Вы тут

Айчынныя здраўніцы набіраюць абароты


За першае паўгоддзе ў санаторна-курортных і аздараўленчых арганізацыях краіны прайшло лячэнне больш за 650 тысяч чалавек. З іх за кошт сродкаў дзяржаўнага сацыяльнага страхавання і рэспубліканскага бюджэту — 404 тысячы чалавек. Пра гэта паведаміў дырэктар Рэспубліканскага цэнтра па аздараўленні і санаторна-курортным лячэнні насельніцтва Генадзь Балбатоўскі.

Паводле яго слоў, беларускія санаторыі сёння стабільна працуюць і дынамічна развіваюцца, аб чым сведчыць іх 100% запоўненасць.

Прычым самымі папулярнымі застаюцца ўстановы, у якіх ажыццяўляецца лячэнне на аснове мінеральных вод і лячэбных гразяў. Дарэчы, на тэрыторыях санаторыяў цяпер функцыянуе больш за 90 свідравін мінеральных вод і 4 радовішчы лячэбных гразяў. Такое аздараўленне даспадобы не толькі беларусам, але і замежным грамадзянам. За шэсць месяцаў у беларускіх санаторыях прайшло аздараўленне больш за 102 тысячы замежнікаў, 80% з іх — расіяне. Ахвотна наведваюць беларускія санаторыі грамадзяне еўрапейскіх краін, Ізраіля і нават Кітая.

Па словах Генадзя Балбатоўскага, геаграфія беларускага санаторна-курортнага лячэння пастаянна пашыраецца. Ён звязвае гэта з тым, што беларускія санаторыі, якія сёння арыентуюцца на замежных спажыўцоў, імкнуцца спалучыць сусветны ўзровень якасці паслуг з адносна недарагім коштам. Сёння ў сярэднім ён складае не менш за 300 тысяч рублёў за адзін койка-дзень (пры гэтым на пачатку года было 240 тысяч рублёў). У міжсезонны перыяд цэны зніжаюцца.

Асобнае месца займае аздараўленне ў санаторна-курортных установах грамадзян, што не працуюць. Так, у адпаведнасці з законам, інваліды першай і другой груп маюць права на санаторна-курортнае лячэнне адзін раз на два гады.

— Гэта нелагічна, каб пацыенты з лёгкімі паталогіямі ездзілі ў санаторныя ўстановы часцей за інвалідаў першай і другой груп, — заўважыў Генадзь Балбатоўскі. — Таму непрацуючыя грамадзяне могуць атрымліваць пуцёўку адзін раз на тры гады.

Пры гэтым дырэктар цэнтра прызнаўся, што ў сталічным рэгіёне сітуацыя больш складаная, чым у астатніх: тут чарга на атрыманне пуцёўкі ў санаторый даходзіць да чатырох гадоў. Пенсіянеры, як правіла, аплачваюць 15—20% ад кошту пуцёўкі (у залежнасці ад сезона).

Калі дарослым прапануюць адпачынак у санаторыях, то для дзяцей сёлета працуе больш як 5000 лагераў. За два летнія месяцы ў іх прайшлі аздараўленне больш за 309 тысяч дзяцей — гэта 82% ад запланаванай колькасці (377 тысяч). Генадзь Балбатоўскі адзначыў, што нарэшце ўдалося спыніць негатыўную тэндэнцыю па штогадовым закрыцці лагераў. А на іх падрыхтоўку сёлета выдзелілі больш за
100 мільёнаў рублёў.

— Права на аздараўленне ў лагерах з выкарыстаннем дзяржаўных датацый у нас маюць усе непаўналетнія дзеці школьнага ўзросту, — сказаў Генадзь Балбатоўскі. — А дзеці-сіроты і інваліды маюць права часцей адпачываць з выкарыстаннем сродкаў бюджэту і дзярждатацый.

Між тым, сёлетняя дзярждатацыя на кругласутачны лагер складала 900 тысяч рублёў (летась — 605 тысяч рублёў). Па выніках другой змены сярэдняя цана пуцёўкі ў кругласутачны дзіцячы лагер складае 1998 тысяч рублёў. Як правіла, бацькі аплачваюць каля 10% ад кошту пуцёўкі. Для таго, каб атрымаць такую пуцёўку, яны павінны звярнуцца ў камісію па аздараўленні па месцы працы.

На прэс-канферэнцыі было ўзнята і пытанне будаўніцтва новых санаторна-курортных аб'ектаў. Па словах Генадзя Балбатоўскага, санаторый нельга пабудаваць "на пустым месцы", аздараўленчыя ўстановы павінны быць там, дзе ёсць радовішчы мінеральных вод і гразяў. Такія патэнцыяльныя пляцоўкі ў краіне ёсць. У першую чаргу гэта Браслаўскі і Нарачанскі рэгіёны. На тэрыторыі апошняга цяпер ажыццяўляецца дзяржаўная праграма, разлічаная да 2015 года. Яна прадугледжвае 21 мерапрыемства, 18 з якіх ужо праведзены. У прыватнасці, у санаторыі "Прыазёрны" пабудаваны новы лячэбны корпус і пачаў працу аквапарк; уведзены ў эксплуатацыю новы гасцінічны корпус у турыстычным комплексе "Нарач"; у санаторыі "Спадарожнік" пабудавана 10 новых домікаў гасцінічнага тыпу.

Дзіяна СЕРАДЗЮК.

Выбар рэдакцыі

Грамадства

Шакаладныя жаданні па-беларуску. Карэспандэнт «Звязды» пабывала на адной з кандытарскіх фабрык краіны

Шакаладныя жаданні па-беларуску. Карэспандэнт «Звязды» пабывала на адной з кандытарскіх фабрык краіны

Каб паглядзець, што тут рыхтуюць да свята і якімі салодкімі навінкамі збіраюцца здзіўляць беларусаў.

Грамадства

Зберагчы дзяцінства, або як сёння змагаюцца з педафіліяй

Зберагчы дзяцінства, або як сёння змагаюцца з педафіліяй

За дзесяць месяцаў бягучага года супрацоўнікі міліцыі выявілі больш за 600 злачынстваў супраць палавой недатыкальнасці або палавой свабоды непаўналетніх.

Грамадства

Школа — прастора для дыялогу. Чаму на тэму булінгу можна і трэба выказвацца ўслых

Школа — прастора для дыялогу. Чаму на тэму булінгу можна і трэба выказвацца ўслых

Рэспубліканскі цэнтр псіхалагічнай дапамогі падрыхтаваў для педагогаў рэкамендацыі па вырашэнні канфліктных сітуацый.

Грамадства

​Што павiнны зрабiць на прадпрыемствах, каб папярэдзiць распаўсюджванне COVID-19

​Што павiнны зрабiць на прадпрыемствах, каб папярэдзiць распаўсюджванне COVID-19

Мiнiстэрства аховы здароўя распрацавала рэкамендацыi па прафiлактыцы каранавiруснай iнфекцыi ў арганiзацыях.