Андрэй Кабякоў запатрабаваў размясціць на сайтах аблвыканкамаў інфармацыю па праблемных дамах да 12 жніўня
Падрабязная інфармацыя аб тэрмінах завяршэння будаўніцтва ўсіх праблемных дамоў у Беларусі павінна быць размешчана на сайтах абласных выканаўчых камітэтаў да 12 жніўня. Такое даручэнне даў кіраўнік Адміністрацыі Прэзідэнта Беларусі Андрэй Кабякоў на чарговым пасяджэнні рабочай групы па праблемных пытаннях у будаўнічай галіне, паведамляе карэспандэнт БЕЛТА.
Старшыня Камітэта дзяржаўнага кантролю Аляксандр Якабсон адзначыў, што не ўсімі аблвыканкамамі належным чынам выканана даручэнне рабочай групы па размяшчэнні графікаў уводу дамоў-даўгабудаў, зацверджаных губернатарамі абласцей Беларусі. "Яны спецыяльна ўхіляюцца ад гэтай адказнасці", — лічыць кіраўнік КДК.
Члены рабочай групы таксама пацвердзілі, што на тых сайтах аблвыканкамаў, дзе спісы ўжо размешчаны, інфармацыя практычна нечытэльная. Калі чалавек зойдзе на сайт азнаёміцца са спісамі праблемных дамоў, ён яго з цяжкасцю там знойдзе. У некаторых спісах ёсць прозвішчы адказных службовых асоб, але адсутнічаюць іх пасады, акрамя таго, няма нумароў тэлефонаў, па якіх можна з імі звязацца, а толькі тэлефон гарачай лініі, паведамілі начальнік галоўнага эканамічнага ўпраўлення Адміністрацыі Прэзідэнта Іна Мядзведзева і дырэктар навукова-праектна-вытворчага рэспубліканскага ўнітарнага прадпрыемства "Будтэхнорм" Ігар Лішай.
"Тады неабходна запатрабаваць ад абласных выканаўчых камітэтаў да 12 жніўня выканання гэтага даручэння належным чынам, гэта значыць інфармацыя на сайтах павінна быць даступнай і змястоўнай. Акрамя таго, можна спасылкі на гэтыя спісы апублікаваць у друкаваных СМІ", — даручыў кіраўнік Адміністрацыі Прэзідэнта, старшыня рабочай групы Андрэй Кабякоў.
Паводле яго інфармацыі, цяпер спісы дамоў, будаўніцтва якіх ажыццяўляецца з перавышэннем нарматыўных тэрмінаў, размешчаны на сайтах Магілёўскага, Гомельскага, Мінскага, Віцебскага і Брэсцкага аблвыканкамаў, а таксама на сайце Мінгарвыканкама. Гэта інфармацыя пакуль што адсутнічае на сайце Гродзенскага абласнога выканаўчага камітэта.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.