўдзельнікі якіх не з'яўляюцца прафесіяналамі ў брэндзінгу. Вынікам сталі тры праекты: "Мінск: калі ласка!" ад партала TUT.BY, "Nісе tо Mіnsk уоu!" ад брэндзінгавай кампаніі "Fаbulа" і "Неверагодны Мінск" ад студыі Іdfіх.bу.

Варыянт брэнда ад кампаніі ІNSTІD, што і будзе нарэшце прыменены ў сталіцы, у свой час выклікаў неадназначную рэакцыю мінчан у сеціве. Многія крытыкавалі канцэпцыю "разумнага горада". Пасяджэнне "круглага стала" было праведзена дзеля таго, каб мінчане і брытанцы нарэшце прыйшлі да паразумення. Аднак падчас абмеркавання праектаў удзельнікі часам ледзь не даходзілі да сапраўднай сваркі. Нарэшце, сваё слова сказала журы, складзенае з замежных спецыялістаў па брэндзінгу. Яны высока ацанілі ўсе варыянты, аднак адзначылі, што памылкай кампаніі ІNSTІD быў нізкі ўзровень прыцягнення мінчан да стварэння ўласнага брэнда. Малаверагодна, што брытанцы будуць уносіць змены ў свой праект, бо да здачы брэндбука засталося зусім мала часу.

Яраслаў ЛЫСКАВЕЦ.