Не быць "Базару" без мантажнікаў!

Мінскі дзяржаўны прафесійна-тэхнічны каледж мантажных і пад'ёмна-транспартных работ прапануе навучанне па васьмі рабочых, вельмі запатрабаваных на сучасным рынку працы спецыяльнасцях. Навучанне ў каледжы — гэта не толькі якасная тэарэтычная і практычная падрыхтоўка, але і магчымасць правесці гады вучобы з максімальным камфортам. Дастаткова назваць такія жыццёва важныя моманты, як бясплатнае харчаванне ў сталовай, якая нагадвае лепшыя кавярні горада, і магчымасць займацца самымі рознымі відамі спорту ў выдатных трэнераў. У хуткім жа часе для іншагародніх гэта будзе яшчэ і пражыванне ў адрамантаваным інтэрнаце. Па заканчэнні каледжа неабходна на працягу аднаго года адпрацаваць на адным з мінскіх прадпрыемстваў. Надалей нішто не перашкаджае працягнуць вучобу і ў ВНУ.

Рабочая спецыяльнасць — сініца ў руках

Сёння, дарэчы, многія выпускнікі школ адразу нацэльваюцца на атрыманне вышэйшай адукацыі. Прычым без уліку ўласных здольнасцяў, а проста, як той казаў, "дзеля корачкі". Аднак рабочая спецыяльнасць — гэта заўсёды магчымасць рэальнага падзаробку, "сініца ў руках". Да таго ж стаць навучэнцам прэстыжнай прафесійна-тэхнічнай установы стала не так складана — з-за той дэмаграфічнай сітуацыі, якая склалася. Самі прафесійныя тэхнічна-навучальныя ўстановы ўсяляк імкнуцца заахвочваць моладзь на вучобу ў сваіх сценах, паколькі важнасць, неабходнасць рабочых спецыяльнасцяў у нашым паўсядзённым жыцці ніхто не адмяняў.

— Наш каледж — адзіная навучальная ўстанова ў краіне, якая рыхтуе такіх спецыялістаў, як машыніст вежавага крана і мантажнік вонкавых трубаправодаў, — расказвае дырэктар Мінскага дзяржаўнага прафесійна-тэхнічнага каледжа мантажных і пад'ёмна-транспартных работ Таццяна ЯСТРАБ. — Другі год запар адзіныя ў горадзе мы рыхтавалі вадзіцеля грузавога аўтамабіля міжнароднай перавозкі — для арганізацый, якія займаюцца міжнароднымі транспартнымі перавозкамі. Спецыяльнасці ў нас такія, што прымаем на навучанне толькі юнакоў. Хіба на спецыяльнасць "Машыніст маставога крана" могуць прымацца дзяўчаты.

Асноўныя "спажыўцы" нашых кадраў — нашы даўнія сябры, з якімі заключаны адпаведныя дамоўленасці. Гэта ААТ "Белэлектрамантаж", "Прамтэхмантаж", "Упраўленне механізацыі № 79", "Трэст-15 "Спецбуд", ЗАТ "Электрасэрвісбуд", а нядаўна да гэтага спіса далучылася і Беларуская асацыяцыя міжнародных аўтаперавозчыкаў. Мы маем права рыхтаваць кадры для прадпрыемстваў і арганізацый рознай формы ўласнасці. Штогадовыя заяўкі дасылаюць самыя розныя арганізацыі, аднак перавагу мы аддаём, вядома, дзяржаўным і тым, з кім супрацоўнічаем даўно. Вядома, заявак паступае заўсёды больш, чым мы можам прапанаваць. А калі так, то наш выпускнік мае гарантаванае працоўнае месца. Узяць на падрыхтоўку больш навучэнцаў пакуль не дазваляюць магчымасці. Гэта пацягне за сабой павелічэнне педагагічнага складу. А сёння з гэтым не проста. Да таго ж выкладчык для падрыхтоўкі спецыялістаў вежавага крана — наогул дэфіцыт. Іх не рыхтуюць, а таму мы запрашаем некага з ліку практыкаў, хто непасрэдна працуе на такой тэхніцы.

