Дзе вы збіраецеся правесці адпачынак?

Кацярына Чаховіч, індывідуальны прадпрымальнік, г. Мінск:

— Свой адпачынак, які будзе ў верасні, я збіраюся правесці ў туры па Еўропе з шасцідзённым знаходжаннем на ўзбярэжжы Адрыятычнага мора ў Італіі. Вельмі ўпадабалі гэтую краіну раз і назаўжды, таму нават не хочацца траціць каштоўны час адпачынку на любыя іншыя курорты. Прыязнасць нацыі, велічнасць палацаў і будынкаў, рамантычнасць, прыгажосць заходу сонца на Міжземным моры, паветра, сэрвіс і яшчэ шмат розных прычын не пакідаюць іншага выбару, акрамя як зноўку прыязджаць туды. Хочацца яшчэ раз пракаціцца на гандоле па шматлікіх каналах Венецыі, узяўшыся за руку з каханым чалавекам, і акунуцца ў незабыўную атмасферу гэтай чароўнай краіны.

Лізавета Трушчанка, карэспандэнт газеты "Мы і час" Віцебскага дзяржаўнага ўніверсітэта імя П.М. Машэрава, выкладчык гісторыі Беларусі, горад Віцебск:

— Пакуль дакладна не ведаю, дзе буду адпачываць сёлета. Марыла пра экскурсійную паездку на тыдзень ў Чэхію і Германію. Калі мара не здзейсніцца, буду адпачываць у Беларусі: з'езджу да сяброў у Мінск, магчыма, куды-небудзь на возера на пару дзён, абавязкова ў вёску да бабулі — там чыстае паветра, пах сена, а галоўнае — цішыня. Гэта тое месца, дзе сапраўды адпачываеш ад гарадскога рытму. Я лічу, што праводзіць адпачынак добра і за мяжой, і ў нас. Таму, напэўна, ідэальны адпачынак для мяне — гэта спалучэнне экскурсій па новых мясцінах і вясковай цішыні хаця б на тыдзень.

Уладзімір Мікульскі, студэнт Інстытута парламентарызму і прадпрымальніцтва, г. Мінск:

— На жаль, сёлета мне адпачываць не давядзецца, таму пахваліцца ў гэтым плане няма чым. Гэтым летам я заканчваю інстытут. Таму пакуль што ў прыярытэце — пошук працы, на яе і накірую ўсе намаганні. У дадатак, цяпер пастаяннага месца працы я пакуль што не маю, і ўвесь час даводзіцца падпрацоўваць у розных месцах. Адзінае што, магчыма, атрымаецца, — з'ездзіць на некалькі дзён на Нарач. Шашлыкі, рыбалка, добрая кампанія... Не замежжа, вядома ж, але ўражанняў шмат. А па-сапраўднаму адпачываць ужо буду зімой.

Падрыхтавала Дзіяна СЕРАДЗЮК.