Нясвіж і Радзівілы: карэнні, вытокі, узнясенне

У Нацыянальнай бібліятэцы Беларусі прайшла прэзентацыя кнігі Анатоля Бутэвіча "Таямніцы Нясвіжскага замка"

Вітаючы аўтара кнігі, якая выйшла ў выдавецкім доме "Звязда", намеснік міністра культуры Рэспублікі Беларусь Васіль Чэрнік зазначыў і вялікую грамадскую актыўнасць пісьменніка, гісторыка, чалавека, які надзіва шмат робіць для захавання, зберажэння гісторыка-культурнай спадчыны нашай Айчыны. Гэтая думка была фактычна лейтматывам і ў выступленнях старшыні Беларускага фонда культуры Уладзіміра Гілепа

, намесніка старшыні Беларускага Саюза мастакоў Рыгора Сітніцы, дырэктара Нацыянальнага мастацкага музея Беларусі Уладзіміра Пракапцова, дырэктара нясвіжскага палацава-паркавага ансамбля Сяргея Клімава ды многіх іншых гасцей святочнай імпрэзы.

Варта заўважыць, што гэтая кніга для Анатоля Іванавіча зусім не выпадковая. Ён працуе над серыяй мастацка-публіцыстычных даследаванняў, прысвечаных замкам Беларусі. Раней пабачыла свет кніга пра Мірскі замак. У планах пісьменніка — праца над расповедам пра Крэва. А яшчэ Анатоль Бутэвіч — ураджэнец старажытнай Нясвіжскай зямлі. Добра ведае мясціны, авеяныя славай Радзівілаў.

—Лічу Анатоля Іванавіча і адным з адметных гісторыкаў сённяшняй Беларусі, — зазначыў у сваім выступленні Уладзімір Аляксандравіч Гілеп, звярнуўшы ўвагу прысутных на тое, з якой апантанасцю, настойлівасцю зазірае пісьменнік у далёкія часіны, як рупліва і дбайна збірае ўсе звесткі пра Беларусь даўнейшую.

Анатоля Бутэвіча па праве можна назваць і адным з арганізатараў сённяшняга краязнаўчага руху ў краіне. Яркі прыклад пісьменніка, даследчыка і іншых падштурхоўвае да стараннага і ўважлівага вывучэння гісторыі свайго краю, лёсаў слаўных сыноў і дачок Айчыны.

—Анатоль Бутэвіч — асаблівы аўтар нашага выдавецтва, — расказвае намеснік дырэктара выдавецкага дома "Звязда" Ала Корбут, — бо ён прыходзіць да нас з творчымі праектамі, ініцыятывамі. І ўсё з прапанаванага нам з'яўляецца цікавым. Бо гэта цікава і самаму шырокаму колу чытачоў. Сведчыць пра тое і попыт на кнігі Анатоля Іванавіча. Напрыклад, яго гістарычны раман "Каралева не здраджвала каралю" разышоўся за лічаныя месяцы. Ведаючы Анатоля Бутэвіча найболей як гісторыка і публіцыста, мы спадзяёмся і на працяг яго мастацкага летапісання гісторыі, чакаем яго новых гістарычных раманаў.

Кастусь Хадыка.

Фота Яўгена Пясецкага.