Мы рыхтуем па спецыяльнасцях, запатрабаваных на прадпрыемствах горада. На некаторыя ідуць толькі іншагароднія. Гэта нармальна. Не ўсе жадаюць застацца на прапанаваным месцы пасля абавязковай адпрацоўкі. Многія хочуць усяго і адразу, неадэкватна расцэньваюць свае здольнасці і магчымасці. І маладым людзям, і іх бацькам мы спрабуем тлумачыць: аўтаслесар — гэта не той, хто проста так атрымлівае вялікі заробак. А той, хто валодае тэхнічным мысленнем, ведае асновы фізікі і механікі і г.д. Толькі так можна разлічваць на паступовае павышэнне аплаты сваёй працы. Ёсць прафесіі, як, скажам, мантажнік вонкавых трубаправодаў, дзе трэба круглы год працаваць пад адкрытым небам. Непрывабная праца, хоць і добра аплачваецца. Наша задача як адукацыйнай установы — расказаць пра значнасць гэтай прафесіі, падкрэсліць яе важнасць. Ці ўзяць мантажніка металаканструкцый — без такога спецыяліста не адбудзецца ніводнае канцэртнае шоу пад адкрытым небам, у тым ліку такое значнае мерапрыемства, як "Славянскі базар у Віцебску"...

Нашаму будынку 59 гадоў, і тут ніколі не было капітальнага рамонту. Аднак за апошнія пяць гадоў многае ўдалося змяніць, адрамантаваць і аднавіць фактычна ўсё, заканчваючы гаспадарчымі памяшканнямі. Можна сказаць, удасканалілі матэрыяльную базу на 90 працэнтаў. Цяпер у парадку і кабінеты, і калідоры. Пры гэтым мы не ўзялі з бюджэту ні капейкі. Усё зроблена, што называецца, уласнымі рукамі, за ўласныя сродкі і сродкі нашых базавых прадпрыемстваў і арганізацый, з якімі мы цесна супрацоўнічаем.

Прыгожую агароджу на тэрыторыі каледжа зрабілі зваршчыкі першага курса. Работы, звязаныя з металам, — вельмі дарагія. Так што мы і тут унеслі значную эканомію ў бюджэт горада, а разам з тым атрымалі выдатны прадмет для гонару.

На базе каледжа працуе аўташкола па падрыхтоўцы ўсіх ахвотных на катэгорыю "В" і перападрыхтоўцы з катэгорыі "В" на "С". Для гэтых мэт ёсць свой аўтадром і аўтатранспарт — легкавы і грузавы. Да пачатку новага вучэбнага года набудзем яшчэ два новыя аўтамабілі "МАЗ" з прычэпамі, каб павысіць якасць і пашырыць спектр падрыхтоўкі. Плануем рыхтаваць вадзіцеляў катэгорыі "С" і "Е". Аказанне такіх платных паслуг дае магчымасць павысіць заработную плату нашым работнікам і накіраваць сродкі на паляпшэнне матэрыяльнай базы каледжа. У горадзе падрыхтоўку вадзіцеляў ажыццяўляюць каля 70 арганізацый. Сярод вучэбных устаноў па здачы экзаменаў у ДАІ з першага разу наша ўстанова займае годнае чацвёртае месца.

Мы спартыўныя

— У Партызанскім раёне сярод устаноў прафесійнай і сярэдняй спецыяльнай адукацыі больш за 15 гадоў менавіта наш каледж з'яўляецца пераможцам круглагадовай спартакіяды — у нас першыя месцы па шэрагу відаў спорту, — тлумачыць выканаўца абавязкаў кіраўніка фізічнай падрыхтоўкі Мікалай АЎРАМЕНКА, які працуе ў каледжы вось ужо амаль 25 гадоў і сцвярджае, што тут заўсёды належная ўвага надавалася фізічнаму выхаванню. — Наш навучэнец заняў першае месца па лёгкай атлетыцы ў Беларусі два гады таму. Захоўваем нават кубак ад Міністэрства спорту і турызму. Выпускнікі каледжа — удзельнікі Алімпійскіх гульняў, чэмпіёны свету і Еўропы па розных відах спорту. Займаем першыя і другія месцы па паўэрліфтынгу — сілавым трохбор'і, настольным тэнісе, кросе, баскетболе, валейболе, футболе... У гарадской спартакіядзе ў нас пятае агульнакаманднае месца, прайграем толькі дастойным сапернікам, дзе навучэнцаў значна больш, чым у нас. Запрашаем у якасці выкладчыкаў тых ці іншых секцый нават майстроў спорту. Асабіста я выкладаю паўэрліфтынг... У нас добрая і трэнажорная зала. Прычым трэнажоры зрабіў наш работнік, майстар вытворчага навучання, Уладзімір Макоўскі.

