Вы тут

Крыніца даўгалецця


— Наша крыніца ў рэкламе патрэбы не мае. Хто п'е гэтую ваду — здаровы і доўга жыве, — кажа вясковы стараста і дэпутат сельсавета Марыя Мікалаеўна Кмец.— Нездарма век жыцця большасці тумінцаў сягае пад 90 і болей гадоў.

У памежнай зоне Брэстчыны тумінская крыніца — сапраўдная святыня і славутасць. Гэтак лічаць не толькі жыхары вёскі Тумін. Крыніц у акрузе наогул нямала (дарэчы, пра адну з іх — у вёсцы Вярхі, мы раней паведамлялі). Сюды ж, амаль каля самай мяжы з Польшчай,

едуць з іншых вёсак, аграгарадкоў і пасёлка Высокае. А што ўжо казаць пра сваіх жыхароў, якія ідуць з бітонамі і вёдрамі з усіх бакоў... Хоць вёска вадой не абдзелена: у ёй прысядзібных 26 студняў.

Марыя Мікалаеўна даўно на пенсіі, але лічыць сваім абавязкам падтрымліваць парадак каля крынічкі. Амаль штораніцы яе можна заспець з мяцёлкай альбо граблямі ў руках.

— А ведаеце, чаму наша крыніца гэткая добрая? — перапытвае захавальніца, абапершыся на свой незаменны рыштунак, — бо настоена на блакітнай гліне. Яшчэ ў мінулую вайну параненым вайскоўцам прыкладалі гэтую гліну да ран, каб хутчэй загойваліся. У каго спіна баліць — добра акунуцца ў купелі. Калі ж праблемы са страўнікам — карысна ваду папіць да пачатку ежы.

1377511025244_main1big

Цяпер штогод у Туміне адбываецца асвячэнне вады — 9 жніўня, у дзень святога Панцеляймона (паводле праваслаўнай традыцыі). Пасля рэканструкцыі і ўпарадкавання тэрыторыі (студня аздоблена каменнем і накрыта дахам, схавана за агароджаю купель) наведвальнікі пачалі больш паважна ставіцца як да ўсяго крынічнага комплексу, гэтак і да самой вады. Сталі больш верыць у яе гаючыя якасці.

— Упарадкаванне крыніцы зроблена ўдзельнікамі брэсцкай моладзевай патрыятычнай суполкі "Покліч". Акрамя нашай, яны аздобілі яшчэ некалькі іншых крыніц: у Агародніках, у Ставах, Вярхах, — з удзячнасцю прыгадала Марыя Кмец. — Мы заўсёды молімся за іх, дай Бог ім здароўя!

Марыя Мікалаеўна прыгадала даўні выпадак, калі адзін святар, паспытаўшы вады, сказаў ёй: "Захоўвайце крыніцу — гэта святое месца!"

— Вось мы і захоўваем, — кажа стараста і спяшаецца дамесці апалае за ноч лісце. — Хутка прыедуць першыя паломнікі, трэба сустрэць іх чысцінёй і парадкам.

Анатоль Кляшчук.

Камянецкі раён.

Выбар рэдакцыі

Грамадства

У 72-м аб'яднаным вучэбным цэнтры юнакі атрымліваюць і грамадзянскія спецыяльнасці

У 72-м аб'яднаным вучэбным цэнтры юнакі атрымліваюць і грамадзянскія спецыяльнасці

72-і аб'яднаны вучэбны цэнтр, што ў Печах, — самая вялікая воінская часць у Беларусі. 

Грамадства

Распавядаем, як арганізавана меддапамога ў Паставах

Распавядаем, як арганізавана меддапамога ў Паставах

Самым аддаленым ад абласнога цэнтра раёне краіны.

Грамадства

Школы Гомельшчыны прайшлі праверку на гатоўнасць да навучальнага года

Школы Гомельшчыны прайшлі праверку на гатоўнасць да навучальнага года

Сё­ле­та ў да­школь­ныя ўста­но­вы ра­ё­на прый­дзе 2 700 ма­лых.