Хроніка апошніх падзей

Арменія ўступіць у Мытны саюз

Адпаведную заяву па выніках перамоў падпісалі лідары Расіі і Арменіі . «Прэзідэнты пацвердзілі нацэленасць РФ і Рэспублікі Арменія на далейшае развіццё працэсаў эканамічнай інтэграцыі на Еўразійскай прасторы, — гаворыцца ў дакуменце. — У гэтым кантэксце прэзідэнт Рэспублікі Арменія Серж Саргсян заявіў аб рашэнні Рэспублікі Арменія ўступіць у Мытны саюз і зрабіць у гэтых мэтах неабходныя практычныя крокі, а ў далейшым удзельнічаць у фарміраванні Еўразійскага эканамічнага саюза».

Японія пабудуе ледзяную сцяну вакол «Фукусімы-1»

Улады Японіі маюць намер інвеставаць сотні мільёнаў долараў у пабудову падземнай ледзяной сцяны вакол ядзерных рэактараў АЭС «Фукусіма-1». Гэта неабходна для таго, каб спыніць уцечкі радыеактыўнай вады. Як заявіў прадстаўнік японскага ўрада, згодна з першапачатковай ацэнкай, праект запатрабуе каля 473 млн долараў інвестыцый. Сёння для ахалоджвання рэактараў запампоўваецца вада, аднак захоўваць яе ў вялікіх колькасцях уладальнік АЭС, кампанія «Tэрса», не ў стане. У апошнія тыдні было зафіксавана некалькі ўцечак заражанай вады, пасля чаго ўрад прыняў рашэнне ўмяшацца ў сітуацыю.

Mісrоsоft набыла Nоkіа

Акцыі Nоkіа на пачатку таргоў у Хельсінкі ў аўторак узляцелі на 47% . Адразу пасля пачатку таргоў цэны выраслі з 2,96 да 4,36 долара за адну акцыю. Пазней кошт крыху знізіўся, і да поўдня акцыі Nоkіа таргаваліся на ўзроўні 4-4,2 долара. Рынкавая капіталізацыя кампаніі вырасла да 15,52 мільярда долараў. Рэкордны ў гісторыі фінскага тэлекамунікацыйнага гіганта рост акцый рушыў услед за паведамленнем аб тым, што кампанія прадае сваё падраздзяленне па вытворчасці і абслугоўванні мабільных тэлефонаў карпарацыі Mісrоsоft. Найбуйнейшы ў свеце вытворца праграмнага забеспячэння дамовіўся аб набыцці мабільнага падраздзялення Nоkіа за 7,17 млрд долараў.

Здзелка, як чакаецца, будзе закрыта ў І квартале наступнага года. Яе павінны ўхваліць акцыянеры Nоkіа і рэгулятары ў ЗША, ЕС і Фінляндыі.

Любімая мелодыя лечыць сэрца

Музыка здольна ўмацаваць сэрца і паскорыць працэс рэабілітацыі «сардэчнікаў», перадае Thе Tеlеgrарh. Па словах кардыёлагаў, у прынцыпе, любы можа ацаніць тэрапеўтычны эфект музыкі. Дастаткова паставіць любімую мелодыю. Медыкі правялі эксперымент: яны падзялілі 74 «сардэчнікі» на тры групы. Першыя хадзілі на кардыягімнастыку на працягу трох тыдняў. Астатнія таксама займаліся, а яшчэ слухалі любімую музыку (дазвалялася ўключаць яе на 30 хвілін штодня). Апошняя група толькі слухала музыку.

Да канца эксперымента паказчыкі работы сэрца ў яго ўдзельнікаў палепшыліся. Здольнасць пераносіць фізічную нагрузку ў людзей з другой групы павысілася на 39%. Людзі, якія хадзілі толькі на гімнастыку, сталі лепш пераносіць нагрузку на 29%. А вось гурт меламанаў — на 19%. Пра тое, што сэрца добра працавала, сведчыў стан эндатэлію (пласт клетак, які высцілае сасуды). Падчас праслухоўвання музыкі выпрацоўваюцца важныя гармоны. Універсітэт Ніш даказаў: калі чалавек слухае сваю любімую мелодыю, у мозгу вызваляюцца эндарфіны. А яны пазітыўна ўплываюць на сасуды. Лепш выбіраць музыку без слоў, устрымлівацца ад цяжкага «металу» (павышае ўзровень стрэсу). Ідэальны варыянт — оперная музыка, класічныя кампазіцыі, радасныя мелодыі.