Мы вядомыя

Выпускнікамі Мінскага дзяржаўнага прафесійна-тэхнічнага каледжа мантажных і пад'ёмна-транспартных работ з'яўляюцца: старшыня Мінгарвыканкама ў 1989 годзе Станіслаў ЛУКАШЭВІЧ, намеснік Дзяржаўнага сакратара Савета Бяспекі ў 2008 годзе Уладзімір ШАФАРЭНКА, суддзя Мінскага гарадскога суда Аляксандр ВАСІЛЕВІЧ, намеснік генеральнага дырэктара МТЗ у 2000 годзе Канстанцін БЛЕШЧЫК, намеснік генеральнага дырэктара ФК "Дынама-Мінск" Віктар АСАДОЎСКІ, салісты групы "Тяни-Толкай" Андрэй ЗАЯЦ і Павел КЛЫШЭЎСКІ, прызёр чэмпіянату свету, удзельнік Алімпійскіх гульняў па лёгкай атлетыцы Яўген МІСЮЛЯ, чэмпіёнка рэспублікі, майстар спорту па лёгкай атлетыцы Настасся СТАРАВОЙТАВА, бронзавы прызёр чэмпіянату Еўропы па паўэрліфтынгу Максім ЯЛОВІК, член зборнай Рэспублікі Беларусь па футболе Сяргей ШПАНЮК, чэмпіён рэспублікі, майстар спорту па лыжных гонках Аляксей ШЫНКАРОЎ і інш.

Рады запрасіць

— Сёння найбольшай папулярнасцю карыстаецца спецыяльнасць "Слесар па рамонце аўтамабіляў; вадзіцель аўтамабіля катэгорыі С", — кажа член прыёмнай камісіі Людміла АСВЕЦІМСКАЯ. — Заявы падаюць з рознымі атэстатамі. Будзем спадзявацца, усе стануць нашымі навучэнцамі і застануцца задаволенымі тым, што выбралі наш каледж.

Пасля 9 класаў (тэрмін навучання — 3 гады)

*Электрагазазваршчык; электразваршчык на аўтаматычных і паўаўтаматычных машынах.

*Электрамантажнік па электраабсталяванні, сілавых і асвятляльных сетках.

*Слесар па рамонце аўтамабіляў; вадзіцель аўтамабіля катэгорыі "С".

Пасля 11 класаў

*Машыніст маставога крана; стропальшчык. Тэрмін навучання 1 год.

*Электраманцёр па рамонце і абслугоўванні электраабсталявання. Тэрмін навучання 1 год.

*Машыніст крана аўтамабільнага; стропальшчык; вадзіцель катэгорыі "С". Тэрмін навучання 1 год 6 месяцаў.

*Вадзіцель аўтамабіля катэгорыі "С" (міжнародныя перавозкі); слесар па рамонце аўтамабіляў. Тэрмін навучання 1 год.

Усе навучэнцы забяспечваюцца:

— бясплатным харчаваннем;

— бясплатнай вучэбнай літаратурай;

— бясплатным спецадзеннем;

— гарантаваным працоўным месцам па заканчэнні каледжа;

— магчымасцю навучання на вадзіцеля катэгорыі "В" і "С".

Урокі ваджэння

— Мы рыхтуем вадзіцеляў па спецыяльнасцях "Машыніст крана аўтамабільнага; стропальшчык; вадзіцель катэгорыі "С", "Слесар па рамонце аўтамабіляў; вадзіцель аўтамабіля катэгорыі "С". "Вадзіцель аўтамабіля катэгорыі "С" (міжнародныя перавозкі), слесар па рамонце аўтамабіляў", — нагадвае загадчык аддзялення падрыхтоўкі вадзіцеляў Генадзь АЗАРАЎ. — Сёння ідуць заняткі перападрыхтоўкі з катэгорыі "В" на катэгорыю "С" і падрыхтоўка навучэнцаў па катэгорыі "С". Вы можаце бачыць практычнае ваджэнне на грузавым аўтамабілі будучага аўтаслесара Аляксандра МАТУША. Майстар вытворчага навучання Леанід САРНАЎСКІ праводзіць з кожным курсантам заняткі па 2 гадзіны.

Няхай мяне навучаць

*Прадстаўніка такой прафесіі, як электрагазазваршчык, можна сустрэць на самых розных прадпрыемствах і будоўлях. Ніводная галіна народнай гаспадаркі не можа абысціся без зварачных работ, паколькі зварка з'яўляецца адным з вядучых тэхналагічных працэсаў таго ж машынабудавання і будаўнічай індустрыі.

