"Зорныя" і іншыя ўдзельнікі і госці міжнароднага фестывалю мастацтваў "Славянскі базар у Віцебску" падчас фэсту змогуць навучыцца чаканіць манеты, паўдзельнічаюць у стварэнні вырабаў са шкла падчас майстар-класаў майстроў з Украіны. Яны, як і ўмельцы з іншых краін, "прапішуцца" на кірмашы народных рамёстваў і мастацтваў "Задзвінскі кірмаш-2013", які адкрыецца 10 ліпеня на тэрыторыі культурна-гістарычнага комплексу "Залатое кольца горада Віцебска "Дзвіна"
. У розныя гады правядзення "базару" гэты кірмаш, які больш вядомы як "Горад майстроў", наведалі Мікалай Баскаў, Барыс Маісееў, Надзея Бабкіна, Тамара Гвердцытэлі і іншыя вядомыя персоны. Потым яны шчыра дзяліліся з рэпарцёрамі сваімі прыемнымі ўражаннямі. А ўмельцы, у сваю чаргу, не без гонару расказвалі аб тым, хто з "зорак" што ў іх купіў і што паспрабаваў зрабіць сваімі рукамі падчас майстар-класа.
Паводле слоў каардынатара кірмашу Зоі Гаршковай, з розных краін ужо паступіла больш за 600 заявак ад ахвотных узяць удзел у кірмашы пад адкрытым небам. І большасць — каля 400 чалавек — прадставяць вырабы народнай творчасці.
Упершыню на кірмашы запрацуе падворак гасцей з Літвы, дзе майстэрства прадэманструюць рамеснікі з Літоўскай асацыяцыі старадаўніх уменняў і культурнай спадчыны "Свята ўсім". А літоўскія кухары, якія працягваюць традыцыі нацыянальнай кухні, запросяць пакаштаваць стравы. Расійскія ўмельцы прыадкрыюць таямніцы апрацоўкі бяросты і мастацтва ласкутнага шыцця.
Майстры з розных краін возьмуць удзел у конкурсе разьбы па дрэве.
У праграме правядзення кірмашнага "марафону" і міжнародны фестываль дзіцячай і моладзевай творчасці "Вясёлка над Віцебскам", які прысвечаны яднанню нацыянальных культур. Гледачы таксама ўбачаць выступленні актывістаў клубаў гістарычнай рэканструкцыі культурна-гістарычнага комплексу "Залатое кольца горада Віцебска "Дзвіна". Падчас кірмашу правядуць канцэртную праграму "Сузор'е талентаў" з удзелам беларускіх калектываў мастацкай самадзейнасці.
А 14 ліпеня на тэрыторыі вышэйназванага культурнага комплексу адбудзецца гала-канцэрт лаўрэатаў міжнароднага фестывалю творчасці інвалідаў "Віцебск-2013" — своеасаблівага "паралімпійскага" "базару" мастацтваў.
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.