Прыстанак для рамантыка

Такое ўяўленне дае першая выява Мірскага замка, вядомая сёння

Яна належыць мастаку Кануту Русецкаму. Але імя гэта беларусам трэба ведаць не толькі таму, што ён намаляваў Мірскі замак. Хоць у кантэксце той выставы, якая размясцілася ў паўночна-ўсходняй вежы Мірскага замка, найбольш прыцягальны адзін. Мірскі замак у ім паказаны вельмі рамантычна — і ёсць магчымасць выяву ХІХ стагоддзя параўнаць з тым, што ўяўляе замак у стагоддзі ХХІ. Такая магчымасць застаецца яшчэ да канца жніўня, пакуль будзе доўжыцца выстава: "Наваградскі край вачыма Канута Русецкага", падрыхтаваная ў партнёрстве з бібліятэкай Літоўскай акадэміі навук імя Урублеўскіх.

27 графічных і акварэльных малюнкаў мастака ХІХ стагоддзя даюць уяўленне пра жыццё нашых прапрадзедаў: Русецкі іх ствараў у 1844—1846 гадах як адлюстраванне падарожжа, падчас якога ён наведаў Навагрудак, Нясвіж, Сноў, Мір. Мінулае жыццё, побыт нашых папярэднікаў, тое, як выглядалі гарады і мястэчкі тады, безумоўна, цікава: гэта погляд збоку на беларускае жыццё таго часу. Гэта погляд збоку, але ў нейкім сэнсе і знутры. Таму што Канут Русецкі — творца, які нарадзіўся ў Вільні, вучыўся ў Віленскім універсітэце, а пазней — і ў Еўропе (Парыжы і Рыме), але вярнуўся на радзіму і стаў настаўнікам для шматлікіх асоб, імёны якіх належаць у тым ліку і беларускай культуры. Самога Канута Русецкага можна называць літоўскім творцам, укладваючы ў гэта ўвесь яго шырокі гістарычны сэнс. Нездарма Іван Луцкевіч адну карціну набываў для Беларускага музея ў Вільні — на ім дзяўчына ў беларускім строі з вербамі. Твор так і застаўся ў Вільнюсе. Наогул вялікая частка прац Русецкага захоўваецца ў Літоўскім мастацкім музеі, яго творы ёсць і ў саборах Вільнюса. Але ёсць унікальная магчымасць пабачыць малюнкі майстра, прысвечаныя менавіта Беларусі.

Ларыса ЦІМОШЫК.