Прамысловая вытворчасць, навука і тэхніка звязаны са зварачнай вытворчасцю. Развіваецца ўльтрагукавая, лазерная, плазменная зварка.

Электрагазазваршчык выконвае работы па пракладцы і мантажы вода- і газазабеспячэння, сістэм тэхналагічных трубаправодаў на прадпрыемствах, ведае асноўныя тэхналагічныя і вытворчыя працэсы, вартасці матэрыялаў, якія прымяняюцца, тэхналагічную дакументацыю, валодае неабходным інструментам і прыстасаваннямі, выконвае стропальныя і такелажныя работы.

Электрагазазваршчык ажыццяўляе зварачныя работы падчас зваркі металаканструкцый, рамонце абсталявання, пры выкананні будаўнічых работ. Вырабляе ручную электрадугавую і газавую зварку канструкцый трубаправодаў з рознай сталі, каляровых металаў і сплаваў.

*Электрамантажнік па электраабсталяванні, сілавых і асвятляльных сетках на вытворчай практыцы і па завяршэнні каледжа выконвае работы на аб'ектах будаўніча-мантажных арганізацый — электрастанцыях, прамысловых прадпрыемствах; ажыццяўляе мантаж другасных ланцугоў. Выконвае таксама работы па разметцы, укладцы і мантажы кабельных трас, мантаж пускарэгулявальнай і сігнальнай апаратуры, шчытоў і пультаў кіравання механізмамі, скрыняў з нізкавольтнай апаратурай, токападводзячых ліній.

*Слесар па рамонце аўтамабіляў, вадзіцель аўтамабіля катэгорыі "С" рамантуе грузавыя, легкавыя аўтамабілі і аўтобусы. Здымае, разбірае, рамантуе і рэгулюе агрэгаты і вузлы. Падчас рамонту выконвае розныя слясарныя работы. Ажыццяўляе выпрабаванні агрэгатаў, абкатку аўто. Павінен ведаць канструктыўныя асаблівасці аўтамабіляў і агрэгатаў; электрычныя і мантажныя схемы аўтамабіляў; асноўныя віды, вартасці і правілы выкарыстання падчас рамонту электратэхнічных і ізаляцыйных матэрыялаў, вартасці металаў, якія падлягаюць апрацоўцы; метады выяўлення і спосабы выдалення дэфектаў; парадак афармлення прыёмна-здатачнай дакументацыі. Вытворчае навучанне адбываецца ў вучэбных майстэрнях, аўтамабільнай лабараторыі, дыягнастычным цэнтры каледжа і на прадпрыемствах горада.

*Да ліку масавых прафесій у будаўнічым комплексе адносіцца прафесія машыніста аўтамабільнага крана. На малапавярховых аб'ектах сельскага будаўніцтва, у месцах камунікацый жыллёва-камунальнай гаспадаркі аўтамабільны кран з'яўляецца вядучай машынай для выканання мантажных і пагрузачна-разгрузачных работ. На будпляцоўках, дзе вядучай машынай становіцца вежавы кран, аўтакраны выконваюць дапаможныя пагрузачна-разгрузачныя аперацыі, укладваюць штабелі, падаюць матэрыялы на невялікія прыбудовы і г.д.

*Вадзіцель аўтамабіля катэгорыі "С" (міжнародныя перавозкі), слесар па рамонце аўтамабіляў кіруе адзіночнымі грузавымі аўтамабілямі ўсіх тыпаў і марак катэгорыі "С". Кіруе пад'ёмным механізмам самазвала, помпавай устаноўкай аўтацыстэрны, халадзільнай устаноўкай рэфрыжэратара і іншым абсталяваннем спецаўтамабіляў. Правярае тэхнічны стан і прыём аўтамабіля перад выездам на маршрут. Падае аўтамабілі пад пагрузку і разгрузку грузаў. Забяспечвае захаванне грузу. Выдаляе дробныя эксплуатацыйныя няспраўнасці, якія не патрабуюць разборкі механізмаў. Афармляе пуцявыя дакументы. Рамантуе і збірае дызельныя, спецыяльныя грузавыя аўтамабілі, аўтобусы, імпартныя легкавыя аўтамабілі, грузавыя пікапы і мікрааўтобусы. Разбірае, рамантуе і збірае складаныя агрэгаты, вузлы і прыборы, мяняе іх пры тэхнічным абслугоўванні і інш.

Святлана БАРЫСЕНКА,

Аляксандр ФУРСАЎ.

Фота Надзеі БУЖАН.

УНП 100420069